بۇگىن الماتى وبلىسى اكىمىنىڭ ءبىرىنشى ورىنباسارى ل. تۇرلاشوۆتىڭ توراعالىعىمەن وبلىستاعى سۋ تاسقىنى ءقاۋپى مەن الدىن الۋ شارالارى تۋرالى ماسەلە تالقىلاندى. بۇل تاقىرىپ جونىندە الدىمەن وبلىستىق توتەنشە جاعدايلار جونىندەگى دەپارتامەنتتىڭ باسشىسى دارىنبەك بايسارييەۆ ايتىپ بەردى، دەپ جازادى Qamshy.kz اقپارات اگەنتتىگى الماتى وبلىسى اكىمدىگىنىڭ باسپا ءسوز قىزمەتىنە سىلتەمە جاساي وتىرىپ.

دەپارتامەنت باسشىسىنىڭ سوزىنە سۇيەنسەك، 23-25 اقپان ارالىعىندا وبلىس اۋماعىندا ەرىگەن قار سۋى تۇرعىن ءۇي اۋلالارىنا كىرۋ فاكتىلەرى ەڭبەكشىقازاق، جامبىل، ىلە، قاراساي، تالعار اۋداندارى مەن تالدىقورعان قالاسىندا تىركەلدى. قار سۋىنىڭ اۋلاعا كىرۋىنىڭ ەڭ ءبىرىنىشى سەبەبى ارىق جۇيەلەرىنىڭ بولماۋىنان، بۇرىننان بار يرريگاسيالىق كانالداردىڭ بۇزىلۋى نەمەسە ۇستىنە باسقا قۇرىلىستاردىڭ جۇرگىزىلۋى بولىپ وتىر.

«بۇل ءوز كەزەگىندە اۋدان، قالا اكىمدەرىنىڭ وزدەرىنە جۇكتەلگەن مىندەتتەردى جاۋاپتىلىقپەن اتقارماعانىنان تۋىنداپ وتىر. تۇرعىندار اراسىندا ارىقتاردى تازالاۋ، قاردى ءۇي ماڭى اۋماعىنان شىعارىپ تاستاۋ تۋرالى ءتۇسىندىرۋ جۇمىستارىن جۇرگىزۋ كەرەك. سول سياقتى ارىق-كانالداردى، سۋ جىبەرۋ قۇبىرلارىن تازالاۋ ءىسى دە ءوز دەڭگەيىندە ەمەس. اسىرەسە، رايىمبەك، كەربۇلاق، جامبىل اۋداندارى بۇل باعىتتا وزدەرىن قامشىلاۋى ءتيىس»، - دەدى د. بايسارييەۆ. سونىمەن قاتار كازگيدرومەتتىڭ بولجاۋىنشا، الداعى كۇندەردە +15 گرادۋسقا دەيىن كوتەرىلىپ، ەكى كۇن قاتارىنان جاۋىن-شاشىن بولاتىنىن دا ەسكەرتتى.

بارلىق اۋدان، قالا اكىمدەرىنە ءسوز بەرىلىپ، ولار ءوز اۋماقتارىنداعى وزەن-كولدەر سۋلارىنىڭ دەڭگەيى تۇراقتى باقىلانىپ، تاۋلىك بويى كەزەكشىلىك ۇيىمداستىرىلىپ وتىرعانىن، ارىقتاردى، كانالداردى تازالاۋ جۇمىستارى جۇرگىزىلىپ جاتقانىن، جەدەل ارەكەت ەتۋ وتريادتارى قۇرىلىپ، قۇرامى، تەحنيكاسى ءازىر ەكەنىن بايانادادى.

تالعار، ىلە، قاراساي، جامبىل اۋداندارى دا سۋ كىرگەن اۋلالاردان سۋ شىعارۋ جۇمىستارىنىڭ جەدەل ۇيىمداستىرىلعانىن، ادام كۇشى مەن ارنايى تەحنيكا جۇمىلدىرىلعانىن ايتتى.

جيىن سوڭىندا ل. تۇرلاشوۆ:

- كوكتەمگى سۋ تاسقىنىنىڭ الدىن الۋ شارالارى - جىل سايىن جاسالاتىن جۇمىس، اۋدان، قالا اكىمدەرى ءۇشىن جاڭادان باستاپ جاتقان شارۋا ەمەس. سوندىقتان ءار اكىم ءوز وڭىرلەرىندەگى وزەن-كولدەردىڭ، ارىق، كانالداردىڭ جاعدايىن، ءقاۋىپ قاي تۇستان كەلۋى مۇمكىن، قاي جەرلەردى بەكىتۋ كەرەك دەگەن سياقتى جاعدايدى ابدەن مەڭگەرىپ الۋى كەرەك. وتريادتارداعى ادام كۇشى، تەحنيكالار مەن قۇرالدار – بارلىق رەسۋرستارىڭىز دايىن بولسىن. بارلىق سۋ قويمالارىنىڭ جاعدايىن باعامداپ، قورىتىندى دايىنداڭدار. وڭىردەگى گيدروتەحنيكالىق عيماراتتاردىڭ سۋ جيناۋ كولەمىن ايقىن ءبىلىپ وتىرىڭىزدار. ارىقتار مەن كانالداردى قاردان، قوقىستان تازالاۋ ءۇشىن جەر-جەردە ارنايى سەنبىلىكتەر ۇيىمداستىرۋ كەرەك. الداعى كۇندەردە كۇننىڭ جىلىناتىنى، جاۋىن-شاشىن بولاتىنى بولجانىپ وتىر. سوندىقتان سۋ تاسقىنى ءقاۋپىنىڭ الدىن الۋ جۇمىستارى كۇن تارتىبىنەن تۇسپەيدى. قايتا بۇل شارالاردى بارىنشا كۇشەيتۋىمىز كەرەك، - دەدى قورىتىندى سوزىندە.