وسكەمەندىك جىگىت وزىنەن 15 جاس ۇلكەن ادامنىڭ جەكە كۋالىگىمەن ءۇش بىردەي بانك قىزمەتكەرىن سان سوقتىردى، دەپ حابارلايدى قازاقپارات.

وقيعا 1988 جىلى تۋعان ايىپتالۋشىنىڭ كوشەدەن 1974 جىلعى بەيتانىس ادامنىڭ جەكە كۋالىگىن تاۋىپ الۋىنان باستالادى. قۇجاتتاعى ادامنىڭ سۋرەتى وزىنە ۇقسايتىنىن اڭعارعان جىگىت ءتيىستى ورىندارعا وتكىزۋدىڭ ورنىنا تىعىپ الادى.

جىگىتتىڭ جىمىسقى ويىنا ەڭ ءبىرىنشى حالىققا قىزمەت كورسەتۋ ورتالىعىنىڭ ماماندارى الدانعان. ولار قۇجاتتىڭ جالعان يەسىنە زەينەتاقى جيناقتارى تۋرالى انىقتامانى ەش كەدەرگىسىز شىعارىپ بەرىپتى. قاجەت قۇجاتتىڭ ءبارى قولىنا تۇسكەن سوڭ ول اۋەلى «كاسپيي بانكتەن» 3 812 074 تەڭگەنىڭ نەسيەسىن وپ-وڭاي راسىمدەيدى. بانك تاراپىنان ەشقانداي كۇدىك تۋماعانىن بايقاعان جىگىت قۇنىعا تۇسكەن. وسىلايشا، ول «ەۋرازيا بانكىنەن» 1 487 200 تەڭگە، «Forte bank» اق-دان 4 589 329 تەڭگە تاعى الادى. بانك قىزمەتكەرلەرىن عانا الداپ قويماي، بەيتانىس ادامدى 10 ملن تەڭگەدەن استام نەسيەگە دۋشار ەتەدى.

 «سوتتىڭ 2018 جىلعى 3 ناۋرىزداعى شەشىمىنە سايكەس، كۇدىكتىگە قىلمىستىق كودەكستىڭ 177-بابىنىڭ 4-تارماعى بويىنشا ايىپ تاعىلىپ، 3 جىل، 9 ايعا شارتتى تۇردە باس بوستاندىعىنان ايىرۋ جازاسى تاعايىندالدى» - دەيدى وسكەمەن قالاسىنىڭ №2 سوتىنىڭ باسپا ءسوز قىزمەتى.

ايتا كەتەيىك، وقيعانىڭ ءبارى 2013 جىلى بولعان. وسى ۋاقىت ىشىندە كۇدىكتى ىزدەۋدە بولعان ارادا تۋرا 4 جىل وتكەندە كۇدىكتىنىڭ اپكەسى بانكتەرگە باۋىرىنىڭ جاساعان ارەكەتى تۋرالى مالىمدەپ، شىعىندارىن قايتارا باستاعان. قازىرگى تاڭدا ءۇش بانكتىڭ دە شىعىنى تولىق وتەلدى.