2 ءساۋىر – اۋتيستيكالىق سپەكتر اۋىتقۋلارى بار بالالاردى قولداۋ كۇنى. وسىعان وراي قازاقستاندا اۋتيزم دياگنوزى بار بالالارعا العاش رەت كينوتەاتردا فيلم كورسەتىلدى.

بۇل ءفيلمنىڭ ەرەكشەلىگى – ەكراننىڭ جارىعى مەن دىبىسىن باسىپ كورسەتۋ. سونىمەن قاتار، ءاۋتيزمى بار بالالار تەز شارشايتىندىقتان ولارعا ارنايى دەمالىس بولمەسى ازىرلەندى. ءفيلمنىڭ كورسەتىلىمى جايىندا «بولاشاق» كورپوراتيۆتىك قورىنىڭ باسپا ءسوز حاتشىسى ايگەرىم ارعىمبايەۆا ايتىپ بەردى.

«ديسنەي لەند كومپانياسى ءاۋتيزمى بار بالالاردى قولداۋ ءۇشىن دۇنيەجۇزى بويىنشا ءوز فيلمدەرىن بالالارعا كورۋگە ىڭعايلى قىلىپ ارنايى ەرەكشەلىكتەر قوستى. مىسالى، باسقا بالالار كورىپ جۇرگەن «كوكونىڭ قۇپياسى» ءمۋلتفيلمىنىڭ ەكرانداعى جارىعىن قاراڭعىلاتىپ، دىبىسىن باستى. وتكەن جىلى ماسكەۋدەگى ءاۋتيزمى بار بالالارعا كورسەتىلدى. بيىل ءبىزدىڭ ەلىمىزدە العاش رەت وسىنداي ەرەكشى ناۋقان ءوتىپ جاتىر»، - دەدى ول.

ايگەرىم ارعىمبايەۆانىڭ ايتۋىنشا، بالالار ءۇشىن ءفيلمدى كورسەتۋ بارىسىندا وزگەرىس ەنگىزۋ قيىن بولماعان.

«كەرۋەن» ساۋدا ورتالىعىندا ورنالاسقان Kinopark كومپانياسىنىڭ ماماندارىنا نۇسقاۋلىق جۇرگىزدىك. ياعني، ءاۋتيزمى بار بالالار كينو كورگەن كەزدە قانداي قيىندىقتار بولادى، قانداي كومەك كورسەتۋ كەرەكتىگىن تۇسىندىردىك. ايتارلىقتاي پروبلەما بولمادى. ولار بالالار ءۇشىن بارىنە دايىن ەكەنىن كورسەتتى. سوندىقتان ەلىمىزدە العاش رەت ءوتىپ جاتقان فيلم كورسەتىلىمىن قولداعاندارعا العىس بىلدىرەمىز»، - دەدى ول.

قازىرگى تاڭدا استانانىڭ ءۇش مەكتەبىندە - №40، 71، 83 مەكتەبىندە ينكليۋزيۆتى ءبىلىم بەرۋ قولعا الىنىپ، قالاداعى 120-دان استام بالا وزگە بالالارمەن بىردەي ءبىلىم الىپ جاتىر.

كەشە استانادا اۋتيزم ماسەلەسىن اقپاراتتىق تاراتۋعا ارنالعان ناۋقان وتكەن بولاتىن.