22 ناۋرىز – ۇلىستىڭ ۇلى كۇنى!  كۇن مەن ءتۇننىڭ تەڭەلىپ، سامارقاننىڭ كوك تاسى ەرىپ، جەر جاھانعا جىلۋلىق تاراپ، كوكتەم كەلگەنىن حابارلاپ تۇراتىن مەيرامدى الماتى قالاسىنىڭ تۇرعىندارى جوعارى دەڭگەيدە اتاپ ءوتىپ جاتىر.

استانا الاڭىنا 6 كيىز ءۇي تىگىلىپ، 14 ينستاللياسيا ورناتىلدى. بالالار جانە سپورت ورىندارى، ورتا ازيانىڭ قولدانبالى ونەر شەبەرلەرىنىڭ شەبەرلىك سىنىپتارى ءۇشىن 17 ايماق، ساۋدا شاتىرلارى، فۋدكورتتار، 1200 ورىندى كورەرمەندەر تريبۋناسى ۇيىمداستىرىلدى.

ۇلكەن مەرەكەلىك كونسەرتتە «مۋزارت»، «دوسمۇقاسان» توبى ، روزا رىمبايەۆا جانە وزگە دە 500-دەن استام ونەر ادامدارى  ونەر كورسەتتى.

الاڭدا ۇلتتىق قولونەردى دارىپتەيتىن كورمەلەر ۇيىمداستىرىلعان. تەكەمەت، سىرماق، كيىزدەن جاسالعان توسەنىشتەر ويۋمەن كومكەرىلىپ، ءداستۇرىمىزدى جاڭعىرتىپ تۇر. 

سونىمەن قاتار ون ساۋساعىنان  ونەر تامعان شەبەرلەر ۇلتتىق بۇيىمداردى كوپشىلىك الدىندا  جاساپ، بىلەزىك، سىرعا، ساقينا جاساۋدىڭ سىرلارىمەن بولىسۋدە.

كورمەگە قولدان ويىپ جاسالعان ءتۇرلى مۇسىنشەلەر قويىلعان.  شاڭىراق، دومبىرا، قوبىز سەكىلدى ۇلتتىق قۇندىلىعىمىزدى دارىپتەيتىن مۇسىنشىلەرگە حالىقتىڭ قىزىعۋشىلىعى دا جوعارى. 

ال ناۋرىز مەيرامىنىڭ بيىلعى لوگوتيپىنە كەلەر بولساق، «ناۋرىز 2018» ءسوزى قابىلدانعان لاتىن قارپىمەن جازىلعان.

مەرەكە پانفيلوۆ جانە جىبەك جولى كوشەلەرىندە دە ءوتىپ جاتىر. بۇل ماڭدا قۇراق كورپە تىگىلىپ، كيىز باسۋدىڭ جولدارى دا ۇيرەتىلىپ جاتىر. قولدان جاسالعان تىماق، ساۋكەلە سەكىلدى باسكيىمدەر مەن شاپان، ويالى كويلەكتەر ساتىلىمعا شىققان. 

سونىمەن قاتار كىتاپتار كورمەسى ۇيىمداستىرىلىپ، جاستار اراسىندا سپورتتىق بايقاۋلار وتۋدە. 

ال الاڭ ماڭىنداعى جارمەڭكەدەن ۇلتتىق ناقىشتاعى ورامالدار مەن سومكەلەر، اشەكەي بۇيىم مەن تۇرمىستىق قولدانىستاعى زاتتاردى تابا الاسىز. 

كلاسسيكا سۇيەر قاۋىمعا دا جاعداي جاسالعان. جاندى داۋىستا مۋزىكالىق اسپاپتاردىڭ سۇيەمەلدەۋىمەن شاعىن كونسەرتتەر ۇيىمداستىرىلعان.

ەسكە سالا كەتسەك، الماتى قالاسى اكىمدىگى بيىل ناۋرىز مەيرامى ءبىر اي بويى تويلاناتىنىن حابارلادى. 

24 ناۋرىزدا جىبەك جولى كوشەسى بويىنداعى ساحنادا «ناۋرىز-دۋمان» وتەدى، مۇندا ساعات 11:00 دەن 17:00-گە دەيىن ق ر سۋرەتشىلەر وداعى شەبەرلەرى مەن جاس سۋرەتشىلەردىڭ بىرىككەن پلەنەرى ۇيىمداستىرىلادى، ساعات 19:00-21:00 ارالىعىندا – «Open air cinema» وتەدى، ياعني ش. ايمانوۆتىڭ رەتروسپەكتيۆتى كينولارى مەن قازاقستاننىڭ ماتەريالدى ەمەس مادەني مۇراسى بولىپ تابىلاتىن «قىز جيبەك»، «ورتەكە»، «كيىز باسۋ»، «قورقىت اتا مۇراسى: ەپيكالىق مادەنيەت جانە مۋزىكا»، «قازاقتىڭ زەرگەرلىك بۇيىمدارى»، «كەستە»، «اسىق اتۋ» جانە باسقا فيلمدەر كورسەتىلەدى.

25 ناۋرىزدا ساعات 11:00-13:00 ارالىعىندا الاڭدا بۋككروسسينگ — مادەني مۇرا مەن كىتاپ كورمەسى ۇيىمداستىرىلادى. ساعات 14:00-17:00 ارالىعىندا- «كىتاپ Fest»، ساعات 19:00-21:00 ارالىعىندا – «Open air cinema» وتەدى، بۇلاردا «كەراميكا ونەرى» (وزبەكستان)، «جىبەك توقۋ» (وزبەكستان)، «اسپالى ارقانمەن ءجۇرۋ» (وزبەكستان)، «كوك ءبورى» (قرىعىزستان)، «سالت- ءداستۇر اندەرى» (قىرعىزستان)، «مونعولدىڭ ءداستۇرلى ۇستەل ويىندارى» (مونعوليا)، «مورينحۋر — مونعولدىڭ قىل پەرنەلى اسپابى» (مونعوليا)، «سالت- ءداستۇر اندەرى» (تاجىكستان) جانە باسقالارى ۇيىمداستىرىلادى.