گرۋزيانىڭ ادجاريا تاۋلى ايماعىن قىزىل قار باسىپ قالدى، دەپ جازادى Qamshy.kz اقپارات اگەنتتىگى شەتەلدىك باق-تىڭ دەرەگىن نەگىزگە الا وتىرىپ. تابيعاتتىڭ بۇل توسىن قۇبىلىسى سولتۇستىك افريكا مەن تاياۋ شىعىس ەلدەرىندە بولعان شاڭدى داۋىل سالدارىنان بولعان.
ەكولوگ مامانداردىڭ ايتۋى بويىنشا، جەرورتا تەڭىزىنەن سوققان جەل گرۋزياعا دەيىن جەتكەن. مۇنداي سيپاتتاعى جاۋىن-شاشىن تەك گرۋزيادا عانا ەمەس رەسەيدىڭ كراسنودار ولكەسىندە بايقالىپتى. ۇساق شاڭدار قارمەن بىرگە عانا تۇسپەگەن، سونداي-اق گرۋزيانىڭ كەيبىر جەرلەرىندە سارى قۇم ارالاس جاۋىن دا جاۋعان. سينوپتيكتەر قىزىل قار جانە شاڭ ارالاس جاۋىن-شاشىن ادامنىڭ دەنساۋلىعىنا نەمەسە قورشاعان ورتاعا ءقاۋىپتى ەمەس ەكەندىگىن ايتادى.
