قاراعاندىنىڭ وڭتۇستىك-شىعىسىنداعى شاعىن اۋداندا قۇبىر جارىلىپ، كوشەنى ىستىق سۋ باستى، دەپ حابارلايدى tengrinews.kz. كۋاگەرلەردىڭ ايتۋىنشا، سۋ باسقان اۋماق ءبىر كيلومەتردى الدى.

- قۇبىر جارىلعاننان كەيىن رەسپۋبليكا كوشەسىنە قاراي ىستىق سۋ اعىلىپ كەلىپ جاتتى. بۋدىڭ سالدارىنان كولىك قوزعالىسى قيىندادى. ەشتەڭە كورىنبەيدى، - دەيدى جۇرگىزۋشى.

«وربيتا» شاعىن اۋدانىنىڭ تۇرعىندارى ۇيلەرىندە ءقازىر ىستىق سۋ مەن جىلۋ جوقتىعىن ايتىپ، شاعىمدانىپ جاتىر.

«قاراعاندى جىلۋ ترانزيت» جشس-نىڭ حابارلاۋىنشا، قۇبىردىڭ جارىلعانى كەشە كۇندىز ساعات تورتتە انىقتالعان.

- 2018 جىلدىڭ 13 ناۋرىزىندا رەسپۋبليكا كوشەسىندەگى قۇبىردا ديامەترى 720 ميلليمەتر اقاۋ تابىلعان. سونىڭ سالدارىنان 144 كوپ قاباتتى ءۇي، ءۇش جەر ءۇي جانە 32 زاڭدى تۇلعىلاردىڭ عيماراتى ىستىق سۋ مەن جىلۋسىز قالدى، - دەدى كومپانيا وكىلى.

اتالعان كومپانيا اقاۋدى تۇزەۋ ءۇشىن ەكى اپاتتى قالپىنا كەلتىرۋ توبى قۇرىلعانىن حابارلادى.  توپ 14 ادامنان تۇرادى، ولار 9 ارنايى تەحنيكامەن جۇمىس ىستەپ جاتىر.

-   تابىلعان اقاۋ مەملەكەتتىك «نۇرلى جول» باعدارلاماسى اياسىندا قالپىنا كەلتىرىلەدى، دەدى «قاراعاندى جىلۋ ترانزيت» ج ش س باسپا ءسوز قىزمەتى.