ق ر مەملەكەتتىك حاتشىسى گۇلشارا ءابدىحالىقوۆا پرەزيدەنت نۇرسۇلتان نازاربايەۆتىڭ «جاس وتان» جاستار قاناتىنىڭ  IV سەزىنە قاتىسۋشىلارعا ارناعان قۇتتىقتاۋ ءسوزىن وقىپ بەردى، دەپ جازادى Qamshy.kz اقپارات اگەنتتىگى.

«جاس وتان» – مەنىڭ بارلىق ستراتەگيالىق باستامالارىم مەن ساياساتىمدى قولداپ كەلە جاتقان، سەنىمدى تىرەگىمە اينالعان بەدەلدى ۇيىم. تاۋەلسىزدىكتىڭ العاشقى كۇندەرىنەن باستاپ جاستار ماسەلەسى مەنىڭ دە، مەملەكەتتىڭ دە ەڭ باستى نازارىندا بولىپ، بۇل سالادا كوپتەگەن باعدارلاما جۇزەگە اسىرىلدى. مەن وسىناۋ ەڭبەكتىڭ جەمىسى مەن قامقورلىقتىڭ جىلۋىن جاستاردىڭ جاقسى بىلەتىنىنە كامىل سەنەمىن»، — دەلىنگەن قۇتتىقتاۋ حاتتا. 

نازاربايەۆ ۇزاق مەرزىمدى ماقساتتارعا قول جەتكىزۋ ءۇشىن الەمدەگى قارقىندى وزگەرىستەرگە دايىن بولىپ، زامان كوشىنەن قالماۋ كەرەكتىگىن ايتتى. 

«بولاشاققا باعدار – رۋحاني جاڭعىرۋ» ماقالامدا مەن 21 عاسىرداعى ۇلتتىق سانا تۋرالى جانە تاياۋ جىلداردا قولعا الۋدى قاجەت ەتەتىن مىندەتتەرگە ەرەكشە نازار اۋداردىم. سولاردىڭ قاتارىندا لاتىن الىپبيىنە كوشۋ، «سيفرلىق قازاقستان» باعدارلاماسى، ءۇشتىلدى ءبىلىم بەرۋ سياقتى مىندەتتەردى ەلدىك مۇددەنىڭ جاڭا دەڭگەيى دەپ اتاپ وتەر ەدىم. «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇكىندىكتەرى» اتتى بيىلعى جولداۋىمدا جاڭا زامان تالاپتارىنا بەيىمدەلۋ مەن جەتىستىكتەرگە جەتۋدىڭ جولدارىن قاراستىردىم»، - دەي كەلە ءوزىنىڭ بەس الەۋمەتتىك باستاماسىنىڭ جۇزەگە اسۋى ءۇشىن جاستاردىڭ بىلىمىنە اسا نازار اۋدارۋ قاجەت ەكەنىن ەسكەردى.

«كۇنى كەشەگى حالىققا ۇندەۋىمدە دە ءوزىمنىڭ بەس الەۋمەتتىك باستامامدى ۇسىنىپ، ونى جۇزەگە اسىرۋدىڭ ءتيىمدى تەتىكتەرىنە توقتالدىم. وسىنىڭ بارلىعىندا مەن جاستاردىڭ ساپالى ءبىلىم الىپ، باسەكەگە قابىلەتتى مامان بولىپ قالىپتاسۋىنا ەرەكشە كوڭىل ءبولىپ، سوعان باسىمدىق بەردىم. ويتكەنى سەندەر ەلىمىزدىڭ ەرتەڭى عانا ەمەس، مەنىڭ باستامالارىمدى جۇزەگە اسىراتىن بۋىنسىڭدار. مەن سەندەردى بەلسەندى تۇردە جان-جاقتى دامۋعا، سپورتپەن، ونەرمەن اينالىسۋعا، شەت تىلدەردى ۇيرەنۋگە، وتاندىق جانە الەمدىك ادەبيەتتىڭ تەرەڭ مۇرالارىن تانىپ بىلۋگە، ەڭ باستىسى ءارقايسىڭدى ءوز سالالارىڭدا الەمنىڭ ەڭ وزىق ماماندارىمەن يىق تىرەستىرىپ، قاتار تۇرا الاتىنداي دەڭگەيگە كوتەرىلۋگە شاقىرامىن»، — دەدى ەلباسى. 

ايتا كەتسەك، استانادا كەشە «جاس وتان» جاستار قاناتىنىڭ ءتورتىنشى سەزى باستالدى. بۇگىن «ەكسپو-2017» كونگرەسس ورتالىعىندا «جاڭا الەمگە جول سالامىز» اتتى گالا-فورۋم ءوتىپ جاتىر. وعان ەلىمىزدىڭ بارلىق وڭىرىنەن كەلگەن 1500-دەن اسا بەلسەندى جاسوتاندىق قاتىسۋدا.