وسكەمەندە لاتىن قارپىندە جازۋدان جارىس ءوتتى. باس جۇلدە يەگەرىنە قازاقتىڭ قارا دومبىراسى بەرىلدى، دەپ حابارلايدى Qamshy.kz اقپارات اگەنتتىگى. 

«لاتىن گرافيكاسى – وركەنيەت جازۋى» اتتى اكسيانى وبلىستىق تىلدەردى دامىتۋ باسقارماسى ۇيىمداستىردى.

– «رۋحاني جاڭعىرۋ» باعدارلاماسى اياسىندا وتكىزىلەتىن ءىس-شارانىڭ ماقساتى –لاتىن گرافيكاسىنداعى جاڭا ءالىپبيدىڭ ءمان-ماڭىزىن كوپشىلىككە تانىستىرۋ، تۇرعىنداردىڭ جاڭا الىپبيگە قىزىعۋشىلىعىن ارتتىرۋ ەدى. بۇل ماقسات ورىندالدى، – دەيدى شقو تىلدەردى دامىتۋ باسقارماسىنىڭ باسشىسى ايدىن شايماردانوۆ.

جارىس 4 كەزەڭنەن تۇردى. ءبىرىنشى كەزەڭنىڭ شارتى بويىنشا سوزدەردى لاتىن قارپىمەن 60 سەكۋند ىشىندە جازۋ كەرەك بولدى. بۇل كەزەڭگە 42 ادام قاتىستى. كەلەسى كەزەڭگە وتكەن 28 قاتىسۋشى ماقالدىڭ ەكىنشى جارتىسىن تاۋىپ قانا قويماي، 120 سەكۋند ىشىندە ونىڭ جالعاسىن لاتىن گرافيكاسىندا جازدى. ءۇشىنشى كەزەڭدە قاتىسۋشىلار كۇردەلى ءسوزدىڭ قۇرامىنداعى ارىپتەردەن بىرنەشە ءسوز جازۋدان باسەكەگە ءتۇستى. ول كەزەڭنەن 3 سايىسكەر جىلدامدىق تانىتىپ، سوڭعى كەزەڭگە ءوتتى. سوڭعى كەزەڭدە كوك ەكرانعا بەرىلگەن سۋرەتتەرگە قاراپ، سويلەم قۇراستىرىپ، ونى لاتىن گرافيكاسىمەن ساۋاتتى جازعان سايىسكەرلەردىڭ ىشىندە جۇپار حۋان 1-ورىندى، ەرلان ماگدانوۆ 2-ورىندى، ەركەجان مۇرات قىزى 3-ورىندى جەڭىپ الدى.