تالدىقورعاندىق فوتوگراف ءارى سۋرەتشى جەڭىس ىسقاباي ۇلتتىق ناقىشتا ويىنشىقتار قۇراستىرۋدا.

جەڭىس ىسقاباي بالا كەزىنەن اعاشتان ءتۇيىن ءتۇيىپ ءتۇرلى بۇيىمدار جاساۋعا اۋەس بولدى. ءقازىر دە نەگىزى كاسىبىنەن قولى بوساي قالعان ساتتە شەبەرحاناسىنا بارىپ، اعاش جونىپ، شەبەرلىك ونەرىن شىڭداۋعا كىرىسىپ كەتەدى. ءقازىر اعاش ۇستاسى ويىنشىق جىلقىنىڭ بىرنەشە ءتۇرىن قۇراستىردى.

ال ونىڭ بۇل جوباعا كىرىسۋىنە ءوز بالالارىنىڭ دەنساۋلىعىنا الاڭداۋشىلىق سەبەپ بولدى. ءۇش بالانىڭ اكەسى سوڭعى كەزدەرى بالالارىنىڭ تەلەديدار كورسە دۇرىس وتىرمايتىنىن بايقاعان. سونداي-اق وزگە دە بالالار سياقتى سمارتفونعا تەلمىرىپ، كومپيۋتەر ويىندارىنا تىم بەرىلەتىنىن اڭعارعان. بۇل ولاردىڭ فيزيكالىق دامۋىنا كەرى اسەرىن تيگىزەدى. سوندىقتان ولاردى الداندىراتىن ءبىر ويىنشىق قۇراستارعىسى كەلگەنىن ايتادى.

شەبەر الدىمەن بولاشاق تۋىندىسىن قاعازعا سالدى. سوسىن كومپيۋتەرگە ءتۇسىرىپ، ولشەمدەرىن پىسىقتادى. كەرەكتى ماتەريالدارىن الىپ، شەبەرحانادا العاشقى ويىنشىعىن جاساپ شىقتى. بالا وعان وتىرعاندا ءوزىن اتقا مىنگەندەي سەزىنەدى. ارى-بەرىى تەربەلگەندە بۇكىل بۇلشىق ەتتەرى قوزعالادى. ياعني، ويىن بالاسى ويىنشىق جىلقىعا وتىرىپ تەلەديدار كورسە دە، ويناسا دا ۇنەمى قوزعالىپ فيزيكالىق جاتتىعۋلار ورىندايدى، - دەيدى جەڭىس ىسقاباي.

اعاش شەبەرى ەندى-ەندى وتىرا باستاعان، بەلى قاتايىپ كەلە جاتقان 6-7 ايلىق بالالارعا ارناپ قۇلىنشاق قۇراستىردى. ال شىبىق سىندىرىپ جىلقى ەتىپ وينايتىن 4-5 جاستاعىلارعا تاعى ءبىر تۇلپار جاسادى.

ەڭ باستىسى ونىڭ بۇيىمدارى ەكولوگيالىق تازا زاتتاردان جاسالعان. جەڭىس ىسقاباي بۇل ويىنشىقتارىمەن بايىپ كەتۋدى ماقسات ەتىپ وتىرعان جوق. ول ءار قازاقتىڭ بالاسى جىلقى قۇمار بولىپ وسكەنىن قالايدى.