پارلامەنت سەناتىنىڭ دەپۋتاتتارى ءبىر كۇندىك جالاقىلارىن سۋ تاسقىنان زارداپ شەگىپ جاتقان شىعىس قازاقستان وبلىسىنا اۋداراتىن بولدى. بۇل تۋرالى 29 ناۋرىزدا قاسىم-جومارت توقايەۆتىڭ توراعالىعىمەن وتكەن جوعارعى پالاتا وتىرىسىندا ايتىلدى، دەپ جازادى Qamshy.kz اقپارات اگەنتتىگى. 

سەناتور دۇيسەنعازى مۋسين شىعىس قازاقستان وبلىسىندا تۇرعىندار سۋ تاسقىنان زارداپ شەگىپ جاتقانىنا ارىپتەستەرىنىڭ نازارىن اۋدارا كەلىپ، ايماق حالقى ءبىر كىسىدەي جۇمىلىپ ءتىلسىز جاۋعا قارسى بەلسەنە كۇرەسىپ جاتقانىن اتاپ ءوتتى. اتاپ ايتقاندا، وڭىردە توڭ قاباتى (2 مەترگە دەيىن) تەرەڭ قاتۋىنا جانە وزەندەردە سۋ دەڭگەيىنىڭ شامادان تىس كوتەرىلۋىنە بايلانىستى 5 قالا (اياگوز، وسكەمەن، ريددەر، شەمونايحا، سەمەي) جانە 12 اۋدان (اياگوز، گلۋبوكوۆسكيي، ۇلان، كۇرشىم، ءۇرجار، زايسان، زىريان، تارباعاتاي، شەمونايحا، كاتون-قاراعاي، كوكپەكتى، بەسقاراعاي) سۋ تاسقىنىنا ۇشىرادى. وسىعان بايلانىستى ءبىرقاتار اۋدانداردا توتەنشە جاعداي جاريالاندى.

جەرگىلىكتى اتقارۋشى ورگان تابيعي اپاتقا بايلانىستى ءتيىستى شارالار قابىلداۋدا. الايدا، تەحنيكا جانە ادام كۇشى بارىنشا جۇمسالعانىنا قاراماستان ورىن الىپ وتىرعان جاعداي قوسىمشا قارجىلاي قولداۋدى قاجەت ەتەدى. 

قيىن ۋاقىتتا قولىمىز جەتپەسە دە كوڭىلىمىز بەن جۇرەگىمىز وسى ءوڭىر حالقىمەن بىرگە دەگەن نيەتپەن سەنات دەپۋتاتتارى سۋ تۇتقىنىندا قالعان جانە تابيعي اپات سالدارىنان ۇلكەن قيىندىقتارعا كەز بولعان شىعىس قازاقستان وبلىسىنداعى وتانداستاردى قارجىلاي قولداپ، ءبىر كۇندىك ەڭبەكاقىلارىن اۋداراتىن بولدى.