Instagram الەۋمەتتىك جەلىسىندە پايدالانۋشىنىڭ ولىمىنە بايلانىستى ەكى قىزمەت بار دەپ جازادى Qamshy.kz اقپارات اگەنتتىگى. مىسالى، ەگەر ءسىز وسى الەۋمەتتىك جەلىدە قايتىس بولعان ادامعا تيەسىلى اككاۋنتتى بايقاپ قالساڭىز، ەستەلىك مارتەبەسىن ورناتۋ ءۇشىن بۇل جونىندە قولداۋ كورسەتۋ قىزمەتىنە حابارلاۋىڭىزعا بولادى. بۇل مارتەبەنى مىنا سىلتەمە بويىنشا قولداۋ كورسەتۋ قىزمەتىنە سۇرانىس جولداۋ ارقىلى ورناتۋعا بولادى.
ول ءۇشىن نەكرولوگ نەمەسە جاڭالىققا سىلتەمە تۇرىندەگى كىسى ءولىمىن راستاۋ تالاپ ەتىلەدى. ەگەر، ءسىز مۇنداي ادامنىڭ تۋىسى بولساڭىز، وندا ينستاگرامداعى اككاۋنتتىڭ جويىلۋىنا ءوتىنىش جولداۋىڭىزعا بولادى جانە مۇنداي ءوتىنىش جولداۋ بارىسىندا الگى ادامنىڭ تۋىسى ەكەنىڭىزدىڭ دالەلى قاجەت بولادى: قايتىس بولعان ادامنىڭ تۋۋ تۋرالى كۋالىگى، قايتىس بولعان ادامنىڭ ءولىمىن راستايتىن كۋالىك، جەرگىلىكتى زاڭناماعا سايكەس، قايتىس بولعان ادامنىڭ زاڭدى وكىلى نەمەسە ونىڭ مۇلكىن باسقارۋشىسى ەكەنىڭىزدىڭ دالەلى. اككاۋنتتى جويۋدى تالاپ ەتۋ ءۇشىن مىنا سىلتەمە بويىنشا ءوتىنىش ۇلگىسىن تولتىرۋ قاجەت.
سول سياقتى Facebook الەۋمەتتىك جەلىسى دە پايدالانۋشى تۋرالى ەستەلىك قالسىن دەگەن نيەتپەن ەستەلىك مارتەبەسىن ورناتۋ مۇمكىندىگىن ۇسىنادى. مۇنى مىنا سىلتەمە ارقىلى ورىنداۋعا بولادى. ال قايتىس بولعان جاقىن ادامنىڭ اككاۋنتىن مىنا سىلتەمە ارقىلى ءوتىپ جويۋعا بولادى. بۇل ءۇشىن دە ءوز تۋىستىق جاقىندىعىڭىزدى جانە پايدالانۋشىنىڭ قايتىس بولعانىن راستاۋ قاجەت بولادى. بۇدان باسقا، Facebook قازا تاپقان ازامات ءوز پاراقشاسىندا بولىسكەن ماتەريالداردى دا ۇسىنا الادى. كەي جاعدايلاردا اتالعان جەلىنىڭ اكىمشىلىگى اككاۋنت نەمەسە ماتەريالدار تۋرالى قوسىمشا اقپارات الۋعا جولدانعان ۇسىنىستى قاراستىرۋى مۇمكىن. ول ءۇشىن ءسىز قۇزىرلى تۇلعا (مىسالى، وتباسى مۇشەسى) ەكەنىڭىزدىڭ دالەلى نەمەسە سوت بۇيرىعى قاجەت. بۇل ءوتىنىشتى مىنا جەردە راسىمدەۋگە بولادى.
ودنوكلاسسنيكي سايتىنىڭ اكىمشىلىگى قازا تاپقان ادامنىڭ پاراقشاسىن تۋىستاردان جولدانعان ارنايى ءوتىنىش بويىنشا عانا جويا الادى. ءسىزدىڭ سۇراۋىڭىز قاناعاتتاندىرىلۋى ءۇشىن قايتىس بولعان ادامنىڭ پاراقشاسىنا سىلتەمە، سونداي-اق، جولدانعان حاتقا قوسا تىركەلگەن كىسى ءولىمى تۋرالى كۋالىكتى دە ۇسىنۋ قاجەت. ەگەر، سىلتەمەنى تاپپاعان جاعدايدا، پايدالانۋشىنىڭ ءاتى-جونىن، جاسىن، تۇرعان قالا اتاۋىن جازۋعا بولادى.
مۇنداي ءوتىنىشتى مىنا سىلتەمە ارقىلى تولتىرۋعا بولادى. الايدا، مۇنداي قايعىلى جاعداي ورىن السا دا، سايت اكىمشىلىگى سىزگە قايتىس بولعان ادامنىڭ پاراقشاسى جايلى ەشقانداي اقپارات، لوگين مەن ءقۇپياسوزدى دە ۇسىنبايدى.
سونىمەن قاتار، ۆكونتاكتە الەۋمەتتىك جەلىسىنىڭ اكىمشىلىگى دە تۋىستاردان جولدانعان ءوتىنىشتى قاراستىرا الادى. مارتەبەنى راستاۋ ءۇشىن كىسى ءولىمى تۋرالى كۋالىكتىڭ فوتوسۋرەتىن نەمەسە كوشىرمەسىن ۇسىنىپ، ونى سايكەس ۇلگىدە قولداۋ كورسەتۋ قىزمەتىنە جولداۋ قاجەت. بۇل ارەكەتتەردىڭ بارلىعىن مىنا سىلتەمە ارقىلى ورىنداۋعا بولادى.
Twitter پايدالانۋشىسى قايتىس بولعان جاعدايدا سايت اكىمشىلىگى ونىڭ ەسەپتىك جازبالارىن وشىرە الادى. ول ءۇشىن قولداۋ كورسەتۋ قىزمەتىنە ونىڭ قۇقىق مۇراگەرى نەمەسە جاقىن تۋىسى حابارلاسىپ، ءوزىنىڭ تۇلعاسىن راستاۋى كەرەك جانە ءوتىنىشتى مىنا سىلتەمە ارقىلى جولداي الادى. ءوتىنىشتى جولداعاننان كەيىن اكىمشىلىك سىزگە قوسىمشا اقپاراتتاردى ۇسىنۋىڭىز ءۇشىن نۇسقاۋلىقتى ءسىزدىڭ ەلەكتروندىق پوشتاڭىزعا جىبەرەدى. بۇل جاعدايدا پايدالانۋشىعا ول اقپاراتتاردىڭ قۇپيالىلىعى جانە قارالعاننان كەيىن بارلىق قۇجاتتىڭ جويىلاتىنىنا كەپىلدىك بەرىلەدى.
پىكىر قالدىرۋ