بۇگىن ۇكىمەت وتىرىسىندا پرەمەر-مينيستر باقىتجان ساعىنتايەۆ دەنساۋلىق ساقتاۋ ءمينيسترى ەلجان ءبىرتانوۆتان حالىققا دارى-دارمەك نەگە جەتپەي جاتقانىن سۇرادى، دەپ حابارلايدى  Qamshy.kz اقپارات اگەنتتىگى.

 "باقىت تۇرلىحان ۇلى (قارجى ءمينيسترى – رەد.ەسكەرتپ) ايتىپ وتىرعانداي، رەسپۋبليكالىق بيۋدجەتتەن بولىنگەن 13 ملرد تەڭگەنى دەنساۋلىق ساقتاۋ مينيسترلىگى يگەرمەگەن. ەلجان امانتاي ۇلى (ءبىرتانوۆ، دەنساۋلىق ساقتاۋ ءمينيسترى –اۆتور ەسكەرتپ.) دارىلەر الىنباي جاتىر. ناۋرىز ايىنىڭ ورتاسىنا كەلدىك، ءالى ءدارى جەتپەي جاتىر. بۇل قالاي سوندا؟"، — دەپ داۋىس كوتەرە سۇرادى ساعىنتايەۆ مينيستردەن.

 "قازىرگى تاڭدا دارى-دارمەكتىڭ 94 پايىزدان استامى ساتىپ الىنعان. جالپى وڭىرلەرگە 85 پايىزدان استام ءدارى جەتكىزىلدى. سوڭعى دارىلەردى ساتىپ الۋ ءۇشىن ءتيىستى شارالاردى قولعا الىپ جاتىرمىز. قاجەتتى ءدارىنىڭ ءبارى جەتكىزىلدى"، — دەدى مينيستر.

ال مەملەكەت قازىناسىنان بولىنگەن اقشانىڭ يگەرىلمەۋ سەبەبىن بىلاي ءتۇسىندىردى:

 "يگەرىلمەگەن 12 ميللياردتىڭ 10 ميللياردى مەديسينالىق قىزمەتتەردى تولەۋ كوميتەتىنىڭ جەلتوقسان ايىنداعى، سوڭعى ەكى اپتاداعى اقشاسىنىڭ تولەنبەۋىنەن. قاجەتتى نورماتيۆتىك-قۇقىقتىق اكتى قابىلداۋعا بايلانىستى ءسال كەشىگىپ تولەندى…"، — دەدى ءبىرتانوۆ.

ساعىنتايەۆ ءمينيستردىڭ ءسوزىن اياقتاتپاستان، بۇل ماسەلەنى باقىلاۋعا الۋدى تاپسىردى.

ال ءبىلىم جانە عىلىم مينيسترلىگى 17 ميلليارد تەڭگەنى، اۋىل شارۋاشىلىعى 8 ميلليارد تەڭگەنى يگەرمەگەن.