جۋىردا ءبىلىم جانە عىلىم قىزمەتكەرلەرى كاسىپوداعى تالدىقورعان اۋماقتىق ۇيىمى، وبلىستىق ءبىلىم باسقارماسى جانە الماتى وبلىستىق كاسىپكەرلەر پالاتاسى 2018 - 2020 جىلدارعا ارنالعان الەۋمەتتىك ارىپتەستىك جونىندەگى ءۇشجاقتى كەلىسىمگە قول قويدى، دەپ حابارلايدى Qamshy.kz اقپارات اگەنتتىگى الماتى وبلىسى اكىمدىگىنىڭ باسپا ءسوز قىزمەتىنە سىلتەمە جاساي وتىرىپ.

بۇل كەلىسىمدە ءبىلىم جانە عىلىم قىزمەتكەرلەرىنىڭ الەۋمەتتىك جانە ەڭبەك قاتىناستارىن رەتتەۋ، الەۋمەتتىك تۇراقتىلىق پەن قوعامدىق كەلىسىمدى قامتاماسىز ەتۋ، جۇمىس بەرۋشى مەن جۇمىسكەردىڭ اراسىندا كەلىسسوزدەر جۇرگىزۋ، ەڭبەك داۋلارى تۋىنداعان جاعدايدا ولاردى دەر كەزىندە شەشۋگە جاردەمدەسۋ ماقساتى كوزدەلگەن.

قول قويۋ راسمىنە تالدىقورعان اۋماقتىق كاسىپوداق ۇيىمىنىڭ ءتوراعاسى س.ءابدىقادىروۆ، الماتى وبلىستىق ءبىلىم باسقارماسىنىڭ باسشىسى د.ءجۇنىسوۆ، الماتى وبلىستىق كاسىپكەرلەر پالاتاسى ديرەكتورىنىڭ ورىنباسارى ا.وڭعاربايەۆا، اۋداندىق قالالىق كاسىپوداق كوميتەتتەرىنىڭ ءتوراعالارى، اۋداندىق جانە قالالىق ءبىلىم بولىمدەرىنىڭ، ءبىلىم بەرۋ مەكەمەلەرىنىڭ باسشىلارى قاتىستى.

جيىندا اۋماقتىق كاسىپوداق ۇيىمىنىڭ زاڭگەرى اسەت تۇردىعۇلوۆ بايانداما جاساپ، الەۋمەتتىك ارىپتەستىك جونىندەگى كوميسسيانىڭ اتقارعان جۇمىسىنا توقتالدى. «بيىلعى جىلدان باستاپ قازاقستان رەسپۋبليكاسىنىڭ ەڭبەك كودەكسىنىڭ 147-بابىنا سايكەس كەلىسىمگە جۇمىس بەرۋشىلەردىڭ ۋاكىلەتتى وكىلدەرى، ياعني ءۇشىنشى تاراپ رەتىندە الماتى وبلىستىق كاسىپكەرلەر پالاتاسى قوسىلىپ وتىر. بۇل دا ءوز كەزەگىندە ءبىلىم بەرۋ سالاسى قىزمەتكەرلەرىنىڭ قۇقىقتارى مەن بوستاندىقتارىن زاڭ نەگىزىندە قورعاۋ جۇمىسىنا جاڭا سەرپىن بەرەدى دەپ ويلايمىز»، - دەدى ءوز سوزىندە ءا. تۇردىعۇلوۆ.