28 ناۋرىزدا ينۆەستيسيالار جانە دامۋ ۆيسە-مينيسترى ارىستان قابىكەنوۆتىڭ موڭعوليا حالىق رەسپۋبليكاسىنىڭ تاۋ-كەن جانە اۋىر ونەركاسىپ ءمينيسترى دولگورسۋرەن سۋمياابازار باستاعان دەلەگاسياسىمەن كەزدەسۋى ءوتتى. وندا ازاماتتىق اۆياسيا جانە مينەرالدى رەسۋرستار سالالارىندا ەكىجاقتى ىنتىماقتاستىقتى دامىتۋ ماسەلەلەرى قارالدى، دەپ حابارلايدى Qamshy.kz اقپارات اگەنتتىگى ق ر پرەمەر-مينيسترىنىڭ رەسمي سايتىنا سىلتەمە جاساي وتىرىپ.

كەزدەسۋ بارىسىندا مينەرالدىق رەسۋرستار سالاسىندا ىنتىماقتاستىق تۋرالى مەموراندۋمعا قول قويىلدى، ونىڭ ماقساتى — گەولوگيا مەن جەر قويناۋىن پايدالانۋ سالاسىنداعى ەكىجاقتى قارىم-قاتىناستىڭ بەرىك نەگىزىن قالاۋ. مەموراندۋم اياسىندا تاراپتار تاۋ-كەن ونەركاسىبى سالاسى بويىنشا اقپاراتتارمەن، تاجىريبەمەن، تەحنولوگيالارمەن جانە بىلىكتىلىگى جوعارى كادرلارمەن الماساتىن بولادى.

سونداي-اق، قىمبات مەتالداردى وڭدەۋ سالاسىندا تاجىريبە الماسۋ، ناقتىراق ايتقاندا «تاۋ-كەن التىن» اففيناجدى زاۋىتىنداعى تەحنولوگيالىق پروسەستەرمەن تانىسۋ ماسەلەلەرى تالقىلاندى.

بۇدان وزگە، كەزدەسۋدە ەكى مەملەكەتتىڭ ۋاكىلەتتى ورگاندارى اراسىندا ازاماتتىق اۋە كەمەلەرىمەن بولاتىن اۆياسيالىق وقيعالاردىڭ الدىن الۋ جانە تەكسەرۋ سالاسىنداعى ىنتىماقتاستىقتى نىعايتۋ جونىندە كەلىسىمدەرگە قول جەتكىزىلدى.

«ق ر ينۆەستيسيالار جانە دامۋ مينيسترلىگى مەن موڭعوليانىڭ ازاماتتىق اۋە كەمەلەرىمەن بولاتىن اۆياسيالىق وقيعالاردىڭ الدىن الۋ جانە تەكسەرۋ بيۋروسى اراسىنداعى ءوزارا تۇسىنىستىك» تۋرالى مەموراندۋم اياسىندا تاراپتار حالىقارالىق ازاماتتىق اۆياسيا تۋرالى كونۆەنسيانىڭ 13-قوسىمشاسىندا ۇسىنىلعان تاجىريبەگە سايكەس اۆياسيالىق وقيعالاردى تەكسەرۋ، اقپاراتپەن جانە تاجىريبەمەن الماسۋدا ىنتىماقتاستىقتى دامىتۋعا نيەتتى.