زورلىق كورگەن بولۋى مۇمكىن شىمكەنتتىك جەتى جاستاعى بالانىڭ وقيعاسى ەل اراسىنا تارالعالى ءساپارالى سەلتانوۆتىڭ ەسىمى قاتار اتالاتىن بولدى دەپ جازادى Qamshy.kz اقپارات اگەنتتىگى today.kz سايتىنا سىلتەمە جاساي وتىرىپ.

«مەنىڭ تۋعان كەلىنىم سول مەكتەپتىڭ ديرەكتورى. جوعارى ءبىلىمدى، قازاق مەملەكەتتىك قىزدار پەداگوگيكالىق ۋنيۆەرسيتەتىن بىتىرگەن. مەن رايكومدى باسقارىپ جۇرگەندە امانگەلدى باتىربەكوۆ دەگەن جۋرناليست ەكى رەت دەپۋتاتتىق سايلاۋعا ءتۇسىپ، ەكەۋىندە دە وتە الماي قالدى. كىم سايلاۋدان جەڭىلسە، سونىڭ جاعىنا شىعىپ، ماعان قارسى ءتۇرلى ىس-ارەكەت جاساۋمەن اينالىسىپ كەلەدى. مەن 2010 جىلى زەينەتكە شىققان اداممىن، ءقازىر جاسىم جەتپىستە. كەيىن اۋدان اكىمىنىڭ كەڭەسشىسى بولىپ ءبىر جىل وتىردىم. مەنىڭ سارىاعاش اۋدانى بويىنشا سايلاۋ كوميسسياسىنىڭ ءتوراعاسى بولعانىم باتىربەكوۆكە جاقپادى. بىزبەن 5 رەت سوتتاسىپ، ۇشەۋىندە جەڭىلىپ، ەكەۋىندە قاشىپ كەتكەن. ءوزى ءبىر جىل تۇرمەدە وتىرىپ كەلدى. سوندا دا قويمايدى. مەن ونى مويىنداعان ادام ەمەسپىن»، – دەدى سەلتانوۆ.  

ءساپارالى سەلتانوۆ بالانى زورلاعان بولۋى مۇمكىن دەلىنگەن بالالاردىڭ اراسىندا ءوزىنىڭ بالاسى دا، نەمەرەسى دە جوق ەكەنىن ايتتى. 

«زورلاندى دەلىنگەن جەتى جاستاعى بالا جانىبەكوۆ اتىنداعى ورتا مەكتەپتىڭ شاكىرتى. ول بالالاردىڭ اراسىندا مەنىڭ بالام جوق! سەلتانوۆتىڭ بالاسى بار دەگەن وتىرىك اقپارات. بۇل جەردە ەكى بالا بولعان، ەكى بالانىڭ بىرەۋىنىڭ اكەسى كەشە وسىعان شىداي الماي ينسۋلت الدى دا، ءولىپ قالدى. جەتىنشى سىنىپتىڭ بالالارىنىڭ ءبارى ءقازىر تەرگەلىپ جاتىر. ول بالالار بۇنى ىستەدى مە، ىستەمەدى مە، ءالى ەشتەڭە انىقتالعان جوق. انىقتالعان جاعدايدا دا بۇل مەكتەپتىڭ ىشىندە بولعان وقيعا ەمەس. مەنىڭ كەلىنىم سونداي جۋاس ادام. ءقازىر ونى دا، جانىبەكوۆ اتىنداعى مەكتەپتىڭ ديرەكتورىن دا ءىس بىتكەنشە قىزمەتتەرىنەن ۋاقىتشا شەتتەتىپ قويدى»، – دەدى سەلتانوۆ.  

سەلتانوۆ ق ر بالا قۇقىقتارى جونىندەگى ۋاكىل زاعيپا بالييەۆانى سىيلايتىنىن، ءبىراق سويلەسىپ كورمەگەنىن ايتتى.  

«زاعيپا بالييەۆامەن سويلەسكەن ادام ەمەسپىن. بالييەۆامەن ەشقاشان بىرگە جۇمىس ىستەگەن جوقپىن.  ول قازاقستان رەسپۋبليكاسى ورتالىق سايلاۋ كوميسسياسىنىڭ باسشىسى بولدى، ال مەن سارىاعاش اۋدانى بويىنشا سايلاۋ كوميسسياسىنىڭ ءتوراعاسى بولدىم. سودان شىعىپ وتىرعان دالباسا اڭگىمە بۇل. اللانىڭ الدىندا ارىم دا، جۇرەگىم دە تازا. مەنىڭ دە انا بالاعا (جەتى جاستاعى زورلاندى دەلىنگەن بالا، – رەد.) جانىم اشيدى»، – دەدى ول.

ءساپارالى سەلتانوۆ ءوزىنىڭ بۇل ىستە تازا ەكەنىن قاداپ ايتتى. 

«2014 جىلى پرەزيدەنت نازاربايەۆ ماعان «قۇرمەت» وردەنىن بەردى. وڭتۇستىك قازاقستان وبلىسىنىڭ قۇرمەتتى ازاماتىمىن. وسىنىڭ ءبارى ىشتەرىن تارىلتىپ، كورە الماۋشىلىققا اكەلىپ جاتىر. قۇدايدىڭ الدىندا دا، ادامنىڭ الدىندا دا تازامىن! بەس ۇل، ءبىر قىزىم بار. بەس ۇلىمنىڭ بىرەۋى جاڭاعى ديرەكتوردىڭ كۇيەۋى. ەكىنشى بالام پوليسيادان وتستاۆكاعا شىقتى، پودپولكوۆنيك. ءۇشىنشى بالام مەكتەپتىڭ ديرەكتورى بولعان. بەسىنشى بالام قولىمدا. بالالارىمنىڭ ءبارى مەكتەپتى «التىن بەلگىمەن»، جوعارى وقۋ ورنىن «قىزىل ديپلوممەن» بىتىرگەن. قىزىم كەشە دوكتورلىق قورعادى. ءوزىم جەتىمدەر ءۇيىنىڭ تاربيەلەنۋشىسىمىن، اكە-شەشەدەن بەس جاسىمدا قالدىم»، – دەدى سەلتانوۆ.

ەسكە سالاتىن بولساق، امانگەلدى باتىربەكوۆ ءوزىنىڭ جەكە پاراقشاسىنا زاعيپا بالييەۆا مەن ءساپارالى سەلتانوۆ 8 جىل بىرگە قىزمەتتەس بولعانىن جازعان ەدى.