الماتى وبلىسىنداعى ەسىك قورعانىنان تابىلعان «التىن ادام» ماسكەۋ قالاسىنداعى «ۇلى دالا مۇراسى: زەرگەرلىك ونەر جاۋھارلارى» كورمەسىنە قويىلادى، دەپ حابارلادى Qamshy.kz اقپارات اگەنتتىگى ق ر مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساي وتىرىپ.

حالىقتىق جانە ساندىك-قولدانبالى ونەردىڭ بۇكىلرەسەيلىك مۋزەيى قازاقستان رەسپۋبليكاسى ۇلتتىق مۋزەيىمەن بىرلەسىپ ۇيىمداستىرىپ جاتقان كورمە 3 ساۋىردە اشىلادى.   

«رۋحاني جاڭعىرۋ» باعدارلاماسى اياسىندا قۇرىلعان «التىن ادامنىڭ الەم مۋزەيلەرىنە شەرۋى» حالىقارالىق جوباسىنىڭ ماقساتى ەۋرازيانىڭ ۇلى دالا بەلدەۋىنىڭ باي مادەني مۇراسىمەن شەتەلدىك قوعامداستىقتى تانىستىرۋ بولىپ تابىلادى.

كورمەنىڭ نەگىزگى ەكسپوناتى – «التىن ادام» — ەسىك (الماتى وبلىسى) قورعانىندا تابىلعان جاۋىنگەر جاساعى. ارحەولوگتار «التىن ادامنىڭ» جەرلەۋ كامەراسىننان بارلىعى 4800 اشەكەي تاپقان. بۇل بۇرىن-سوڭدى تابىلعان قورعاندار ىشىندەگى مىسىر پەرعاۋىنى تۋتانحاموننىڭ قابىرىنەن كەيىنگى ەڭ كوپ التىن اشەكەيلەر تابىلعان قورعان سانالادى.

قازاقستان رەسپۋبليكاسى ۇلتتىق مۋزەيىنىڭ قورلارىنان ءحىح عاسىر مەن حح عاسىردىڭ ورتاسىنا دەيىنگى ۋاقىتقا جاتاتىن كۇمىستەن جاسالعان ايەلدەر اشەكەيلەرى تانىستىرىلادى.

«التىن ادامنىڭ الەم مۋزەيلەرىنە شەرۋى» حالىقارالىق كورمە جوباسىنىڭ مارشرۋتىنا تمد، ازيا، ەۋروپا جانە امەريكا ەلدەرى كىرەدى.