الماتىدا ءاۋتيزمى بار بالالاردىڭ ماسەلەسى تالقىلاندى.

«ميلوسەرديە» قايىرىمدىلىق قوعامىنىڭ «ءاۋتيزمدى جەڭەمىز» ورتالىعى «اشىق الەم» قورىمەن بىرىگە وتىرىپ، ەرەكشە بالالارعا ەرەكشە مەرەكە ۇيىمداستىردى. بالالار تەاتر ساباعىنا، سپورتتىق شارالارعا قاتىسىپ، ويىن فلەشموبىن ۇيىمداستىردى.

مامانداردىڭ ايتۋىنشا، اۋتيزممەن اۋىراتىن بالالاردىڭ قوعامعا بەيىمدەلۋى ورتاسىنا تىكەلەي بايلانىستى. «اشىق الەم»، قورى كەلتىرگەن مالىمەت بويىنشا 2017 جىلى 3820 ادامدا، ونىڭ ىشىندە الماتىدا - 799 ادامدا اۋتيزم بەلگىلەرى انىقتالعان.

«سيندرومدى ەرتە انىقتاۋ، اتا-انانىڭ قولداۋى، وقىتۋ وتە ماڭىزدى. ءبىزدىڭ سانامىزعا توڭكەرىس كەرەك. سوندا عانا بالالارىمىز قوعامعا تەز بەيىمدەلەتىن بولادى»، - دەدى اتا-انالار.

2008 جىلدان بەرى 2 ناۋرىزدا بۇۇ اۋتيزم اۋرۋىنا شالدىققانداردىڭ كۇنىن اتاپ وتەدى. الەمدە 67 ملن اسا ادام اۋتيزم دەرتىنە شالدىققان. الەمدەگى Autism Speaks ۇيىمىنىڭ بەلگىسى كوك ءتۇستى پازل بولشەگى بولىپ تابىلادى.

2010 جىلدان باستاپ «كوك ءتۇستى جاق» ماركەتينگ اكسياسى باستاۋ الدى. بۇگىن دە قازاقستاننىڭ ءار جەرىندە اۋتيزممەن اۋىراتىنداردى قولداۋ اكسياسى ءجۇرىپ جاتىر.

اۋتيزممەن اۋىراتىن بالالار ءبىر ساتكە «اكتەر» بولدى. ەرەكشە بۇلدىرشىندەر ساحناعا شىعىپ، اتا-انالارىنا ونەرلەرىن پاش ەتتى. ولار ەشكىمنەن شىمىركپەستەن ءان ايتىپ، ولەڭ شۋماقتارىن وقىدى. ءتۇرلى كەيىپكە ەنىپ، قويىلىمدار قويدى. «ءاۋتيزمدى جەڭەمىز» جوباسىنىڭ جەتكىنشەكتەرىن لەرمونتوۆ اتىنداعى تەاتر اكتەرلارى ەكى اي بويى دايىنداعان.

«العاشىندا بالالار ءبىر توپتا جۇمىس ىستەي المادى. ءبىر بىرىنەن جاتىرقاپ، اشىلا المادى. كەيىن ۋاقىت وتە كەلە، ءبىز ولاردىڭ شىعارماشىلىق قابىلەتتەرىن اشتىق. ءقازىر وزدەرىڭىز كورگەندەي، بۇلدىرشىندەر كورەرمەندەرمەن جۇمىس ىستەپ ۇيرەندى. ساحنادا وزدەرىن ەركىن ۇستايتىن بولدى. اتا-انالار مۇنداي جەتىستىككە جەتەتىنىمىزگە سەنبەدى. ءبىراق ناتيجە جامان ەمەس»، - دەدى م.يۋ لەرمونتوۆ اتىنداعى مەملەكەتتىك اكادەميالىق ورىس دراما تەاترىنىڭ اكتەرى راۋف حابيبۋللين.

ەرەكشە بالالار ساحنادا ونەر كورسەتۋمەن شەكتەلگەن جوق. جەتكىنشەكتەرگە ارناپ سپورتتىق ويىندار ويناتىلدى. ۇيىمداستىرۋشىلار ءاۋتيزمدى جەڭۋدىڭ جالعىز جولى - بالالاردى بىر-بىرىمەن كوبىرەك ويناتىپ، شىعارماشىلىق جاعىن دامىتۋ كەرەك دەيدى.