«جاس وتان» جاستار قاناتىنىڭ IV سەزى تىڭ جاڭالىقتار مەن زاماناۋي ترەندتەرگە تولى بولدى. سونداي ەرەكشەلىكتەردىڭ ءبىرى رەتىندە سەزدىڭ VR، ياعني ۆيرتۋالدى شىنايىلىق فورماتىندا ونلاين كورسەتىلۋىن اتاپ وتۋگە بولادى. سونىڭ ناتيجەسىندە فورۋم جۇمىسىن قازاقستاندىق جاستار عانا ەمەس، الەمنىڭ بارلىق ينتەرنەت قولدانۋشىسى 360 گرادۋستا كورۋگە مۇمكىندىك الدى.
سەزد جۇمىسى بۇگىن «ەكسپو-2017» حالىقارالىق كورمەسىنىڭ كونگرەسس-ورتالىعىندا «جاڭا الەمگە جول سالامىز» اتتى گالا-فورۋممەن جالعاستى. فورۋمدا «جاس وتان» جاستار قاناتىنىڭ الداعى باعىت-باعدارىن ايقىنداپ بەرگەن جاڭا قۇجات قابىلداندى. «جاڭا الەمگە جول سالامىز» اتتى بۇل قۇجاتتا ەلىمىزدەگى جاستار ساياساتىنا تىڭ سەرپىن بەرەتىن يگى باستامالار كورسەتىلگەن.
ءىس-شاراعا قاتىسقان مەملەكەتتىك حاتشى گۇلشارا ءابدىقالىقوۆا ەلباسىنىڭ قۇتتىقتاۋ حاتىن وقىپ بەردى.
– ءقازىر بۇكىل الەم اۋقىمدى وزگەرىستەردى باستان كەشىرۋدە. تورتكۇل دۇنيە ءتورتىنشى ونەركاسىپتىك ريەۆوليۋسيا داۋىرىنە قادام باستى.
ءبىز ۇزاقمەرزىمدى ماقساتتارىمىزعا قول جەتكىزۋ ءۇشىن وسىنداي قارقىندى وزگەرىستەردى ءوز پايدامىزعا قاراي ءساتتى جۇزەگە اسىرۋىمىز كەرەك. سول ءۇشىن ءبىز قازاقستاندا ساياسي، ەكونوميكالىق، رۋحاني جانە الەۋمەتتىك جاڭعىرۋلاردى قولعا الدىق.
«بولاشاققا باعدار: رۋحاني جاڭعىرۋ» اتتى ماقالامدا مەن ءححى عاسىرداعى ۇلتتىق سانا تۋرالى جانە تاياۋ جىلداردا قولعا الۋدى قاجەت ەتەتىن مىندەتتەرگە ەرەكشە نازار اۋداردىم. سولاردىڭ قاتارىندا لاتىن الىپبيىنە كوشۋ، «سيفرلى قازاقستان» باعدارلاماسى، ءۇش تىلدە ءبىلىم بەرۋ سياقتى مىندەتتەردى ەلدىك مۇددەنىڭ جاڭا دەڭگەيى دەپ اتاپ وتەر ەدىم.
«ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى بيىلعى جولداۋىمدا جاڭا زامان تالاپتارىنا بەيىمدەلۋ مەن جەتىستىكتەرگە جەتۋدىڭ جولدارىن قاراستىردىم.
كۇنى كەشەگى حالىققا ۇندەۋىمدە دە ءوزىمنىڭ بەس الەۋمەتتىك باستامامدى ۇسىنىپ، ونى جۇزەگە اسىرۋدىڭ ءتيىمدى تەتىكتەرىنە توقتالدىم.
وسىنىڭ بارلىعىندا مەن جاستاردىڭ ساپالى ءبىلىم الىپ، باسەكەگە قابىلەتتى مامان بولىپ قالىپتاسۋىنا ەرەكشە كوڭىل ءبولىپ، سوعان باسىمدىق بەردىم. ويتكەنى، سەندەر ەلىمىزدىڭ ەرتەڭى عانا ەمەس، مەن ايقىنداعان ماقساتتاردى جۇزەگە اسىراتىن بۋىنسىڭدار، – دەلىنگەن ەلباسىنىڭ قۇتتىقتاۋ حاتىندا.
ەكى كۇنگە سوزىلعان اۋقىمدى ءىس-شارانىڭ ءماندى دە مازمۇندى وتكەنىن ايتقان «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ ەلىمىزدە قولعا الىنعان يگى باستامالار جاس بۋىننىڭ جارقىن بولاشاعىنا باعىتتالعانىن جەتكىزدى.
– ءبىز وسى سەزد ارقىلى جاڭا الەمگە ۇمتىلىپ، دامۋدىڭ جاڭا كەزەڭىنە اياق باستىق. ماقساتىمىز – انىق، باعىت-باعدارىمىز – ايقىن. الدىمىزدا ەلباسى بەلگىلەپ بەرگەن ابىرويلى مىندەتتەر تۇر. سول كوزدەگەن مەجەگە قول جەتكىزۋ ءۇشىن جۇدىرىقتاي جۇمىلىپ جۇمىس ىستەيىك! ءبىز بەرەكەلى تىرلىكتىڭ باستاۋى بىرلىكتە عانا ەكەنىن باتىل ىس-ارەكەتىمىزبەن دالەلدەۋىمىز كەرەك. وسى جولدا بارشا قازاقستاندىق جاستارعا ۇلگى-ونەگە كورسەتۋگە ءتيىسپىز!، – دەدى ماۋلەن اشىمبايەۆ.
گالا-فورۋم بارىسىندا ءار سالادا بەلگىلى ءبىر بيىكتەردى باعىندىرعان، قوعامنىڭ دامۋىنا وزىندىك ۇلەسىن قوسىپ كەلە جاتقان بەلسەندى جاس قازاقستاندىقتار ءسوز الىپ، ارىپتەستەرىنە جەتىستىككە جەتۋدىڭ قىر-سىرىن ايتىپ بەردى.
