بۇگىن الماتىدا "وقو-دا زورلانعان بالاعا قاتىستى داۋ-داماي" اتتى باسپا ءسوز جيىنى ءوتتى، دەپ حابارلايدى Qamshy.kz اقپارات اگەنتتىگى. 

كونفەرەنسياعا زاڭگەر باۋىرجان ازانوۆ، قازاقستانداعى ادام قۇقىعى جونىندەگى حالىقارالىق بيۋرو ديرەكتورىنىڭ ورىنباسارى روزا اقىلبەكوۆا جانە ب ا ق وكىلدەرى قاتىستى. 

كونفەرەنسيادا ءسوز العان زاڭگەر باۋىرجان ازانوۆ وقو ءىىد قىزمەتكەرلەرى بالانىڭ زورلانباعانىن ايتقانىن جەتكىزدى. 

- وسىدان ەكى اي بۇرىن اجەسى وقو ءىىد بالا زورلىعىنا قاتىستى ارىزدانعان. الايدا ماعان جەتكەن اقپارات بويىنشا، ەكى ايدا ەشقانداي تەرگەۋ جۇرگىزىلمەگەن. سوندىقتان ولاردى الماتىعا بارا جاتقان جولدا پويىزدا ءتۇسىرىپ الىپ، ىىد-گە جەتكىزگەن. مەن تەرگەۋ ارەكەتتەرىن تاڭ ەرتەڭ جۇرگىزۋىن سۇرادىم. سەبەبى زاڭ بويىنشا تەرگەۋ تۇندە جۇرگىزىلمەيدى. كەزەكشى پوليسەيدى شاقىرىپ، تەرگەۋدىڭ تاڭ ەرتەڭ جۇرگىزىلۋى تۋراسىنداعى ءوتىنىشىمدى تىركەۋىن سۇرادىم. ءبىراق ءوتىنىشىم ورىندالمادى."،-دەيدى ول. زاڭگەردىڭ ايتۋىنشا، وقو دۆد قىزمەتكەرى بالانىڭ ءوزىن زورلادى دەپ وتىرىك ايتىپ وتىرعانىن ايتادى.

- تەرگەۋ جۇرگىزىلمەي، ەكسپەرتيزا جاسالماي جاتىپ ولاردىڭ بالانىڭ زورلانباعانىن ايتىپ وتىرسا، ولار ادىلەتتى تەرگەۋ جۇرگىزەتىنىنە سەنىمدى ەمەسپىن، دەدى زاڭگەر.  

ايتا كەتەيىك،  «وقو-داعى سارىاعاش اۋدانى اباي اۋىلىنىڭ جەتى جاستاعى تۇرعىنى زورلىقتىڭ قۇربانى بولدى» دەگەن حابار الەۋمەتتىك جەلىگە كەڭ تاراپ، جەرگىلىكتى باق-تىڭ نازارىنا ءىلىنىپ، الەۋمەتتىڭ اشۋ-ىزاسىن تۋدىرىپ، قاتتى تالقىلاۋعا ۇلاسقان. 14 ناۋرىزدا باتىربەكوۆا مەن جيەنىن پوليسيا ۇستاعانى حابارلانعان. جەرگىلىكتى قوعام بەلسەندىسى دىنمۇحامەد ارتىقوۆتىڭ ايتۋىنشا، باتىربەكوۆا مەن ونىڭ جيەنىن سارسەنبى كەشكى ساعات 20.00 شاماسىندا شىمكەنت ۆوكزالىنان الماتىعا جۇرەيىن دەپ تۇرعان جەرىنەن جيىرما شاقتى پوليسەي كۇشتەپ الىپ كەتكەن.