ارۋجان ساين ءوزىنىڭ Facebook پاراقشاسىنا 7 جاستاعى بالانىڭ ىسىنە قاتىستى دەرەكتەردى جاريالادى، دەپ حابارلايدى Qamshy.kz اقپارات اگەنتتىگى. 

ارۋجان ساين زاڭعا سايكەس،  سوتقا دەيىنگى تەرگەۋ جانە سوت ەرەسەكتەر مەن بالالارعا جاسالعان زورلىق ارەكەتتەرىنە قاتىستى بولعاندىقتان جابىق ءوتىپ جاتقانىن جازدى.

«كەشە ق ر باس پروكۋراتۋرادا تەرگەۋ جۇمىستارى جۇرگىزىلدى. بارلىعى جابىق رەجيمدە ءوتىپ جاتىر. تەرگەۋ جۇمىستارى تۋرالى كەز كەلگەن اقپاراتتى تەك پروكۋراتۋرا وكىلى عانا جاريالاي الادى» دەپ جازدى قوعام قايراتكەرى.

بۇعان دەيىن بالانىڭ اجەسىمەن بايلانىستا قيىندىقتار بولعان ەدى. ارۋجان سايننىڭ ايتۋىنشا، بالانىڭ اناسى بالانىڭ اجەسىمەن بايلانىستا. اناسى مەن بالاسىنىڭ قايدا ەكەنىن جاريالاۋعا تىيىم سالىنعان. سونىمەن قاتار، ارۋجان ساين بالا مەن ونىڭ وتباسىن قولداپ وتىرعانداردىڭ بارلىعىنا العىسىن ءبىلدىردى. قايىرىمدى ادامدار وتباسى مۇشەلەرى مەن ولاردىڭ وكىلدەرىنىڭ جول اقىسىن تولەپ وتىرعاندارىن جازدى.

«ماڭىزدى! زاڭگەردىڭ كومەگى مەن وتباسىنىڭ زاڭدى وكىلدەرىنىڭ قىزمەتى ءۇشىن ەشكىم  اقشا جيناپ جاتقان جوق» دەيدى ارۋجان ساين.

بۇعان دەيىن دە ارۋجان ساين 7 جاستاعى بالانىڭ ىسىنە قاتىستى تىڭ دەرەكتەردى جاريالاعان. 

ايتا كەتەيىك، ءبىلىم جانە عىلىم ۆيسە-مينيسترى بيبىگۇل اسىلوۆا 7 جاستاعى وقو تۇرعىنىنا قاتىستى سوت-مەديسينالىق ساراپتاما 2018 جىلدىڭ اقپان ايىندا جاسالعانىن حابارلاعان. 

ساراپتامانىڭ اقپاندا جۇرگىزىلگەنىن ق ر بعم بالالار قۇقىعىن قورعاۋ كوميتەتىنىڭ ءتوراعاسى نۇربەك ورشىبەكوۆ تە راستاعان.

«العاشقى ءوتىنىش 15 اقپاندا كەلدى. سول ۋاقىتتان بەرى ءبىزدىڭ كوميتەت وقو ءبىلىم دەپارتامەنتىمەن بايلانىستا. ءوتىنىش ءبىلىم باسقارماسىنان كەلىپ ءتۇستى» دەدى اسىلوۆا.

ۆيسە-مينيستر ۆەدومستۆانىڭ كەش اقپاراتتانعانى ءبىلىم دەپارتامەنتىنىڭ جاۋاپكەرشىلىگىندە ەكەنىن ايتتى.

«بارلىق ساراپتاما جۇرگىزىلىپ بولعاننان كەيىن بۇل ماسەلەنى جاي قالدىرمايمىز»، - دەدى ۆيسە-مينيستر.