الماتى پوليسياسى Forbes Kazakhstan جۋرنالى مەن Ratel.kz سايتى رەداكسيالارىنىڭ تىنتىلۋىنە قاتىستى تۇسىنىكتەمە بەردى، دەپ حابارلايدى قازاقپارات.

الماتى ىشكى ىستەر دەپارتامەنتىنىڭ (ءىىد) اقپاراتىنا قاراعاندا، 30 ناۋرىز كۇنى ك. ەسىمدى ازاماتتان ەكى ينتەرنەت پورتال قىزمەتكەرلەرىنىڭ ۇستىنەن «كوپە-كورىنەۋ جالعان اقپارات تاراتۋ» فاكتىسى بويىنشا ارىز تۇسكەن. بۇل فاكت بويىنشا قىلمىستىق كودەكستىڭ 274-بابى 3ء-بولىمى («كوپە-كورىنەۋ جالعان اقپار تاراتۋ») بويىنشا سوتقا دەيىنگى تەرگەۋ باستالعان.

دەپارتامەنت تەرگەۋ قۇپيالىعىنا بايلانىستى باسقا اقپارات بەرۋدەن باس تارتقان.

2 ساۋىردە الماتىدا پوليسيا Forbes كازاحستان جۋرنالى مەن Ratel.kz سايتى رەداكسيالارىنا تىنتۋگە بارعانى جانە جۋرنال رەداكتورىنىڭ ورىنباسارى الەكساندر ۆوروتيلوۆتى، Ratel.kz باس رەداكتورى مارات ءاسىپوۆ پەن ونىڭ ورىنباسارى ساپا مەكەبايەۆتى جانە جۋرناليست اننا كالاشينكوۆتى الىپ كەتكەنى حابارلانعان.

2017 جىلى الماتى سوتى بۇرىنعى قارجى ءمينيسترى، بيزنەسمەن زەينوللا كاكىمجانوۆ پەن ۇلى يلحاليد كاكىمجانوۆتىڭ پايداسىنا Forbes Kazakhstan جانە Ratel.kz-تەن 50 ميلليون تەڭگە ءوندىرىپ بەرۋ تۋرالى شەشىم شىعارعان.

Ratel.kz پەن Forbes.kz جۋرناليستىك زەرتتەۋلەرىندە «زەينوللا كاكىمجانوۆتىڭ سىبايلاس جەمقورلىققا قاتىسى بار» دەگەن تۇجىرىم جاساعان. سوت سونىمەن قاتار Forbes.kz سايتى مەن ونىڭ الەۋمەتتىك جەلىلەردەگى اككاۋنتتارىنان 10 ماقالانى جويۋعا جانە تاعى توعىز ماقالادا كەلتىرىلگەن مالىمەتتەردى تەرىستەۋگە مىندەتتەگەن. Ratel.kz سايتى سوت «شىندىققا سايكەسپەيدى» دەپ تاپقان 13 ماقالانى جويىپ، تەرىستەۋگە مىندەتتى بولعان.

سوت شەشىمىمەن كەلىسپەگەن باسىلىم جۋرناليستەرى وعان شاعىمداناتىنىن مالىمدەگەن. 30 ناۋرىزدا الماتى سوتى Ratel.kz سايتىن بۇعاتتاۋ تۋرالى شەشىم شىعارعان.