ق ر مادەنيەت جانە سپورت ءمينيسترى ارىستانبەك مۇحامەدي ۇلى تىلدەردى دامىتۋدىڭ مەملەكەتتىك باعدارلاماسى قالاي جۇزەگە اسىپ جاتقانىن باياندادى، دەپ حابارلايدى Sputnik قازاقستان-عا سىلتەمە بەرىپ Qamshy.kz اقپارات اگەنتتىگى.

ءمينيستردىڭ ايتۋىنشا، جىل سايىنعى زەرتتەۋ قازاقستاندىقتاردىڭ دەنى مەملەكەتتىك ءتىلدى مەڭگەرگەنىن كورسەتكەن.

 "2017 جىلى مەملەكەتتىك ءتىلدى مەڭگەرگەن تۇرعىندار ۇلەسى 83،1 پايىزدى قۇرادى، ال 2016 جىلى ودان دا از بولاتىن. ءۇش ءتىلدى مەڭگەرگەن ەرەسەك تۇرعىنداردىڭ ۇلەسى 22،3 پايىزدى قۇرادى. ءۇش ءتىلدى مەڭگەرۋ اياسىندا مەملەكەتتىك قىزمەتشىلەردى وقىتۋدى ۇيىمداستىرۋ قىزمەتىن جۇزەگە اسىرۋ ماقساتىندا ق ر پرەزيدەنتى جانىنداعى مەملەكەتتىك باسقارۋ اكادەمياسىمەن ءوزارا تۇسىنىستىك تۋرالى كەلىسىمگە قول قويىلدى"، — دەدى مۇحامەدي ۇلى.

مينيستر بىلتىر جوبا اياسىندا ورتالىق اتقارۋشى ورگانداردا مەملەكەتتىك ءتىلدى وقىتۋ كۋرسىنا 610 ادام قاتىسقانىن اتاپ ءوتتى. سونىمەن قاتار رەسپۋبليكادا 89 ايماقتىق مەملەكەتتىك ءتىلدى وقىتۋ ورتالىعى جۇمىس ىستەيدى.

"وقىتۋ ورتالىقتارى ءتىل تۋرالى زاڭعا سايكەس قازاقستان ازاماتتارىنىڭ مەملەكەتتىك ءتىلدى مەڭگەرۋى ماقساتىندا وقىتۋ كۋرستارىن ۇيىمداستىرادى. وسى ماقساتتا 2017 جىلى ءتىل وقىتۋ ورتالىقتارىندا 58 مىڭ 348 ادام مەملەكەتتىك ءتىل وقىتۋ كۋرستارىنان ءوتتى. قازتەست جۇيەسى نەگىزىندە قازاق ءتىلىن ءبىلۋ دەڭگەيىن انىقتاۋ ماقساتىندا 2017 جىلى تەستىلەۋدەن وتكەندەردىڭ جالپى سانى – 94 458 ادام، ونىڭ ىشىندە مەملەكەتتىك قىزمەتشىلەر سانى – 22837 ادام"، — دەدى مينيستر.