باتىس قازاقستان وبلىسىندا اۋا رايى كۇرت وزگەرىپ، اينالا مۇز بولىپ قاتىپ، جاس اقبوكەندەر قار استىنان قورەگىن قازىپ الا الماي قىرىلىپ جاتىر، دەپ حابارلايدى Qamshy.kz اقپارات اگەنتتىگى "موي گورودقا" سىلتەمە جاساپ.
ورمان شارۋاشىلىعى مەن جانۋارلار الەمى ايماقتىق ينسپەكسياسىنىڭ قىزمەتكەرلەرى 21-22 ناۋرىزدا اقجايىق اۋدانى چاپايەۆو اۋىلى توڭىرەگىندە اقبوكەندەرگە قولايسىز احۋال تۋىنداعانىن ايتادى.
"كۇن كۇرت جىلىنىپ، كەيىن قايتا اياز تۇسكەن سوڭ، اينالا مۇز بولىپ قاتىپ، جاس اقبوكەندەر قار استىنان قورەگىن قازىپ الا المايدى. سونىڭ سالدارىنان ەكى كۇن ىشىندە جەتى باس اقبوكەن قىرىلعان"، — دەدى وبلىستىڭ ورمان شارۋاشىلىعى جانە جانۋارلار الەمى ايماقتىق ينسپەكسياسىنىڭ باسشىسى قايرات قاتەشيەۆ.
ورمانشىلار جانۋارلارعا ءشوپ بەرىپ كورگەنىمەن، اقبوكەندەر جاقىندامايدى ەكەن.
"سونىمەن بىرگە قامىسقا قاراي باستايتىن سوقپاق سالىندى، ءالى قۇرىپ اشىققان اقبوكەندەر جايىلىمدارعا جەتىپ، سول جەردە قورەكتەنىپ ءجۇر"، — دەدى ينسپەكسيا باسشىسى.
