جەزقازعان قالاسىندا كوپ قاباتتى ەكى تۇرعىن ءۇيدىڭ قۇرىلىسى باستالدى، دەپ حابارلايدى Qamshy.kz اقپارات اگەنتتىگى.

جەزقازعان قالاسىندا «نۇرلى جەر» باعدارلاماسىمەن ەكى كوپ قاباتتى تۇرعىن ءۇيدىڭ قۇرىلىسى باستالدى. ساتبايەۆ كوشەسىندە سالىنعالى جاتقان 4 قاباتتى، 36 پاتەرلى ءۇيدىڭ قۇرىلىسىنا 307،6 ميلليون تەڭگە قاراستىرىلعان. ونىڭ 276،9 ميلليون تەڭگەسى رەسپۋبليكالىق، 30،8 ميلليونى وبلىستىق بيۋدجەتتەن ءبولىنىپ وتىر. قۇرىلىس اياقتالعان سوڭ، اتالعان ءۇي باسپانا كەزەگىندە تۇرعان تۇرعىندارعا ارەندالىق باسپانا رەتىندە بەرىلەتىن بولادى.

مەملەكەتتىك باعدارلامامەن گاگارين كوشەسىندە بوي كوتەرەتىن كەلەسى 5 قاباتتى، 30 پاتەرلى ءۇيدىڭ قۇرىلىسىنا وبلىستىق بيۋدجەتتەن 274،4 ميلليون تەڭگە بولىنگەن. بۇل ءۇيدى «تۇرعىن ءۇي قۇرىلىسى جيناق بانكى» سالىمشىلارى الا الادى. ەكى نىساندا دا قۇرىلىس جۇرگىزۋشى باس مەردىگەر – «استرا سەرۆيس پليۋس» ج ش س.

-بۇل ۇيلەردىڭ قۇرىلىسىنا قاراجات جەتكىلىكتى دەڭگەيدە ءبولىنىپ وتىر. بۇگىندە قاجەتتى پروسەدۋرالاردىڭ بارلىعى ءوز رەتىمەن ءجۇرىپ جاتىر. قۇرىلىسقا قاجەت ماماندار جۇمىسپەن قامتۋ ورتالىعىندا جۇمىسسىزدار تىزىمىندە تۇرعان ازاماتتار قاتارىنان الىناتىن بولادى. ەڭ باستىسى قۇرىلىستى بەلگىلەنگەن مەرزىمدە اياقتاپ، باسپاناعا مۇقتاج تۇرعىندارعا تاپسىرۋ، - دەيدى قۇرىلىس الاڭىنا بارىپ، ونداعى جۇمىس بارىسىمەن تانىسقان جەزقازعان قالاسىنىڭ اكىمى باتىرلان احمەتوۆ.

جوسپار بويىنشا اتالعان ۇيلەردىڭ قۇرىلىسى بيىل جەلتوقسان ايىندا اياقتالماق.

دارحان مۇقانوۆ