بۇگىن الماتىدا Ratel.kz جانە Forbes Kazakhstan جۋرناليستەرىنىڭ ۇستالعانى حابارلاندى.

الماتىدا Ratel.kz سايتىنىڭ باس رەداكتورى مارات ءاسىپوۆ، ورىنباسارى ساپا مەكەبايەۆ جانە جۋرناليست اننا كالاشنيكوۆا ۇستالدى.  بۇل تۋرالى سايتتىڭ Facebook-تەگى پاراقشاسىندا حابارلانعان.

Forbes Kazakhstan جۋرنالىنىڭ شىعارۋشىسى ارمانجان بايتاسوۆتىڭ حابارلاۋىنشا، بۇگىن تۇسكە تامان Ratel.kz جانە Forbes Kazakhstan جۋرنالىنىڭ رەداكسيالارىن پوليسيا ءتىنتىپ، تىرنتۋگە كەلگەندەردىڭ ءبىر توبى جۋرنال باس رەداكتورىنىڭ ورىنباسارى الەكساندر ۆوروتيلوۆتى الىپ كەتكەن.

«كەڭسەگە 12 ادام كىرىپ كەلگەندە ءبىز جۇمىس ىستەپ وتىرعانبىز. ءبىزدىڭ وتىنىشىمىزبەن ولار قۇجاتتارىن كورسەتتى: الماتى ءىىد پوليسيا قىزمەتكەرلەرى ەكەنىن بىلدىك. ولار ەكى توپ بولىپ كەلدى. الدىمەن ءبارىمىزدى كابينەتتەن شىعارىپ، تەلەفوندارىمىزدى تاپسىرۋدى بۇيىردى. كابينەتتە ورىنباسارىم الەكساندر ۆوروتيلوۆ قالدى. ءبارىمىز قالعىمىز كەلگەن، الايدا شىعۋىمىزدى تالاپ ەتتى»، - دەدى باسىلىمنىڭ باس رەداكتورى اسقار اۋكەنوۆ.

ەكى رەداكسيادا ءتىنتۋدىڭ نە ءۇشىن جۇرگىزىلىپ جاتقانى ازىرگە بەلگىسىز.

2017 جىلى الماتى سوتى بۇرىنعى قارجى ءمينيسترى، بيزنەسمەن زەينوللا كاكىمجانوۆ پەن ۇلى يلحاليد كاكىمجانوۆتىڭ پايداسىنا Forbes Kazakhstan جانە Ratel.kz-تەن 50 ميلليون تەڭگە ءوندىرىپ بەرۋ تۋرالى شەشىم شىعارعان.

Ratel.kz پەن Forbes.kz جۋرناليستىك زەرتتەۋلەرىندە «زەينوللا كاكىمجانوۆتىڭ سىبايلاس جەمقورلىققا قاتىسى بار» دەگەن تۇجىرىم جاساعان. سوت سونىمەن قاتار Forbes.kz سايتى مەن ونىڭ الەۋمەتتىك جەلىلەردەگى اككاۋنتتارىنان 10 ماقالانى جويۋعا جانە تاعى توعىز ماقالادا كەلتىرىلگەن مالىمەتتەردى تەرىستەۋگە مىندەتتەگەن. Ratel.kz سايتى سوت «شىندىققا سايكەسپەيدى» دەپ تاپقان 13 ماقالانى جويىپ، تەرىستەۋگە مىندەتتى بولعان.

سوت شەشىمىمەن كەلىسپەگەن باسىلىم جۋرناليستەرى وعان شاعىمداناتىنىن مالىمدەگەن. 30 ناۋرىزدا الماتى سوتى Ratel.kz سايتىن بۇعاتتاۋ تۋرالى شەشىم شىعارعان.