ق ر پرەمەر-مينيسترى باقىتجان ساعىنتايەۆتىڭ توراعالىعىمەن وتكەن ۇكىمەت وتىرىسىندا پرەزيدەنتتىڭ 5 الەۋمەتتىك باستاماسىن ىسكە اسىرۋ جونىندەگى جول كارتاسىنىڭ جوباسى قارالىپ، قابىلداندى. قۇجاتپەن ۇلتتىق ەكونوميكا ءمينيسترى تيمۋر سۇلەيمەنوۆ تانىستىردى.

جول كارتاسى مۇددەلى مەملەكەتتىك ورگاندارمەن جانە ۇلتتىق بانكپەن بىرلەسىپ ازىرلەنگەن. قۇجات 35 شارادان تۇرادى جانە جەتى زاڭ جوباسىن، اتى ۇكىمەت قاۋلىسىنىڭ جوباسىن جانە ءۇش ۇلتتىق بانك باسقارماسى قاۋلىسىنىڭ جوباسىن ازىرلەۋدى، سونداي-اق مينيسترلەردىڭ ەكى بۇيرىعى مەن اكىمدىكتەردىڭ ءتورت قاۋلىسىن قابىلداۋدى قاراستىرادى.

ق ر ۇلتتىق بانكى — «ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ» ءبىرىنشى باعىتىنىڭ باستى ورىنداۋشىسى. ۇلتتىق بانك وتكەن جىلداردىڭ ەڭ ءساتتى تاجىريبەسىن پايدالانىپ، مەملەكەت باسشىسى انىقتاعان: جىلدىق 7%، 25 جىلعا، باستاپقى جارناسى 20% جاعدايىندا «7 – 20 – 25» باعدارلاماسىن ىسكە قوسۋدى كوزدەپ وتىر.

باعدارلامانى ىسكە اسىرۋعا دايىندىق كەزەڭدەرى انىقتالدى. جاقىن ارادا ۇلتتىق بانك باسقارماسى باعدارلاما وپەراتورى — تولىقتاي ەنشىلەس ارنايى كومپانيا قۇرۋ ماسەلەسىن قاراستىرادى. ۇلتتىق بانك ۇكىمەتكە ناۋرىزدا قاجەتتى زاڭنامالىق تۇزەتۋلەردى ەنگىزەدى.

باعدارلاماعا رەسمي تابىسى بار قازاقستان ازاماتى قاتىسا الادى. قازىرگى ۋاقىتتا بانكتەر كريتەرييلەردى ازىرلەپ جاتىر. ماسەلەن، ەگەر تۇرعىن ءۇي قۇنى 7 ملن تەڭگە بولسا، وندا اي سايىنعى تولەم 50 مىڭ تەڭگەدەن اسپايدى، بۇل قازاقستاندىق قىزمەتكەرلەردىڭ كوپشىلىگى ءۇشىن قولايلى. ءىرى قالالار مەن اۋداندارداعى تۇرعىن ءۇي قۇنىنىڭ سارالانۋى جوققا شىعارىلمايدى، سەبەبى تۇرعىن ءۇي قۇنى ءارتۇرلى بولادى.

ق ر ۇلتتىق ەكونوميكا مينيسترلىگىنىڭ مالىمەتىنە سايكەس، جاڭا يپوتەكالىق باعدارلاما بويىنشا العاشقى تۇرعىن ءۇي نەسيەسىن شامامەن وسى جىلدىڭ تامىز ايىندا بەرۋ جوسپارلانىپ وتىر.

«جالاقىسى تومەن جۇمىسشىلاردىڭ ەڭبەكاقىسىن كوبەيتۋ ءۇشىن ولاردىڭ سالىق جۇكتەمەسىن ازايتۋ» ەكىنشى باعىتىنىڭ باستى ورىنداۋشىسى — ۇلتتىق ەكونوميكا مينيسترلىگى. وسى باعىتتا سالىق زاڭناماسىنىڭ نورمالارىن وزگەرتۋ بويىنشا ۇسىنىستار ازىرلەۋ جوسپارلانعان.

ءبىلىم جانە عىلىم مينيسترلىگى «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ» ءۇشىنشى باعىتىنىڭ نەگىزگى ورىنداۋشىسى. اتالعان باعىت اياسىندا تەحنيكالىق ماماندىقتارعا ەكپىن بەرە وتىرىپ، مەملەكەتتىك ءبىلىم بەرۋ تاپسىرىستارىن ۇلعايتۋ كوزدەلگەن. مەملەكەتتىك-جەكەشەلىك ارىپتەستىك قاعيداسىنداعى جاتاقحانالار قۇرىلىسى بويىنشا تەتىكتەردى انىقتاۋ مەن زاڭنامالىق تۇزەتۋلەردى ازىرلەۋ جوسپارلانۋدا.

«شاعىن نەسيە بەرۋدى كوبەيتۋ» اتتى ءتورتىنشى باعىتقا ەڭبەك جانە حالىقتى الەۋمەتتىك قورعاۋ مينيسترلىگى جاۋاپتى. اتالعان باعىت جەلىسى بويىنشا 2017–2021 جىلدارعا ارنالعان ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىنا تۇزەتۋلەر ەنگىزۋ جوسپاردا بار. وزگەرىستەر قالالارداعى جانە اۋىلدىق جەرلەردەگى شاعىن نەسيە بەرۋدى قارجىلاندىرۋدى ۇلعايتۋعا جانە كاسىپكەرلىكتى دامىتۋعا جاردەمدەسۋگە باعىتتالاتىن بولادى.

«ەلدى گازبەن قامتاماسىز ەتۋدى جالعاستىرۋ» بەسىنشى باعىتىنىڭ باستى ورىنداۋشىسى — ەنەرگەتيكا مينيسترلىگى. اتالعان باعىت «سارىارقا» ماگيسترالدى گاز قۇبىرىنىڭ ءبىرىنشى كەزەڭىنىڭ قۇرىلىسىنا ارنالىپ وتىر. جوبانىڭ سحەماسى مەن قارجىلاندىرۋدىڭ شارتى بەلگىلەنەتىن بولادى. ەقدب، ەادب جانە باسقا دا حالىقارالىق قارجى ۇيىمدارى ارقىلى قارجى تارتۋ جوسپارلانۋدا. جوبانى بيىل شىلدە ايىندا باستاۋ جوسپارلانعان. گاز قۇبىرىنىڭ قۇرىلىسىن 2019 جىلعى جەلتوقساندا اياقتاۋ كوزدەلگەن.

سونىمەن قاتار ۇلتتىق بانك ءتوراعاسى د. اقىشيەۆ، ينۆەستيسيالار جانە دامۋ ءمينيسترى ج. قاسىمبەك، ءبىلىم جانە عىلىم ءمينيسترى ە. ساعادييەۆ، ەڭبەك جانە حالىقتى الەۋمەتتىك قورعاۋ ءمينيسترى م. ءابىلقاسىموۆا، ەنەرگەتيكا ءمينيسترى ق. بوزىمبايەۆ پرەزيدەنتتىڭ بەس باستاماسىن ىسكە اسىرۋ بويىنشا جول كارتاسىنىڭ جوسپارلانعان ءىس-شارالارى تۋرالى باياندادى.

ق ر پرەمەر-مينيسترى باقىتجان ساعىنتايەۆ تالقىلاۋ قورىتىندىسى بويىنشا، ناۋرىز ايىنىڭ سوڭىنا دەيىن ق ر پارلامەنتىنە ۇسىنۋ ءۇشىن بارلىق قاجەتتى زاڭنامالىق وزگەرىستەردى ازىرلەۋدى تاپسىردى.

ەسكە سالا كەتەيىك، 5 ناۋرىزدا مەملەكەت باسشىسى بەس الەۋمەتتىك باستامانى جاريالادى. 6 ناۋرىزدا وتكەن ق ر ۇكىمەتىنىڭ وتىرىسىندا باقىتجان ساعىنتايەۆ ۇلتتىق ەكونوميكا مينيسترلىگىنە مەملەكەتتىك ورگاندارمەن جانە ۇلتتىق بانكپەن بىرلەسىپ، ەلباسىنىڭ باستامالارىن ىسكە اسىرۋ بويىنشا ەگجەي-تەگجەيلى جول كارتاسىن ازىرلەۋدى تاپسىردى.