بيىل وقۋ گرانتىن بولگەندە «التىن بەلگى» يەگەرلەرىنە تەك ءبىر عانا باسىمدىق بەرىلەتىن بولدى، دەپ جازادى Qamshy.kz اقپارات اگەنتتىگى. بۇل تۋرالى پارلامەنت ماجىلىسىندە وتكەن جيىندا ءبىلىم جانە عىلىم ءمينيسترى ەرلان ساعادييەۆ ايتتى.
ءمينيستردىڭ سوزىنشە، بيىلعى وقۋى جىلىن «التىن بەلگىمەن» اياقتاعان تۇلەكتەر تەك ۇبت-دا جيناعان بالىنا قاراي گرانت يەگەرى اتانا الادى.
– بۇل – وتە ماڭىزدى وزگەرىس. وسى ماسەلە كوپ ۋاقىتتان بەرى تالقىلانىپ جۇرگەنى ءمالىم. جاڭا زاڭدى جوعارى وقۋ ورىندارىنىڭ اكادەميكتەرى قولدادى، سونىمەن قاتار دەپۋتاتتاردان دا رۇقسات سۇراپ، بۇل وزگەرىستى قابىلدادىق. ۇبت-نىڭ الدىندا شىعاتىن زاڭنىڭ وزگەرىسى – «التىن بەلگىگە» يە بولعان بالالارعا ۇبت بالىنىڭ ناتيجەسى بويىنشا عانا، ەگەر ونىڭ بالى بىردەي بولسا، وعان گرانت بولىنەدى. ياعني تۇلەكتەر تەك «التىن بەلگى» يەگەرى بولعانى ءۇشىن جوعارى وقۋ ورنىنا تەگىن گرانتقا يە بولا المايدى، تەك ۇبت ناتيجەسى بويىنشا بالل سانى بىردەي بولىپ، ءبىر ورىنعا بىرنەشە ۇمىتكەر تالاسقان جاعدايدا عانا «التىن بەلگى» يەگەرى ەسكەرىلەدى»، - دەدى ساعادييەۆ.
ءبىلىم جانە عىلىم ءمينيسترى بىلتىرعى وقيعاعا دا توقتالىپ ءوتىپ، وقۋ گرانتتارىن بولگەندە ادىلەتسىزدىك بولدى دەپ كوپتەگەن اتا-انالاردىڭ شاعىم جاساعانىن دا اتاپ ءوتتى.
– بۇل وزگەرىستى ەنگىزۋدەگى باستى ماقساتىمىز – بيىل وسىنداي كەلەڭسىزدىكتەردى بولدىرماۋ. بىلتىر استاناعا كوپتەگەن اتا-انا كەلىپ، شاعىم تۇسىرگەن ەدى، – دەدى ەرلان ساعادييەۆ.
ءبىلىم جانە عىلىم ءمينيسترىنىڭ بۇل باستاماسىنا دەپۋتاتتار ءبىراۋىزدان قولداۋ ءبىلدىردى. داۋىس بەرۋ ناتيجەسىندە ءبىلىم تۋرالى زاڭعا جاڭا وزگەرىستەر ەنگىزىلەتىن بولدى.
ءبىلىم جانە عىلىم ۆيسە-مينيسترى اسحات قانات ۇلىنىڭ ايتۋىنشا، ۇبت-دان جوعارى بالل جيناي الماعان، ءبىراق مەكتەپتى ۇزدىك بىتىرگەن تۇلەكتەر «التىن بەلگى» يەگەرى بولىپ قالا بەرەدى.
– 5 سىنىپتان باستاپ مەكتەپ قابىرعاسىندا ۇزدىك وقىعان تۇلەكتەردى ءبىر ءساتسىز سىناق ءۇشىن «التىن بەلگىسىنەن» ايىرمايمىز. ءبىراق مەكتەپتى «التىن بەلگىمەن» بىتىرگەن تۇلەكتەر جاپپاي گرانتقا يە بولا المايدى. ەگەر ولاردىڭ ۇبت-دان جيناعان بالى مەكتەپتى ورتاشا كورسەتكىشپەن بىتىرگەن تۇلەكتەن از بولسا، جوعارى بالل جيناعان تۇلەك گرانت يەگەرى اتانادى. ال كورسەتكىشى تەڭ تۇسكەن جاعدايدا «التىن بەلگى» يەگەرىنە گرانت بەرىلەدى»، - دەدى ۆيسە-مينيستر.
