قىزىلورداداعى اتىس كەزىندە جارالانعان 18 جاستاعى ستۋدەنت كوز جۇمدى. ال وعان تاپا-تال تۇستە كوشەدە وق اتقان ازامات ءقازىر تەرگەلىپ جاتىر. كەشە قالانىڭ قاق ورتاسىندا بولعان قاندى وقيعاعا ناقتى نە سەبەپ ەكەنى ازىرگە بەلگىسىز. ال كۇدىكتى 8 ازاماتتى قولعا تۇسىرگەن پوليسەيلەر ءقازىر قىلمىستىق ءىس قوزعاپ، ولاردىڭ بارىنەن جاۋاپ الىپ جاتىر.

قىزىلوردانىڭ قاق ورتاسىندا تاپا تال-تۇستە بولعان اتىستى شاھار تۇرعىندارى ۆيدەوعا ءتۇسىرىپ العان. وندا قاشىپ كەلە جاتقان جىگىتتىڭ سومكەدەن قارۋعا ۇقساس زاتتى شىعارىپ، ءوزىن قۋعان توپتىڭ ارتىنان جۇگىرگەنى انىق كورىنەدى. كەيىن گۇرس ەتكەن مىلتىقتىڭ داۋىسىنان سول اۋماقتا بولعان جۇرت شوشىپ، جان-جاققا قاشا جونەلەدى.

ال اتىلعان وق ازامات بازىل ەسىمدى ستۋدەنتكە تيگەن. بىرنەشە دەنە جاراقاتىن العان جىگىتكە دارىگەرلەر شۇعىل وتا جاساعانىمەن، ونىڭ ءومىرىن ساقتاپ قالۋ مۇمكىن بولمادى.

كتك جاڭالىقتارىنىڭ حابارلاۋىنشا، قىزىلوردا وبلىسى دەنساۋلىق ساقتاۋ باسقارماسىنىڭ رەسمي وكىلى نۇرجامال تۇرسىنبايەۆا دارىگەرلەردىڭ بالانىڭ ءومىرىن امان الىپ قالۋعا بار كۇش-جىگەرىن سالعانىن ايتادى.

دەگەنمەن، تيگەن وقتىڭ ناتيجەسىندە بالانىڭ ىشكى اعزالارىنىڭ بارلىعىنىڭ بۇلىنگەنى انىقتالدى. 3 جارىم ساعاتقا سوزىلعان وتانىڭ ناتيجەسى ءساتسىز بولىپ، بالا قايتىس بولدى.

قايعىدان قان جۇتقان مارقۇمنىڭ تۋىستارى بالانى كىمدەردىڭ جانە نە ءۇشىن اتىپ كەتكەنىن تۇسىنە الار ەمەس. ايتۋلارىنشا، ازامات ۇلگىلى ستۋدەنت بولعان. 18 جاستاعى جىگىت قىزىلورداداعى مەديسينا كوللەدجىندە «فەلدشەر» ماماندىعى بويىنشا ءبىلىم الىپ ءجۇرىپتى. وقيعا ورنىنا جەتكەن ونىڭ تۋعان اعاسى وندا جەدەل-جاردەم تىم كەش شاقىرتىلدى دەپ وتىر.

-جولدىڭ قاق ورتاسىندا جاتىر قانسىراپ، اينالاسى تولعان پوليسيا. حالىق ءبارى قاراپ تۇر. جولدى اشىپ بەرسەڭدەرشى دەپ جالىندىم. وڭ جاق بۇيرەگىنەن تيگەن وق بىتىرادان. قولىمنان قىسىپ «اعا، ءبارى جاقسى» بولادى دەدى، - دەيدى تۋعان اعاسى ايبەك بازىل. 

ال ءتارتىپ ساقشىلارى كۇندىز بولعان اتىسقا قاتىسى بار دەگەن كۇدىكپەن 8 ادامدى قولعا تۇسىرگەن. ءقازىر قىلمىستىق كودەكستىڭ بىرنەشە بابى بويىنشا ءىس قوزعالىپ، ۇستالعانداردىڭ بارىنەن جاۋاپ الىنۋدا. قاندى وقيعا كەشە عانا شاھاردىڭ ايتەكە بي كوشەسىنىڭ بويىندا بولعان ەدى. ال وعان نە سەبەپ ەكەنىن پوليسەيلەر تەرگەۋ قۇپياسى دەپ ايتپاي وتىر. سول جەردە جاراقات الىپ، كەيىن كوز جۇمعان ازامات بازىلدىڭ دەنەسى ەرتەڭ جەر قوينىنا تاپسىرىلماق.