وتباسىلىق ءومىردىڭ قىزىعى مەن شىجىعىن كومەديا ارقىلى جەتكىزەتىن «ۇيلەنگەندەر» («جەناتيكي») سەريالىنىڭ كەزەكتى ماۋسىمى 19 ناۋرىزدان باستاپ 31 ارنادان بەرىلەدى، دەپ حابارلايدى Qamshy.kz اقپارات اگەنتتىگى. بۇگىن بەس ءبولىمدى سەريالدىڭ العاشقى ءبولىمى جۋرناليستەرگە كورسەتىلدى.

«قالاداعى اڭىزدار» («گورودسكيە لەگەندى») جوباسىنىڭ اۆتورلارى وتباسىلىق ومىرگە قادام باسقان ءتورت دوستىڭ ءومىرىن «ۇيلەنگەندەر» سەريالى ارقىلى كورسەتپەك. ايەلىمەن، اتا-اناسىمەن اراداعى كيكىلجىڭدەر، شەشىلمەستەي كورىنەتىن ماسەلەلەر، الدا توسىپ تۇرعان توسىنسىيلار، وتباسى الدىنداعى جاۋاپكەرشىلىك – وسىنىڭ ءبارى فيلمدە بايانادالادى.

سەريالدىڭ رەجيسسەرى – سانجار وماروۆ، پروديۋسەرلەرى – ءسابيت راحىمبايەۆ پەن ءداۋىت شايحيسلاموۆ، اتقارۋشى پروديۋسەرى – دانيار ورمانبايەۆ.

پروديۋسەر ءسابيت راحىمبايەۆتىڭ ايتۋىنشا، فيلمدەگى قىزىقتى وقيعالار ومىردەن ويىپ الىنعان. العاشقى ەكى ماۋسىمنان ەرەكشەلىگى، اۆتورلار بۇل جولى ەر مەن ايەل اراسىنداعى قارىم-قاتىناسقا ايرىقشا ءمان بەرگەن.

–ءبىز بالا كۇنىمىزدەن كۆن-دا ويناپ كەلەمىز. ءومىرىمىز شىعارماشىلىقپەن تىعىز بايلانىستى. اينالامىزدا كورگەن دۇنيەمىزدەن تۋىندى جاساپ شىعارامىز. ماسەلەن، العاشىندا ستۋدەنتتىك ءومىر جايلى ءتۇسىرىپ جۇردىك. وقۋ بىتىرگەن سوڭ ەسەيىپ، جاڭا ومىرگە قادام باسقان ساتتە بويداق جىگىتتەردىڭ ءومىرى جايلى «گورودسكيە لەگەندى» سەريالىن تۇسىردىك. كەيىن ۇيلەندىك تە، وتباسىلىق ءومىر تاقىرىبىنا ويىستىق. بۇعان دەيىن ەكى ماۋسىمى شىقتى. ەندىگىسى 5 بولىمنەن تۇراتىن «ۇيلەنگەندەر ناۋرىزدا» دەپ اتالاتىن كومەديالىق سەريال. وندا ناۋرىزداعى وقيعالار سۋرەتتەلەدى، - دەدى ءسابيت راحىمبايەۆ Qamshy.kz اقپارات اگەنتتىگىنىڭ تىلشىسىنە بەرگەن سۇحباتىندا.

–ءبىرىنشى بولىمىندە ەرلەردىڭ ساۋناعا بارىپ، وزگە قىزدارمەن ايەلدەرىنە اشكەرە بولۋى، ولاردان كەك الماق بولعان ايەلدەرىنىڭ قىدىرىپ كەتىپ، وزگە ەركەكپەن كۇيەۋلەرىنە ۇستالىپ قالۋى كورسەتىلگەن. قازاق اراسىندا بۇل وقيعالارعا قاتىستى سىن ايتۋشىلار كوبەيۋى مۇمكىن. بۇعان قاتىستى ءوزىڭىز نە ايتاسىز؟

–سىن ايتۋشىلاردىڭ بولاتىنىن ءوزىمىز دە الدىن الا بولجادىق. ءبىراق ءبىزدىڭ سەريال جاڭا ايتىپ وتكەنىمدەي بەس بولىمنەن تۇرادى. بەسىنشى بولىمىندە كورەرمەن قالاعان مەرەكە دە، پاتريوتتىق سەزىم دە بولادى. ال جاڭاعى وقيعالار ومىردە بولاتىن جاعدايلار. ونىڭ نەسىن جاسىرامىز؟ ەر ادام ساۋناعا بارىپ كوڭىل كوتەرەدى، ايەل ادامدار دا ءتۇرلى كلۋبتارعا قىدىرادى. دەگەنمەن تىم ارتىق كەتتىك دەپ ويلامايمىن. ءبىز سەنارييىن جازۋ بارىسىندا كورەرمەن دۇرىس قابىلدايتىنداي ويلانىپ جازامىز،  ءدال سونداي ويمەن تۇسىرەمىز. الايدا حالىقتىڭ اۋزىنا قاقپاق بولا المايسىڭ. ايتاتىندار دا تابىلۋى مۇمكىن. تەك ءبىزدىڭ كورسەتكىمىز كەلگەنى: ايەلدەر ءىستىڭ ءمان-جايىنا بارماي، ءجون-جوسىعىن بىلمەي جاتىپ، ايعايعا باسىپ جاتادى. ال ولار ەر ادامنىڭ ورنىندا بولىپ كورسە، ءبارىن تۇسىنەر ەدى. ساۋنا، كلۋب – ول ءومىردىڭ شىندىعى.

جالپى سەريالدا ايەل مەن ەردىڭ بار سىرى اشىلادى. ەرلەردىڭ ويى قانداي بولادى، دوستار بولىپ باس قوسۋلاردا، وتىرىستاردا قانداي وقيعالار ورنايدى، نەدەن قورقادى، نە سەزەدى – ءبارى دەرلىك باياندالعان.

–ءسىز وسى ۋاقىتقا دەيىن تەك كومەديا ءتۇسىرىپ كەلدىڭىز. باسقا جانردا فيلم ءتۇسىرۋ جوسپارىڭىزدا بار ما؟

–مەنىڭشە، ادام ءبىر باعىتتىڭ، ءبىر سالانىڭ مامانى بولۋ كەرەك. جالپى ءوزىم تريللەر كورگەندى، قورقىنىشتى، فانتاستيكالىق فيلمدەردى ۇناتامىن.  كومەديالىق جانردا جۇمىس ىستەگەندىكتەن، ونداي فيلمدەردى كورمەيمىن. سەبەبى ءبىر نارسەدەن ادام شارشايتىن ساتتەرى بولادى. ال باسقا جانرلاردا سەناريي جازۋ، فيلم ءتۇسىرۋ ويىمدا بار. تەك ونى تەرەڭىنەن ءتۇسىنىپ، كاسىبيلىگىنە جەتە ءبىلۋ كەرەك.

كينو ءتۇسىرۋ، سەناريي جازۋ وتە ۇلكەن جاۋاپكەرشىلىكتى تالاپ ەتەدى. ءوز تۋىندىڭ كورەرمەن سۇرانىسىنا يە بولۋ ءۇشىن نە ىستەۋ كەرەك؟ مۇنىڭ ءبارىن ويلانىپ، تولعانىپ، ءبىرىنشى كەزەكتە ءوز كوڭىلىڭنەن شىعاتىن سەناريي جازۋ – قيىننىڭ قيىنى.