تالدىقورعاننان شىققان تانىمال ءانشى الىشەر قايرات ۇلى ءوزىنىڭ تۋعان جەرىندە «رۋحاني جاڭعىرۋ» اتتى جاڭا ءانىنىڭ تۇساۋىن كەستى. ونەر يەسىنىڭ شىعارماشىلىعىن قولداۋعا وقۋشىلار مەن ستۋدەنتتەر جانە قالا اكىمىنىڭ ورىنباسارى مارلەن كولبايەۆ ارنايى كەلدى.
شاراعا، سونىمەن قاتار، كاسىپكەر قايرات ماتايەۆ، قالا جاستارى مەن تۇرعىندار قاتىستى.
كەزدەسۋ بارىسىندا الىشەردىڭ اكەسى قايرات ءسوز الىپ بەينەباياننىڭ ءتۇسىرىلۋى مەن ءوز كاسىبىن ءسوز ەتتى.
«قازاقستان رەسپۋبليكاسى پرەزيدەنتىنىڭ حالىققا جولداۋىنداعى ماڭىزدىنىڭ ءبىرى ول - اۋىل شارۋاشىلىعى سالاسى.وسىعان وراي قازىرگى ۋاقىتتا اۋىل شارۋاشىلىعىنىڭ دامۋىنا بارلىق جاعدايلار جاسالعان. سونىڭ ارقاسىندا ءبىز ءوز كاسىبىمىزدى كەڭەيتىپ، دوڭگەلەتىپ وتىرمىز. ال الىشەردىڭ بەينەبايانى وتانىمىزعا رۋحاني ازىق بەرەدى دەپ ويلايمىن»، - دەدى ول ءوز سوزىندە.
جينالعان جۇرتشىلىق انشىگە قۇتتى بولسىن ايتىپ، ونەر الەمىندە شىعار شىڭدارىڭ كوپ بولسىن دەپ تىلەكتەرىن اقتاردى. اتالمىش شارانىڭ شىمىلدىعى ءانشىنىڭ جاڭا انىمەن ءتۇرىلدى. قوناقتار ونەر يەسىنە قولداۋ كورسەتىپ، وزدەرىنىڭ ىستىق ىقىلاسىن ءبىلدىردى.
ايتالىق، قازىرگى زاماندا ءانشىنىڭ كاسىبي شەبەرلىگىن بىلاي قويعاندا، ءبىر ءان شىعارۋدىڭ ءوزى ۇلكەن قارجى مەن مول ەڭبەكتى تالاپ ەتەدى. وسى ورايدا، جاڭا تۋىندىنىڭ جارىق كورۋىنە كاسىپكەر قايرات ماتايەۆ سەبەپكەر بولعان. ءاننىڭ تۇساۋكەسەر راسىمىندە العاشقى ءسوز دەمەۋشىلىك تانىتقان ازاماتقا بەرىلدى.
«ەلباسىنىڭ «بولاشاققا باعدار: رۋحاني جاڭعىرۋ» ماقالاسىن جاستار اراسىندا ناسيحاتتاپ، ولاردىڭ قىزىعۋشىلىعىن ارتتىرۋ ماقساتىندا وسى ءاندى جارىققا شىعارىپ، بەينەبايان تۇسىردىك. ەلىمىزدىڭ ۇلتتىق ءسالت-داستۇرىن، رۋحاني قازىناسىن ناسيحاتتاۋعا باعىتتالعان وسىنداي شارالار كوپ بولسىن. جاستاردى رۋحاني مادەنيەتىمىزدى دامىتۋعا شاقىرامىن»، — دەدى قايرات ماتايەۆ.
كەلەسى كەزەكتە ءسوز تىزگىنىن قالا اكىمىنىڭ ورىنباسارى مارلەن كولبايەۆ الدى. ول جاس ونەر يەسىنە جانە «رۋحاني جاڭعىرۋ» ءانىنىڭ شىعۋىنا كومەك كورسەتكەن كاسىپكەرگە ريزاشىلىعىن ءبىلدىردى. جاڭا تۋىندىنىڭ بۇدان دا ۇلكەن ساحنالاردا شىرقالۋىنا تىلەكتەس ەكەنىن ايتىپ، قولدايتىندىعىن جەتكىزدى.
ال الىشەر قايرات ۇلى بولسا، ءوز كەزەگىندە «رۋحاني جاڭعىرۋ» اتتى بەينەبايانىن جاندى داۋىستا ورىنداپ، كورەرمەن قوشەمەتىنە بولەندى.
«ءبىز بۇگىندە كۇندەلىكتى تىرلىكتىڭ قامىمەن جۇرەمىز دەپ، ءوزىمىزدىڭ رۋحاني جان دۇنيەمىزدى السىرەتىپ العان سياقتىمىز. ايتپاعىم، جۇرەگى ەلىم دەپ سوققان ءاربىر ازامات ءوزىنىڭ وتانىنا، وتكەن تاريحىنا قۇرمەتپەن قاراۋى ءتيىس. ارتىنان ەرىپ كەلە جاتقان وسكەلەڭ ۇرپاققا ۇلتتىق قۇندىلىقتارىمىزدى ناسيحاتتاۋى كەرەك دەپ ويلايمىن. ءبىز جاستاردىڭ رۋحىن وياتىپ، وتانسۇيگىشتىككە تاربيەلەۋ ماقساتىندا وسى ءاندى جارىققا شىعاردىق. حالىق جىلى قابىلدايدى دەگەن ۇمىتتەمىن»، — دەيدى قازاق ەستراداسىنىڭ جاس ءانشىسى الىشەر قايرات ۇلى.
ايتا كەتەيىك، جاڭا ءاننىڭ اۋەنىن ەلىمىزگە تانىمال سازگەر ارمان دۇيسەنوۆ دايىنداسا، ءسوزىن بەلگىلى ايتىسكەر اقىن رينات زايىتوۆ جازىپ شىققان.
شارا سوڭىندا قوناقتار بەينەباياننىڭ مازمۇنى مەن كوركەمدىك جاعى ۇيلەسىم تاۋىپ، كوڭىلدەن شىققانىن اتاپ، العىستارىن ءبىلدىرىپ تارقاستى.
