بۇگىن استانادا «نۇر وتان» پارتياسى «جاس وتان» جاستار قاناتىنىڭ كەزەكتى IV سەزى ءوز جۇمىسىن باستادى. «جاڭا الەمگە جول سالامىز» دەگەن ۇرانمەن ءوتىپ جاتقان سەزگە ەلىمىزدىڭ ءار وڭىرىنەن كەلگەن 1500-دەن استام دەلەگات قاتىسۋدا.

ءىس-شارانىڭ العاشقى كۇنىندە سەزدىڭ سالتاناتتى اشىلۋ ءراسىمى ءوتىپ، «Jas Otan conf» دەگەن اتاۋمەن ارنايى كونفەرەنسيا ۇيىمداستىرىلدى. سونىڭ بارىسىندا «جاس وتان» جاستار قاناتىنىڭ ءتوراعاسى دانيار سۇندەتبايەۆ اتقارىلعان جۇمىستار جونىندە ەسەپ بەرىپ، بايانداما جاسادى.

كونفەرەنسيا جۇمىسىنان كەيىن جاسوتاندىقتار بىرنەشە توپتارعا ءبولىنىپ، ءتۇرلى تاقىرىپتاردا پىكىر الماستى. اتاپ ايتقاندا، سەز دەلەگاتتارى «رۋحاني جاڭعىرۋ»، «سيفرلى قازاقستان»، «قازاقستاندا جاسالعان»، «ءبىلىم. عىلىم. يننوۆاسيا» جانە «سالاماتتى ۇلت» تاقىرىپتارىندا پانەلدىك سەسسيالارعا قاتىستى.

قازاقستان رەسپۋبليكاسىنىڭ ۇلتتىق مۋزەيىندە وتكەن «رۋحاني جاڭعىرۋ» سەسسياسىنىڭ جۇمىسىنا «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ ارنايى قاتىستى. ول ەلباسىنىڭ اتالعان باعدارلاماسى اياسىندا اۋقىمدى جۇمىستار اتقارىلعانىنا نازار اۋداردى. ماسەلەن «قازاقستاننىڭ كيەلى جەرلەرىنىڭ گەوگرافياسى»، قازاق تىلىندەگى 100 جاڭا وقۋلىق، «تۋعان جەر» جانە تاعى باسقا باعىتتار بويىنشا ءقازىردىڭ وزىندە ناقتى ناتيجەلەرگە قول جەتكىزىلدى.

– رۋحاني جاڭعىرۋدىڭ باستى ماقساتى – بابادان ميراس بولعان اسىل مۇرالارىمىزدى دارىپتەۋ، ۇلتتىق كودىمىز بەن قۇندىلىقتارىمىزدى ساقتاۋ جانە حالىقتى ورتاق مۇددەگە ۇيىستىرۋ. ول ءۇشىن ۇلتىمىزدىڭ بار قادىر-قاسيەتىن وسكەلەڭ ۇرپاقتىڭ بويىنا ءسىڭىرىپ، سول جولدا ايانباي ەڭبەك ەتۋىمىز كەرەك. بۇل رەتتە «جاس وتانعا» سانانىڭ اشىقتىعىن قالىپتاستىرۋعا بەلسەنە قاتىسۋ، باسەكەگە قابىلەتتىلىكتى ارتتىرۋ، پراگماتيزم، ەڭبەكقورلىق سياقتى مىندەتتەر جۇكتەلەدى. ءار جاسوتاندىق جاڭعىرۋ اياسىندا الەمنىڭ وزىق تاجىريبەلەرىن ەركىن مەڭگەرە وتىرىپ، ءوزىنىڭ ۇلتتىق كودى مەن رۋحاني جانە مادەني بىرەگەيلىگىن ساقتاۋى ءتيىس، – دەدى پارتيا ءتوراعاسىنىڭ ءبىرىنشى ورىنباسارى.

سونداي-اق، «رۋحاني جاڭعىرۋ» سەسسياسىنا ءبىلىم جانە عىلىم ۆيسە-مينيسترى اسحات ايماعامبەتوۆ، مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ ءتوراعاسى قۋات بوراشيەۆ جانە «اتامەكەن» ۇلتتىق كاسىپكەرلەر پالاتاسى اقپاراتتىق-كوممۋنيكاسيالىق تەحنولوگيالار، ءبىلىم بەرۋ جانە يننوۆاسيا كوميتەتىنىڭ ءتوراعاسى مۇرات ابەنوۆ قاتىسىپ، تاقىرىپ اياسىندا ءوز ويلارىن ورتاعا سالدى.

بارلىق سەسسيا جۇمىسىنا سپيكەر رەتىندە ورتالىق مەملەكەتتىك ورگان باسشىلارى، بەلگىلى ساياساتتانۋشىلار مەن قوعام قايراتكەرلەرى قاتىسىپ، جاستارمەن ەركىن ءارى ەمەن-جارقىن پىكىرلەسكەنىن اتاپ وتكەن ءجون. ءوز كەزەكتەرىندە سەزد دەلەگاتتارى دا اسا بەلسەندىلىك تانىتىپ، كوتەرىلگەن تاقىرىپتار بويىنشا ۇتىمدى ۇسىنىستارىن جولدادى. سۇراق-جاۋاپ كەزىندە دە ەركىن پىكىر الماسىپ، وزەكتى ويلار ايتىلدى. ناتيجەسىندە ءار باعىت بويىنشا جاستارعا ارنالعان بىرنەشە تاقىرىپتىق جوبالار ۇسىنىلدى. ولاردىڭ ەڭ ۇزدىكتەرى سەزدىڭ ەكىنشى كۇنى، ياعني ەرتەڭ وتەتىن گالا-فورۋمدە كوپشىلىككە تانىستىرىلماق.