استانانىڭ تەرگەۋ يزولياتورىندا اسىلىپ قالعان ءادىل نىعمەتوۆتىڭ قازاسىنىڭ سەبەبى انىقتالىپ جاتىر، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ. 

«قازاۆتوجول» مەكەمەسىنىڭ باتىس قازاقستان وبلىستىق فيليالىنىڭ بۇرىنعى ديرەكتورى ءادىل نىعمەتوۆ ءىرى كولەمدە پارا بەردى دەپ 3 جىلعا سوتتالعان بولاتىن.

نىعمەتوۆ  استاناداعى تەرگەۋ يزولياتورىندا اسىلىپ قالعان.  سۋيسيدكە بارۋىنىڭ سەبەبى ءالى بەلگىسىز.

«ءوز وزىنە قول جۇمساۋ فاكتىسىن راستايمىز. سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىندە تىركەلدى. ءتيىستى ءتيىستى ورگاندار تەكسەرۋ جۇمىستارىن جۇرگىزىپ جاتىر. سوتتالعان تەرگەۋ يزولياتورىندا شارۋاشىلىق جۇمىستارىن اتقارىپ جۇرگەن. ءولىم الدىنداعى حاتتى قالدىرعان جوق»، - دەدى قىلمىستىق-اتقارۋ جۇيەسى كوميتەتىنىڭ باسپا ءسوز قىزمەتكەرى اعىلاي تۇرلانوۆا.

ەستەرىڭىزگە سالساق، «قازاۆتوجولدىڭ» باسشىلارى مەن ايماق فيليالدارى باسشىلارىنان قۇرالعان 20 وكىلى ءىرى كولەمدە پارا بەرۋ دەرەگىمەن ۇستالعان ەدى. سولاردىڭ اراسىندا ءادىل نىعمەتوۆ تە بار. ولار بيۋدجەت قارجىسىن يگەرۋدەگى قۇيتۇرقىلىقتارىن جابۋ ءۇشىن ەسەپ كوميتەتىنىڭ 2 قىزمەتكەرىنە 16 ميلليون تەڭگە پارا بەرمەكشى بولعان. اقىرىندا نىعمەتوۆ 3 جىلعا قامالدى. الايدا، ءوزىن كىناسىزدىگىن دالەلدەمەك بولعان ول اپەللياسيالىق شاعىم تۇسىرگەنىمەن، ۇكىم وزگەرىسسىز قالعان. ءسويتىپ، ول تەرگەۋ يزولياتورىنا جابىلىپ، سوڭعى كاسساسيالىق سوتتى كۇتىپ جاتقان بولاتىن.