نازاربايەۆ رەسمي ساپارمەن بىرىككەن اراب امىرلىكتەرىنە باردى. قارسى الۋ راسىمىنەن سوڭ نۇرسۇلتان نازاربايەۆ ءابۋ-دابيدىڭ تاق مۇراگەرى، بىرىككەن اراب امىرلىكتەرى قارۋلى كۇشتەرىنىڭ جوعارعى باس قولباسشىسىنىڭ ورىنباسارى، شەيح مۇحاممەد بەن زايد ءال ناھايانمەن كەڭەيتىلگەن قۇرامدا كەلىسسوز جۇرگىزدى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساي وتىرىپ.
قازاقستان پرەزيدەنتى قوناقجايلىق كورسەتكەنى ءۇشىن مۇحاممەد بەن زايد ءال ناھايانعا ريزاشىلىق ءبىلدىردى.
«مەنىڭ رەسمي ساپارىمنىڭ بىرىككەن اراب امىرلىكتەرىنىڭ نەگىزىن قالاعان شەيح زايد بەن سۇلتان ءال ناھاياننىڭ 100 جىلدىعىمەن تۇسپا-تۇس كەلۋىنىڭ سيمۆولدىق ءمانى بار. مەن ءۇشىن ءسىزدىڭ اكەڭىزبەن تانىس بولعانىم – زور مارتەبە»، – دەدى مەملەكەت باسشىسى.
نۇرسۇلتان نازاربايەۆ باۋىرلاس قارىم-قاتىناستار مەن تابىستى كەزدەسۋلەر ەكى ەل اراسىنداعى بايلانىستاردىڭ دامۋىنا تىڭ سەرپىن بەرەتىنىن اتاپ ءوتتى.
«ءوزارا ۋاعدالاستىقتاردى ىسكە اسىرۋدىڭ ارقاسىندا تەك 2017 جىلى ساۋدا-ساتتىق كولەمى 2 ەسە ءوسىپ، 374 ميلليون دوللاردان 643 ميلليون دوللارعا دەيىن جەتتى. ال 2015 جىلدان باستاپ بۇل كورسەتكىش 6 ەسە ارتتى»، – دەدى قازاقستان پرەزيدەنتى.
نۇرسۇلتان نازاربايەۆ ۆيزاسىز رەجىم ەنگىزۋ ەكى ەل اراسىنداعى قارىم-قاتىناستارعا وڭ اسەر ەتەتىنىنە نازار اۋدارىپ، تاراپتار ينۆەستيسيالاردى قورعاۋ، عارىش تەحنولوگيالارى، سۋ ەنەرگەتيكاسى، مۇناي حيمياسى، اۋىل شارۋاشىلىعى جانە سيفرلاندىرۋ سالالارىنداعى ىنتىماقتاستىقتى ءارى قاراي ىلگەرىلەتۋگە مۇددەلى ەكەنىن اتاپ ءوتتى.
سوڭىندا قازاقستان پرەزيدەنتى بىرىككەن اراب امىرلىكتەرىنىڭ پرەزيدەنتى شەيح حاليف بەن زايد ءال ناھايانعا دەگەن نيەتتەستىگىن ءبىلدىرىپ، تاق مۇراگەرى مۇحاممەد بەن زايد ءال ناھاياندى قازاقستانعا رەسمي ساپارمەن كەلۋگە شاقىردى.
مۇحاممەد بەن زايد ءال ناھايان رەسمي ساپارمەن كەلگەنى ءۇشىن نۇرسۇلتان نازاربايەۆقا العىس ايتتى.
«حالقىمنىڭ جانە جەكە ءوزىمنىڭ اتىنان سىزگە بىرىككەن اراب امىرلىكتەرى جەرىنە كەلگەنىڭىز ءۇشىن ريزاشىلىق بىلدىرەمىن. ساپارىڭىز ءساتتى بولادى دەپ سەنەمىن. ءبىز بۇگىن ءبىرقاتار ماڭىزدى ەكىجاقتى قۇجاتتارعا قول قويامىز. جان-جاقتى ىنتىماقتاستىققا دايىن ەكەنىمىزدى ايتقىم كەلەدى»، – دەدى مۇحاممەد بەن زايد ءال ناھايان.
رەسمي ساپار بارىسىندا تاراپتار اراسىندا مىناداي قۇجاتتارعا قول قويىلدى:
- قازاقستان رەسپۋبليكاسىنىڭ ۇكىمەتى مەن بىرىككەن اراب امىرلىكتەرىنىڭ ۇكىمەتى اراسىنداعى ينۆەستيسيالاردى كوتەرمەلەۋ جانە ءوزارا قورعاۋ تۋرالى كەلىسىم؛
- اتىراۋ وبلىسىندا ينتەگراسيالانعان گاز-حيميا كەشەنىن (پوليەتيلەن ءوندىرىسى) سالۋعا قاتىستى ىنتىماقتاستىقتىڭ نەگىزگى شارتتارى تۋرالى مەموراندۋم؛
- اتىراۋ وبلىسىنداعى پوليپروپيلەن وندىرەتىن زاۋىت جۇمىسىنا قاتىسۋ ۇلەسىن ساتىپ الۋعا بايلانىستى ءوزارا تۇسىنىستىك تۋرالى مەموراندۋم؛
- "اقتاۋ تەڭىز پورتى" ارنايى ەكونوميكالىق ايماعى اكسيونەرلىك قوعامىنىڭ 49% اكسياسىن ساتىپ الۋدىڭ نەگىزگى قاعيداتتارى تۋرالى نەگىزدەمەلىك كەلىسىم؛
- "DP World" كومپانياسىنىڭ "قورعاس – شىعىس قاقپاسى" ارنايى ەكونوميكالىق ايماعىنىڭ باسقارۋشى كومپانياسى" اكسيونەرلىك قوعامىنىڭ كاپيتالىنا قاتىسۋىنىڭ نەگىزگى قاعيداتتارى تۋرالى نەگىزدەمەلىك كەلىسىم؛
- دۋبايداعى "ەكسپو-2020" دۇنيەجۇزىلىك كورمەسىنە قاتىسۋ تۋرالى شارت.
