وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ۇلىستىڭ ۇلى كۇنى - ناۋرىز مەرەكەسى قارساڭىندا سارىاعاش اۋدانى اباي ەلدىمەكەنىندە بولىپ، ەل اعالارىمەن، اۋىل تۇرعىندارىمەن كەزدەستى، دەپ حابارلايدى Qamshy.kz اقپارات اگەنتتىگى وڭتۇستىك قازاقستان وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.
باسقوسۋدا ءوڭىر باسشىسى ناۋرىز - تاتۋلىققا باستايتىن مەيرام ەكەنىن ايتا كەلە، تۇرعىنداردى ىنتىماقپەن بىرلەسە ەڭبەك ەتۋگە شاقىردى.
«مەملەكەت رەتىندە قالىپتاسىپ، تاۋەلسىزدىككە قول جەتكىزگەنىنە شيرەك عاسىر عانا بولعان ەلىمىزگە تاتۋلىق پەن ىنتىماق وتە قاجەت. سارىاعاش شەكارالىق ايماقتا ورنالاسقان ستراتەگيالىق اۋدان. مۇنداعى حالىقتىڭ ءوسىمى وتە جوعارى. سوندىقتان دا ەلدىڭ الەۋمەتتىك جاعدايىن جاقسارتۋ ماقساتىندا ەلباسىمىزدىڭ قولداۋىمەن جۇيەلى جۇمىستار اتقارىلۋدا. مۇنىڭ بارىنە ەلدەگى تۇراقتىلىق پەن بىرلىكتىڭ ارقاسىندا قول جەتكىزىپ وتىرمىز. وسى جەتىستىكتەرىمىزدى ەل اعالارى مەن تۇرعىندارى قولداپ، قۋاتتاپ وتىرسا، بۇدان دا جوعارى جەتىستىكتەرگە قول جەتكىزۋگە مۇمكىندىگىمىز مول»، - دەدى جانسەيىت قانسەيىت ۇلى.
سونداي-اق، وبلىس اكىمى كەزدەسۋ بارىسىندا اباي اۋىلىندا بولعان وقيعاعا دا توقتالدى. بۇل ماسەلەمەن ءتيىستى قۇزىرلى ورگانداردىڭ اينالىسىپ جاتقانىن ايتا كەلە، بولاشاقتا مۇنداي جاعدايلاردىڭ ورىن الماۋى ءۇشىن ەل اعالارى، اۋىل بيلەرى بىرىگىپ، جۇيەلى تۇردە جۇمىس ىستەۋى كەرەكتىنىن مالىمدەدى.
كەزدەسۋدە ءسوز العان اۋىل ءبيى م.ىلەسبەكوۆ ەل ىشىندەگى ءتۇرلى ماسەلەلەردىڭ دەر كەزىندە شەشىلۋىنە ەل بولىپ اتسالىسىپ، جۇمىلۋ قاجەتتىگىن جەتكىزدى.
جيىن سوڭىندا وبلىس باسشىسى سارىاعاشتىق تۇرعىنداردى ناۋرىز مەرەكەسىمەن قۇتتىقتاپ، ەلىمىزدە تىنىشتىق پەن بەرەكەنىڭ سالتانات قۇرۋىن تىلەدى.
