«ءۇنسىزقالما» قوزعالىسىنىڭ نەگىزىن قالاۋشى دينا سمايلوۆا 9 جاسىندا زورلانعان الماتى وبلىسى تۇرعىنىنىڭ جانتۇرشىگەرلىك وقيعاسىن جاريالادى دەپ جازادى Qamshy.kz اقپارات اگەنتتىگى.

«بۇگىن 9 جاسىندا تۋىسقانى زورلاعان قىزدىڭ اپاسى كەلدى. ونىڭ ايتىپ بەرگەن وقيعاسى مەنى قاتتى تاڭقالدىردى. بۇل – وتە قورقىنىشتى جاعداي. وقيعادا ايتىلعان ەسىمدەردى اتاماي-اق قويعانىم دۇرىس بولار. بۇل – شىنايى اقپارات. ونى ءبارى ءبىلۋى كەرەك دەپ ويلايمىن»، - دەپ جازادى دينا سمايلوۆا.

زارداپ شەككەن قىزدىڭ اپاسىنىڭ ايتۋىنشا، ونىڭ اكە-شەشەسى ەكى رەت ايرىلىسىپ، ەكى رەت قوسىلعان.

«مەن ولارمەن ءجيى كورىسپەگەندىكتەن، نەمەرەمدى دە سيرەك كورەتىنمىن»، - دەيدى ول.

2014 جىلى نەمەرەسى اپاسىنان ءوزىن الىپ كەتۋىن سۇراعان. ءوزىنىڭ جاسىنان كىشكەنتاي كورىنەتىن قىزدىڭ دەنەسىندە كوگەرگەن ىزدەر، جارالار بولدى. ءتۇن ىشىندە جىلاپ، بىرەۋمەن توبەلەسىپ، شوشىپ وياناتىن بولدى»، - دەيدى قىزدىڭ اپاسى.

اتاسى مەن اپاسى نەمەرەسىنىڭ دەنساۋلىعىن قالپىنا كەلتىرۋ ماقساتىندا ازىق-تۇلىك، پايدالى ۆيتاميندەر بەرىپ، بارىنشا  قامقور بولۋعا تىرىسقان. وكىنشكە قاراي، جەتكىنشەك قىز ەشقاشان ساۋدا-ويىن-ساۋىق ورتالىقتارىندا بولماعان، ەشقاشان وزىنە كيىم تاڭداپ كورمەگەن. ارادا ءبىراز ۋاقىت وتكەندە قىز قاتتى اۋىرا باستاعان. اپاسى ونى گينەكولوگ دارىگەرگە قاراتقان. سول كەزدە قىز جىلاپ، ءوزىنىڭ باسىنان وتكەنىن بايانداپ بەرگەن. 9 جاسىندا زورلانعانىن دارىگەردىڭ كوزىنشە ايتقان. دارىگەر قىزدى تەكسەرىپ، ونىڭ ءسوزىن راستاعان.

اپاسى كەلىنىن شاقىرىپ، وعان ءبارىن ايتىپ بەرگەندە قىزدىڭ اناسى ەش تاڭقالماپتى. وسى كەزدە قىزدىڭ اپاسى زورلاۋ فاكتىسى بويىنشا پوليسياعا جانە اتا-انا قۇقىعىنان ايىرۋعا سوتقا ارىز بەرگەن.

قىز كوپتەگەن اۋرۋعا شالدىققاندىقتان، ونىڭ جاتىرىن الدىرۋ ءقاۋپى تۋىندايدى. رەسەي ماماندارى قىمبات ءارى ۇزاق ۋاقىت جۇرگىزىلەتىن مەديكامەنتوزدىق ەم قابىلداۋدى ۇسىنعان. ازىرگە ەشقانداي وتا جاسالماعان.

«زورلانعان قىز 10 جاسىنان باستاپ اناسىنا قاتتى اۋىرىپ جۇرگەنىن ايتقان. دارىگەرلەر ۋدز جاساتىپ، گينەكولوگقا قارالۋعا كەڭەس بەرگەن. الايدا اناسى ولاردىڭ ۇسىنىستىنان باس تارتقان ەكەن. سوعان قاراعاندا، قىزىنىڭ باسنىنان وتكەن جاعداي تۋرالى دارىگەرلەر بىلسە، شۋ شىعارادى دەپ ويلاعان بولۋى كەرەك. ال بالا بولسا ءتورت جىل بويى وسى اۋىرسىنۋعا ءتوزىپ كەلگەن»، - دەيدى قوزعالىس جەتەكشىسى.

قىزدىڭ ايتۋىنشا، اناسى وعان ءدارى ەگىپ ۇيىقتاتىپ تاستايتىن. كەلەسى كۇنى: «تۇندە نە بولعانى ەسىڭدە بار ما؟»، - دەپ سۇرايدى ەكەن. قىزدىڭ ەسىنە قالعانى – اناسى ونى بەلگىسىز پاتەرلەرگە اپاراتىن. سول پاتەرلەردە ول قىزىنا ەر ادامدارعا اراق قۇيعىزعان. ال ۇيدە اناسىنىڭ ءىنىسى مەن اكەسى، اپكەسى مەن ونىڭ كۇيەۋى بىرگە تۇرعان. بارلىعى اششى سۋعا قۇمار بولسا كەرەك.

قىزدىڭ ايتۋىنا قاراعاندا، ونى 9 جاسىندا ناعاشى اتاسى زورلاعان. ەسكى سارايعا اپارىپ، اياق-قولىن بايلاپ تاستاعان ەكەن. سول وقيعادان كەيىن ونى بايلانعان كۇيى سارايدا قالدىرىپ كەتكەن. ۇيىنە السىرەپ، ارەڭ جەتكەن قىز اناسىنا دەنەسىندەگى قاننىڭ ىزدەرىن كورسەتىپ، ءبارىن ايتىپ بەرگەن. الايدا ونىڭ اناسى قىزىنا بۇل وقيعا جايلى ەشكىمگە ءتىس جارماۋدى. ءتىپتى، قىزدى اناسىنىڭ ءىنىسى دە زورلماق بولعان ەكەن. الايدا اناسىنىڭ اپكەسى كەلىپ، اراشا تۇسكەن. سونداي-اق ناعاشى اتاسى دا، قىزدىڭ ايتۋىنا قاراعاندا، ونىمەن بىرگە ۇيىقتاپ، تۇرتپەكتەپ، ءتيىسىپ جۇرگەن.

پوليسيا بۇل ءىستى ءۇش رەت جاۋىپتى. قىزعا التى رەت ساراپتاما جاساعان، تەرگەۋدەن وتكەن. قىزدىڭ اپاسى نەمەرەسىنە قامقورشى بولعان.

«پوليسيا قىزدىڭ جاۋابىن جەتكىلىكسىز دەپ ەسەپتەپ وتىر، ال پسيحولوگيالىق ساراپتاما قىزدىڭ ايتقاندارى ويدان شىعارىلماعان دەگەن توقتامعا كەلىپ وتىر. تەرگەۋشى كۇدىكتىگە جاسالاتىن پسيحولوگيالىق ساراپتامانى بولدىرتپاي تاستاعان. ءقازىر ءىس زاعيپا بالييەۆانىڭ باقىلاۋىندا. ءبىز حات پەن قۇجاتتاردى ونىڭ اتىنا جىبەردىك. ولار، تيىسىنشە، باس پروكۋراتۋراعا جولدانعان، ەندى ەگجەي-تەگجەيلى تەرگەۋ جۇرگىزىلەدى»، - دەدى دينا سمايلوۆا.