قازاق عىلىمى اۋىر قازاعا ۇشىرادى. فيلولوگيا عىلىمدارىنىڭ دوكتورى، پروفەسسور، مەملەكەت جانە قوعام قايراتكەرى كوبەي حۇسايىن 74 جاسقا قاراعان شاعىندا ۇزاققا سوزىلعان ناۋقاستان دۇنيە سالدى، دەپ حابارلايدى Qamshy.kz اقپارات اگەنتتىگى. 

وتباسىنا، تۋعان-تۋىستارىنا، ارىپتەستەرىنە قايعىرىپ كوڭىل ايتامىز. جاتقان جەرى جايلى، توپىراعى تورقا بولسىن!

1 ساۋىردە ساعات 10:00-دە عالىمنىڭ الماتىداعى ۇيىندە (چايكوۆسكيي 131، شيەۆچەنكو كوشەسىنىڭ قيىلىسى) قارالى ميتينگ وتەدى.

13.00-دە «التىن ادام» مەيرامحاناسىندا (شاشكين 5ا، پوپوۆ كوشەسىنىڭ قيىلىسى) قوناقاسى بەرىلەدى.

ك.ش.حۇسايىن 1945 جىلى 27 ناۋرىزدا كورنەكتى مادەنيەت قايراتكەرى، دراماتۋرگ-جازۋشى شاحمەت حۇسايىن مەن حالىق ءارتىسى بيكەن ريموۆانىڭ وتباسىندا دۇنيەگە كەلدى. قازاق مەملەكەتتىك ۋنيۆەرسيتەتىن بىتىرگەن سوڭ، 1968 جىلدان باستاپ كوبەي شاحمەت ۇلى ءتىل ءبىلىمى ينستيتۋتىندا جۇمىس ىستەدى: 1968-1971 جىلدارى اسپيرانتۋرادا وقىدى، 1971-1978 جىلدارى كىشى، كەيىن اعا عىلىمي قىزمەتكەر، 1978-1982 جىلدار ارالىعىندا عالىم-حاتشى، 1982-1992 جىلدارى جەتەكشى عىلىمي قىزمەتكەر، 1992-1995 جىلدارى ديرەكتوردىڭ عىلىم جونىندەگى ورىنباسارى جانە 1995-2009 جىلدارى ارالىعىندا ق ر بعم ءتىل ءبىلىمى ينستيتۋتىنىڭ ديرەكتورى لاۋازىمدارىن اتقاردى. ك.ش.حۇسايىن ءومىرىنىڭ سوڭعى كەزىنە دەيىن ينستيتۋتتىڭ باس عىلىمي قىزمەتكەرى بولىپ جەمىستى ەڭبەك ەتتى.

ك.ش.حۇسايىن ديرەكتورلىق ەتكەن جىلدار قازاق عىلىمىنىڭ قيىن دا جاۋاپتى كەزەڭىمەن تۇسپا-تۇس كەلدى. بۇل بۇرىنعى كەڭەس تۇركىتانۋ عىلىمى مەن قازاق ءتىل ءبىلىمىنىڭ ءىرى دەربەس ۇلتتىق قازاق ءتىلتانىمى مەن وتاندىق لينگۆيستيكانىڭ ورتالىعىنا اينالعان ءساتى ەدى. وسى جىلدارى ك.ش.حۇسايىننىڭ جەتەكشىلىگىمەن قازاق عالىمدارىنىڭ الەمدىك تۇركىتانۋ عىلىمىنىڭ جاۋھارلارى قاتارىنا قوسىلعان كلاسسيكالىق ەڭبەكتەرى جارىق كوردى، اتاپ ايتساق: «قازاق ءتىلىنىڭ تۇسىندىرمە سوزدىگى» (1999 ج.)، ۇلكەن «قازاقشا-ورىسشا سوزدىك (2001 ج.)، «قازاق گرامماتيكاسى» (2003 ج.)، «قازاق ءتىلىنىڭ ورفوگرافيالىق سوزدىگى» (2000 ج.)، «قازاق ءتىلىنىڭ ورفوەپيالىق سوزدىگى» (2003 ج.)، «ورىسشا-قازاقشا سوزدىك» (2005 ج.) جانە 15 تومدىق «قازاق ادەبي ءتىلىنىڭ سوزدىگى (2006-2011 جج.).  

ك.ش.حۇسايىننىڭ عىلىمي ەڭبەكتەرى ىشىنەن قازاق ءتىلىنىڭ لەكسيكولوگيا، فونەتيكا، فونوسەمانتيكا، لەكسيكوگرافيا سالالارىنىڭ تەوريالىق ماسەلەلەرىنە، تەرمينولوگيا، مەملەكەتتىك ءتىلدىڭ قولدانىلۋى مەن قازاق ءتىل ءبىلىمىنىڭ تاريحىنا ارنالعان «ۆ.ۆ. رادلوۆ ي كازاحسكيي يازىك» (1981 ج.)،  «زۆۋكويزوبرازيتەلنوست نوميناسيي ۆ كازاحسكوم يازىكە» (1988 ج.)، «پروبلەمى فونوسەمانتيچەسكوي دەريۆاسيي» (1998 ج.)، «دىبىسبەينەلەۋىشتىك تەورياسىنىڭ نەگىزدەرى» (2009 ج.)، «قازاق-اعىلشىن فرازەولوگيالىق سوزدىگى» (2010 ج.)، «قازاقشا-اعىلشىنشا لينگۆومادەني لەكسيكا سوزدىگى» (2011 ج.)، «دىبىس-زۆۋك، ماعىنا-زناچەنيە، ءسوز-سلوۆو» (2016 ج.) اتتى كىتاپتارى حالىقارالىق تانىمالدىققا يە بولدى.

 ا.بايتۇرسىن ۇلى اتىنداعى ءتىل ءبىلىمى ينستيتۋتى جانىنداعى عىلىمي كەڭەس پەن دوكتورلىق ديسسەرتاسيالار قورعاۋ جونىندەگى ديسسەرتاسيالىق كەڭەستىك ءتوراعاسى، قازاقستان رەسپۋبليكاسى ۇكىمەتى جانىنداعى مەملەكەتتىك تەرمينولوگيا كوميسسياسى ءتوراعاسىنىڭ ورىنباسارى، حالىقارالىق «قازاق ءتىلى» قوعامىنىڭ باسقارما مۇشەسى، «ق ر ۇعا حابارشىسى» جۋرنالى رەداكسيا القاسىنىڭ مۇشەسى، «ءتىلتانىم» جۋرنالىنىڭ جاۋاپتى رەداكتورى، جوعارى اتتەستاتتاۋ  كوميسسياسى ءتورالقاسىنىڭ مۇشەسى رەتىندە ك.ش.حۇسايىن  قازاق ءتىلىن زەرتتەۋ جۇمىستارىن ۇيىمداستىرۋعا، ءتىل ءبىلىمى ماماندارىن دايارلاۋعا، قازاق ءتىلى ءبىلىمى مەن مەملەكەتتىك ءتىلدى دامىتۋعا وراسان زور ۇلەس قوستى.

ك.ش.حۇسايىن  ماسكەۋ، لەنينگراد، چەبوكسارى، قازاق (رەسەي)، بىشكەك (قىرعىزستان)، كوپەنگاگەن (دانيا)، انكارا، ىستامبۇل، يزمير (تۇركيا)، ماينس، فرانكفۋرت-نا-ماينە (گەرمانيا)، ۋترەحت، تيلبۋرگ (گوللانديا)، پراگا (چەحيا) جانە بەيجىڭ، ءۇرىمشى (جۇڭگو) قالالارىندا حالىقارالىق عىلىمي كونفەرەنسيالاردا قازاق، ورىس جانە اعىلشىن تىلدەرىندە باياندامالار جاسادى.

قازاقستان عىلىمىنا ەڭبەگى سىڭگەن قايراتكەر، رەسپۋبليكامىزدىڭ جەتەكشى عالىمدارىنىڭ ءبىرى، كورنەكتى تۇركىتانۋشى ءارى قازاق ءتىلى ءبىلىمىنىڭ مامانى، قازاق لينۆيستيكاسىنىڭ عىلىمي ورتالىعى – ا.بايتۇرسىن ۇلى اتىنداعى ءتىل ءبىلىمى ينستيتۋتىن 15 جىلعا جۋىق باسقارعان كوبەي شاحمەت ۇلى حۇسايىننىڭ بەينەسى ەسىمىزدە ارتىندا قۇندى عىلىمي ەڭبەكتەر مەن انا تىلىنە جانە وتانعا قىزمەت كورسەتۋدىڭ جارقىن ۇلگىسى بولىپ ماڭگى ساقتالماق.

حۇسايىن كوبەي شاحمەت ۇلى 1945 جىلى 27 ناۋرىزدا الماتى قالاسىندا تۋعان. 1968 جىلى قازمۋ فيلولوگيا فاكۋلتەتىنىڭ رومان-گەرمان ءبولىمىن بىتىرگەن. 1968-1971 جىلدارى ق ر عا-نىڭ ءتىل ءبىلىمى ينستيتۋتىنىڭ اسپيرانتۋراسىندا وقىعان. 1971 جىلدان وسى كەزگە دەيىن ا.بايتۇرسىن ۇلى اتىنداعى ءتىل ءبىلىمى ينستيتۋتىندا – كىشى، اعا، جەتەكشى عىلىمي قىزمەتكەر، ينستيتۋتتىڭ عالىم حاتشىسى، ديرەكتوردىڭ ورىنباسارى، ينستيتۋتتىڭ ديرەكتورى.

2009 جىلدان – لەكسيكولوگيا ءبولىمىنىڭ باس عىلىمي قىزمەتكەرى. ا.بايتۇرسىن ۇلى اتىنداعى ءتىل ءبىلىمى ينستيتۋتى جانىنداعى 10.02.02 – قازاق ءتىلى جانە 10.02.06 – تۇركى تىلدەرى ماماندىقتارى بويىنشا فيلولوگيا عىلىمدارىنىڭ دوكتورى عىلىمي دارەجەسىن الۋ ءۇشىن ديسسەرتاسيا قورعايتىن د. 53.38.01 ديسسەرتاسيالىق كەڭەستىڭ مۇشەسى، ءتوراعاسى (1998-2009 جج.) بولدى

«يسسلەدوۆانيە فونەتيكي ي لەكسيكي كازاحسكوگو يازىكا ۆ ترۋداح ۆ.ۆ.رادلوۆا» تاقىرىبىندا كانديداتتىق (1971 ج.)، «زۆۋكويزوبرازيتەلنوست نوميناسيي ۆ كازاحسكوم يازىكە» (1988 ج.) دەگەن تاقىرىپتا دوكتورلىق ديسسەرتاسيا قورعادى. نەگىزگى اينالىساتىن پروبلەمالارى: - تۇركىتانۋ؛ - تاريحي فونەتيكا؛ - فونوسەمانتيكا؛ - لەكسيكوگرافيا؛ - جالپى ءتىل ءبىلىمى؛ - سالىستىرمالى-سالعاستىرمالى لەكسيكولوگيا.

باستى ەڭبەكتەرى: «ورىسشا-قازاقشا سوزدىك» (1978 ج.، ت.ءى؛ 1981 ج.، ت.ءىى)، «ۆ.ۆ.رادلوۆ ي كازاحسكيي يازىك» (1981 ج.)، «زۆۋكويزوبرازيتەلنوست ۆ كازاحسكوم يازىكە» (1988 ج.)، «دىبىسبەينەلەۋىشتىك تەورياسىنىڭ نەگىزدەرى» (2009 ج.)، «كازاحسكو-انگلييسكيي سلوۆار-سپراۆوچنيك دليا شيروكوگو كرۋگا چيتاتەلەي». – الماتى، 2010 جانە ت.ب.