بۇگىن استانادا تاجىكستان رەسپۋبليكاسىنىڭ پرەزيدەنتى ەمومالي راحموننىڭ قازاقستان رەسپۋبليكاسىنا رەسمي ساپارى اياسىندا قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگى مەن تاجىكستان رەسپۋبليكاسىنىڭ ۇكىمەتى جانىنداعى ءدىن ىستەرى، ۇلتتىق داستۇرلەر، مەرەكەلەر مەن سالت-جورالاردى رەتتەۋ كوميتەتى اراسىندا ىنتىماقتاستىق تۋرالى مەموراندۋمعا قول قويىلدى، دەپ جازادى Qamshy.kz اقپارات اگەنتتىگى.
قۇجاتقا قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ پەن تاجىكستان رەسپۋبليكاسىنىڭ ۇكىمەتى جانىنداعى ءدىن ىستەرى، ۇلتتىق داستۇرلەر، مەرەكەلەر مەن سالت - جورالاردى رەتتەۋ كوميتەتىنىڭ ءتوراعاسى داۆلوتزادا سۋلايمون قول قويدى.
مەموراندۋم اياسىندا ءدىن سالاسىنداعى مەملەكەتتىك ساياساتتى جۇرگىزۋ سالاسىندا، ونىڭ ىشىندە ءدىني ەكسترەميزمنىڭ الدىن الۋ ماسەلەلەرى بويىنشا تاجىريبە الماسۋ قاراستىرىلعان.
تاراپتار ءوزارا قىزىعۋشىلىق تۋدىرعان ماسەلەلەر بويىنشا كەزدەسۋلەر مەن ءىس-شارالار ۇيىمداستىرىپ، ناقتىراق ايتقاندا دەسترۋكتيۆتى ءدىني يدەولوگيانىڭ جانە ءدىني ەكسترەميزم كورىنىستەرىنىڭ تارالۋىن بولدىرماۋ ماقساتىندا ءتۇسىندىرۋ جۇمىستارىن جۇرگىزۋدى جوسپارلاۋدا.
بۇدان بولەك، تاراپتار بىرلەسكەن زەرتتەۋلەر جۇرگىزۋ ءۇشىن عىلىمي-زەرتتەۋلەرمەن اينالىساتىن ۇيىمدار اراسىنداعى ىنتىماقتاستىقتى دامىتۋعا نيەت بىلدىرۋدە.
قۇجاتتا تاراپتار بىرلەسە ءوز مەملەكەتتەرىنىڭ ۇلتتىق زاڭنامالارى شەڭبەرىندە ءدىن سالاسىنداعى ىنتىماقتاستىقتى جۇزەگە اسىراتىندىعى كورسەتىلگەن.
سونداي-اق، قازاقستاندىق جانە تاجىكستاندىق ۆەدومستۆا باسشىلارى ەكىجاقتى ىنتىماقتاستىق ماسەلەلەرىن دە تالقىلادى.
