«ەرەسەكتەرشە ويناۋ»

«ۇلكەن، ەكى قاباتتى ءۇيدىڭ ءبىر بولمەسىندە 10 جاستاعى قىز كىتاپ وقىپ وتىر. ونىڭ 15 جاستاعى جيەنى «ەرەسەكتەرشە ويناۋدى» ۇسىنادى. بارلىعى ەرىنمەن سۇيۋدەن باستالىپ، فيزيكالىق جاقىنداسۋمەن اياقتالدى. ءالى كۇنگە دەيىن ەسكە تۇسىرگىم كەلمەيدى. تازارۋدى قالايمىن».

بۇل – قازاقستاندىق دينارا قاسىمبەكوۆانىڭ #مەن ايتۋعا قورىقپايمىن حەشتەگىمەن بالا كەزىندە باستان وتكەرگەن وقيعاسىن جازعان ەستەلىگى.

پەدوفيلدىڭ قۇربانى بولعان بالالاردىڭ ناقتى ستاتيستيكاسىن كەلتىرۋ مۇمكىن ەمەس. سەبەبى جىلدار بويى باسىنان وتكەرگەن سۇمدىق وقيعانى جاسىرىپ جۇرگەندەر وتە كوپ. ونىڭ ءبىر دالەلى – بۇكىل الەمدە پەدوفيلدىڭ قۇربانى بولعانىن ءتۇرلى حەشتەگپەن جازعاندار جەتىپ ارتىلادى. ءبارى دەرلىك كەزىندە جاقىندارىنا ايتۋعا قورقىپ، ويىندا ماڭگىگە قالعان قورقىنىشتى ەستەلىكپەن ءومىر ءسۇرىپ كەلەدى. ال ادامنىڭ تاعدىرىن تاس-تالقان ەتكەندەر زاڭ الدىندا جازالانباي كەتتى.

پەدوفيل دەگەن كىم؟

پسيحوتەراپيەۆت يورگە پونسەتيدىڭ ايتۋىنشا، پەدوفيليا دەگەن – پسيحولوگيالىق اۋىتقۋ.

سكانديناۆيا ەلدەرى، گەرمانيا، فرانسيا جانە كانادا سەكىلدى مەملەكەتتەر پەدوفيلدەردى تانىپ بىلۋگە كوپ قارجى جۇمساپ جاتىر. دەسە دە ازىرشە پەدوفيلدەردىڭ مي فۋنكسياسى تەرەڭ زەرتتەلمەگەن.

رەسەيلىك دارىگەرلەر «پەدوفيل» دەگەن دياگنوزدى قويۋ ءۇشىن ادام بىرنەشە كريتەرييگە جاۋاپ بەرۋى كەرەك دەيدى.

ەڭ الدىمەن پەدوفيلدىڭ جاسى 16-دان تومەن بولماۋى كەرەك، ال ونىڭ قۇربانى ودان 5 جاس كىشكەنتاي بولۋى كەرەك.

زورلىق قۇربانى بولعان ادامنىڭ جاسى 13-تەن جوعارى بولمايدى.

پەدوفيل ءوز قۇربانىنا ەڭ كەمى جارتى جىل ۋاقىت قىزىعۋشىلىق تانىتىپ، ونىمەن جاقىنداسۋعا تىرىسادى. ولار تاڭداعان قۇربانىن باسىندا تەك سىلاپ-سيپاپ، ودان كەيىن سىيلىقتار بەرىپ، بالالارمەن ەموسيونالدى تۇردە بايلانىس ورناتادى.

سودان كەيىن عانا ارام ويىن ىسكە اسىرادى. ستاتيستيكالىق مالىمەتكە سۇيەنسەك، بالالاردى زورلاعانداردىڭ 30 پايىزى – وتباسىنىڭ ءبىر مۇشەسى، ياعني وگەي اكەسى، اتاسى، اعاسى جانە ت.ب. ال 16 پايىزى – بوتەن ادامدار. ءبىراق ولار ءوز قۇربانىن جاقسى تانيدى. وتباسىمەن تىعىز ارالاسىپ، جىلدار بويى بالاعا قامقورلىق تانىتقانسىپ، سەنىمگە كىرگەندەر.

مامانداردىڭ ايتۋىنشا، پەدوفيلدەر ادەتتە ۇيىندە اتا-انا جىلۋىن سەزىنبەيتىن، ەموسيونالدى قولداۋعا ءزارۋ بالالاردى تاڭدايدى.

ال كەيبىرى تولىق ەمەس وتباسىلاردى نىساناعا الادى. سەبەبى ونداي ۇيلەردە بالاعا تولىق باقىلاۋ بولمايدى. پەدوفيلدەر اناسى نەمەسە اكەسى جۇمىستا بولعان ۋاقىتتا بالاسىنا قارايتىنىن ايتىپ، قامقور ادام سەكىلدى كورىنگىسى كەلەدى.

سونداي جاقىن تانىستاردىڭ نەمەسە وتباسى مۇشەسىنىڭ بالانى قورقىتىپ-ۇركىتىپ، ءبىراز ۋاقىت بويى زورلاپ كەلگەن مىسالدار دا كەزدەسەدى.

مامانداردىڭ ايتۋىنشا، بەيكۇنا بالالارعا جىنىستىق قورلىق كورسەتەتىن ادامداردىڭ كوبى – وزدەرى دە كىشكەنتاي كەزىندە زورلىققا ۇشىراعاندار.

كەيبىرىندە پسيحيكالىق اۋىتقۋ بولادى. كۇيزەلىسكە ءتۇسىپ، رۋحاني دەرتىنەن ارىلا الماي جۇرگەندەر دە وسىنداي پاسىق قادامعا بارادى. پەدوفيلدەردىڭ اراسىندا گوموسەكسۋاليستەردىڭ دە ۇلەسى كوپ ەكەن. ال پەدوفيل ايەلدەر ءوز قۇرباندىعىنا ۇلداردى ءجيى تاڭدايدى.

پەدوفيلدى قالاي انىقتاۋعا بولادى؟

گەرمانيانىڭ بەس عىلىمي-زەرتتەۋ ينستيتۋتى پەدوفيليا فەنومەنىن زەرتتەپ كوردى.

ماماندار قوعامعا بەلگىلى مىڭداعان پەدوفيلدى زەرتتەي كەلە، ولاردىڭ كوبىنە ورتاق بەلگىلەر بارىن ايتادى. ايتكەنمەن ول بەلگىلەر قالىپتى ادامدا دا كەزدەسۋى مۇمكىن ەكەنىن ەسكەرتەدى.

زەرتتەۋ بارىسىندا بالالاردى زورلاعانداردىڭ كوبى الاسا بويلى ەكەنى انىقتالعان. 

بويدىڭ الاسىلىعى انا جاتىرىندا ميدىڭ دۇرىس جەتىلمەۋىنەن بولۋى ىقتيمال. سوندىقتان اقىل-ەسى كەم ادامداردىڭ كوبىنىڭ بويى الاسا بولىپ كەلەدى.

كوپتەگەن پەدوفيلگە ءتان ەكىنشى بەلگى – سولاقايلىق. وڭقايلارعا قاراعاندا سولاقايلاردىڭ اراسىندا پەدوفيلدەر ءۇش ەسە كوپ كەزدەسەدى.

پەدوفيل نەشە جاستا بولسا دا، ءوزىن جاس سەزىنەدى. ال بالالارعا، كەرىسىنشە، ەرەسەك ادام سياقتى قارايدى.

ساراپشىلاردىڭ سوزىنشە، پەدوفيلدەر ايەلدەرمەن دۇرىس قارىم-قاتىناس ورناتا الماعاندىقتان، اۋەستىگى بالاعا قاراي ويىسادى ەكەن. زەرتتەۋ بارىسىندا پەدوفيلدەردىڭ كوبىنىڭ ايەلدەرمەن تۇراقتى قارىم-قاتىناسى جوق ەكەنى انىقتالعان.

ماماندار مرت ارقىلى پەدوفيلدەردەن سەكسۋالدى پاتولوگيانى انىقتادى. پەدوفيلدەردىڭ كەيبىرىندە پسيحوسوماتيكالىق ەرەكشەلىك كەزدەسەتىنىن ايتادى. ولاردىڭ اقىل-وي دامۋ كوەففيسيەنتى ورتاشا كورسەتكىشتەن سەگىز ساتىعا تومەن بولادى. زەرتتەۋشىلەردىڭ مالىمەتىنشە، پەدوفيلدىڭ ينتەللەكتۋالدىق دەڭگەيى ونىڭ قۇربانىنىڭ جاسىمەن بايلانىستى بولادى. پەدوفيلدىڭ ينتەلەكتۋالدىق دەڭگەيى تومەن بولعان سايىن ونىڭ قۇرباندارى دا جاسارا بەرەدى.

بالالارعا دەگەن اۋەستىك نەدەن پايدا بولادى؟

اسفەندياروۆ اتىنداعى قازۇمۋ وقىتۋشىسى، پروفەسسور قۇدياروۆا عاليا ماحمەت قىزى بالانى زورلايتىنداردىڭ كوبىنىڭ بالا كەزىندە اقىل-وي دامۋىندا اقاۋ بولاتىنىن ايتادى.

- پەدوفيلدەردىڭ كوبىنىڭ ميى ورگانيكالىق زاقىمدانعان. ءقازىر كوپ ايەلدەر ايىنا تولماي ەرتە بوسانىپ قالىپ جاتادى. ونداي جاعدايدا بالانىڭ ورتالىق جۇيكە جۇيەسى بۇزىلىپ تۋادى. مۇنىڭ بارلىعى بالانىڭ ويلاۋ قابىلەتىنە، اقىلىنا نۇقسان كەلتىرمەي قويمايدى. وسىلايشا ادامدا بالاعا دەگەن اۋەستىك پايدا بولادى.

پسيحياتريادا «ينفانتيليزم» دەگەن تەرمين بار. ءينفانتيلدى ادامنىڭ ويلاۋ قابىلەتى ءوز جاسىنان تومەن بولادى. ماسەلەن 15، 17 جاستاعى بالانىڭ ويلاۋ قابىلەتى 12، 13 جاستاعى بالانىكىندەي بولۋى مۇمكىن، دەيدى عاليا ماحمەت قىزى.

زەرتتەۋشى عالىمداردىڭ كوبى پەدوفيلدەردىڭ بالا كەزىندە نەمەسە شارانا كەزىندە ميىنا زاقىم كەلگەنىن ايتادى. وعان ايەلدىڭ جۇكتى كەزىندە اۋرۋى، ىسپەن ۋلانۋى نەمەسە ەكى قابات كەزدە ىشۋگە تىيىم سالىنعان دارىلەردى ءىشىپ قويۋى اسەر ەتەدى. پروفەسسور عاليا ماحمەت قىزىنىڭ ايتۋىنشا، ادامنىڭ پەدوفيل بولۋى سىرتقى فاكتورلارعا دا بايلانىستى.

- پۋبەرتاتتىق كەزەڭدە ءجاسوسپىرىم بالا مەن قىزدىڭ اراسىندا ۇناتۋ سەزىمى بولسا، ول – قالىپتى جاعداي. ال بالادا كىشكەنتاي بالالارعا اۋەستىگى ويانسا ول – پاتولوگيا.

باياعىدا پەدوفيلدەر تۋرالى كوپ ەستىمەيتىنبىز. سەبەبى بۇرىن قازىرگىدەي اجىراسۋ، ەرتە جاستان جۇكتى بولۋ سەكىلدى جاعداي كوپ بولمايتىن. الەۋمەتتىك جاعدايدىڭ ناشارلىعى، اشىق-شاشىق جۇرەتىندەردىڭ كوبەيگەنى ادام پسيحيكاسىنا اسەر ەتپەي قويمايدى. سونىمەن قاتار ءقازىر ۇيالى تەلەفونى جوق ادام كەمدە-كەم. قالاعان ۋاقىتتا ۇياتسىز سايتتارعا كىرۋگە بولادى. مۇنىڭ بارلىعى ادامنىڭ ازعىنداۋىنا الىپ كەلەدى.