الماتى وبلىسى اكىمىنىڭ ءبىرىنشى ورىنباسارى ءلاززات تۇرلاشوۆتىڭ توراعالىعىمەن سەلەكتورلىق جيىن ءوتتى. ازاماتتاردىڭ مارتەبەسىن انىقتاۋ مەن ءوزىن ءوزى جۇمىسپەن قامتىعانداردى راسىمدەۋ جۇمىستارى تۋرالى ماسەلە قارالعان جيىندا وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ز. ءىلىمجانوۆا بايانداما جاسادى، دەپ حابارلايدى Qamshy.kz اقپارات اگەنتتىگى الماتى وبلىسى اكىمىنىڭ باسپا ءسوز قىزمەتىنە سىلتەمە جاساي وتىرىپ.

ز. ءىلىمجانوۆانىڭ ايتۋىنشا، وڭىردە بۇگىنگى كۇنى مارتەبەسى انىقتالماعان 554،7 مىڭ ادام بار. ال مارتەبەسى بەرىلگەن ازاماتتار سانى 537،8 مىڭ ادامدى قۇراپ وتىر. مەملەكەتتىك ورگانداردىڭ اقپاراتتىق جۇيەلەرىندە 131 مىڭ ادام وزەكتەندىرىلگەن.

جالپى ازاماتتاردىڭ مارتەبەسىن انىقتاۋ بويىنشا وبلىستىڭ كورسەتكىشى ءالى دە تىڭعىلىقتى جۇمىس ىستەۋدى تالاپ ەتەدى. بۇل ىستە جاۋاپكەرشىلىك ارتىلىپ وتىرعان مەملەكەتتىك مەكەمەلەردىڭ ىشىندە «مىندەتتى زەينەتاقى تولەمدەرىنسىز جۇمىس ىستەپ جاتقاندار» ساناتىن جانە «ءوزىن ءوزى جۇمىسپەن قامتۋشىلار» كاتەگورياسى بويىنشا مەملەكەتتىك كىرىس دەپارتامەنتى، «قونىس اۋدارعاندار» ساناتىمەن جۇمىس ىستەۋگە ءتيىس كوشى-قون پوليسياسى باسقارماسىنىڭ جۇرگىزىپ جاتقان جۇمىستارى ازىرگە تولىققاندى ناتيجەگە جەتپەي، نەبارى 15،5 – 40،0 %ء-تى قۇراپ وتىر.

وسى ورايدا وبلىس بويىنشا وزەكتەندىرۋ ماسەلەسىندە ارتقا تارتىپ وتىرعان اۋداندار دا اتاپ ءوتىلدى. ناقتىراق ايتقاندا، جامبىل، ەڭبەكشىقازاق، پانفيلوۆ، ۇيعىر، قاراتال، ەسكەلدى، قاراساي اۋداندارىندا جۇمىس باياۋ جۇرۋدە. ال جۇمىسپەن قامتۋ باعدارلاماسىنا جۇمىسسىزدار مەن ءوزىن ءوزى ناتيجەسىز جۇمىسپەن قامتىعاندار اراسىنان ءبىر دە ءبىر ادامدى ەنگىزبەگەن ەڭبەكشىقازاق، ەسكەلدى، جامبىل، ىلە، كەربۇلاق اۋداندارىنىڭ جۇمىسى سىنعا الىندى.

وزەكتەندىرۋ ماسەلەسىنە بايلانىستى وبلىستىق مەملەكەتتىك كىرىستەر دەپارتامەنتىنىڭ، ءبىلىم باسقارماسىنىڭ، كوشى-قون دەپارتامەنتىنىڭ، ادىلەت دەپارتامەنتىنىڭ باسشىلارى جانە اۋدان، قالا اكىمدەرى حابارلاما جاساپ، قابىلدانعان شارالار مەن الداعى جوسپارلار تۋرالى ايتتى.

وبلىس اكىمىنىڭ ءبىرىنشى ورىنباسارى ل. تۇرلاشوۆ مەملەكەتتىك ورگاندار مەن جەرگىلىكتى اتقارۋشى ورگانداردىڭ بۇل باعىتتاعى جۇمىسىنا كوڭىلى تولمايتىنىن، ءبىر اپتا ۋاقىتتىڭ ىشىندە ازاماتتاردىڭ مارتەبەسىن انىقتاۋ ءىسىن ىلگەرىلەتۋدى اياقتاۋدى تاپسىردى.

- مىندەتتى الەۋمەتتىك مەديسينالىق ساقتاندىرۋ جۇيەسىنىڭ ەنگىزىلۋىنە بايلانىستى جۇرگىزىلىپ جاتقان وزەكتەندىرۋ، مارتەبەسىن انىقتاۋ جۇمىستارى دەر كەزىندە جانە ساپالى اتقارىلۋعا ءتيىس. جەتى كۇن ىشىندە اۋدان، قالا اكىمدەرى، مەملەكەتتىك ورگاندار، وزدەرىڭىزگە ارتىلعان جاۋاپكەرشىلىكتى ابىرويمەن ورىنداپ، كورنەكتى ناتيجەگە جەتكىزۋدى تاپسىرامىن، - دەدى ل. تۇرلاشوۆ.