وڭتۇستىكتىڭ ءبىر توپ جاستارى 2 ءساۋىر – دۇنيەجۇزىلىك اۋتيزم ماسەلەسى تۋرالى اقپارات تاراتۋ كۇنىنە وراي «ءاۋتيزمدى جەڭەمىز!» اكسياسىن وتكىزدى. وبلىستىق جاستار رەسۋرستىق ورتالىعىنىڭ «بىزبەن بىرگە» ەرىكتىلەر توبىنىڭ 100-گە تارتا مۇشەسى مەن قالاداعى جوعارى وقۋ ورىندارىنىڭ ستۋدەنتتەرى وبلىستىق ورىس دراما تەاترىنىڭ الاڭىنا جينالدى. جاستار اۋتيزم تۋرالى اقپارات تاراتىپ، اسپانعا شارلار ۇشىرىپ، ارنايى ۆيدەروليكتەر كورسەتتى.

اكسيانى ۇيىمداستىرۋعا بەلسەنە قاتىسقانداردىڭ ءبىرى ايسۇلۋ مۇسابايەۆانىڭ ايتۋىنشا، بۇل ءىس-شارانىڭ باستى ماقساتى – اۋتيستيكالىق سپەكتر اۋىتقۋلارى بار ادامداردى قوعامدىق قولداۋ.

«الەمدىك ساراپتاما بويىنشا اۋتيزممەن اۋىراتىن بالالاردىڭ سانى ءوسىپ كەلە جاتىر. وسىعان بايلانىستى مەملەكەتتىك باعدارلامالاردى كوبەيتۋگە شاقىرىپ، ولار وزدەرىن قوعامنىڭ تولىققاندى مۇشەسى رەتىندە سەزىنۋىنە كومەكتەسكىمىز كەلەدى. ءوزىمىزدى ولارعا جانە اتا-انالارىنا ءۇمىت وتىن سىيلاۋشىسى رەتىندە كورەمىز»، - دەيدى ءوقمپۋ-دىڭ ستۋدەنتى ايسۇلۋ مۇسابايەۆا.

ايتا كەتسەك، اۋتيزم – بالا دامۋىنداعى اۋىتقۋشىلىقتىڭ اۋىر ءتۇرى. ول الەۋمەتتىك ورتامەن قارىم-قاتىناستىڭ جوقتىعىن بىلدىرەدى. سيمپتوم رەتىندە اۋتيزم كوپتەگەن پسيحيكالىق اۋرۋلاردا كەزدەسەدى، ءبىراق كەيبىر جاعدايلاردا ەرتە جاستان بايقالىپ، بالانىڭ دامۋىنا كەرى اسەرىن تيگىزەدى. بۇل جاعدايدى «ەرتە بالالىق اۋتيزم سيندرومى» دەپ اتايدى. ول بولسا پسيحيكالىق دامۋ زاقىمدالۋىنىڭ ءبىر نۇسقاسى رەتىندە قاراستىرىلادى. سونىمەن قاتار، بالا بويىندا ءاۋتيزمنىڭ كەيبىر كلينيكالىق كورىنىستەرى بايقالسا، ونى «اۋتيستيكالىق تۇلعالىق قاسيەتتەر» دەپ اتايدى. ناقتى سيمپتوم رەتىندە 2-3 جاسقا قاراي قالىپتاسۋى مۇمكىن.

قازىرگى ۋاقىتتا ءاۋتيزمنىڭ ناقتى سەبەپتەرى انىق زەرتتەلمەگەن. كوپ عالىمداردىڭ دەرەكتەرى بويىنشا، ورتالىق جۇيكە جۇيەسىنىڭ بۇزىلۋى سالدارىنان بالا وسى دەرتكە شالدىعادى. تۇقىم قۋالاۋشىلىق فاكتوردىڭ اسەرى مول ەكەنىن كوپتەگەن زەرتتەۋشىلەر مويىندايدى. سونىمەن بىرگە، اۋتيست بالالاردا ميدىڭ ورگانيكالىق زاقىمدالۋ جاعدايى دا ءجيى كەزدەسەدى.