تۇرىك سوتى «فەتحۋللاحشىلار تەرروريستىك ۇيىمىنىڭ» سەگىز مۇشەسىن تۇتقىنداۋعا وردەر بەردى. ولاردىڭ قاتارىندا «تۇركياداعى رەسەي ەلشىسى اندرەي كارلوۆتىڭ ولىمىنە قاتىسى بار» دەگەن كۇدىكپەن ۇستالعان فەتحۋللاح گۇلەن دە بار.

بۇل تۋرالى جەرگىلىكتى HABERTÜRK تەلەارناسى حابارلادى.

تەلەارنا دەرەگىنە سۇيەنسەك، سوت «كارلوۆتى ولتىرۋگە بۇيرىقتى گۇلەننىڭ ءوزى بەرگەن» دەگەن توقتامعا كەلگەن. تۇتقىندالعانداردىڭ تاعى ۇشەۋى – پوليسيا قىزمەتكەرلەرى. بۇعان قوسا Guru Medya باسپا توبىنىڭ باسشىسى، تۇركيا اقپاراتتىق-كوممۋنيكاسيالىق تەحنولوگيا باسقارماسى ءارى ەلشى مەرت بولعان فوتو كورمەنىڭ ۇيىمداستىرۋشىسى ۇستالدى.

بۇدان بۇرىن گۇلەن كارلوۆتىڭ ءولىمى ءۇشىن تۇركيانىڭ ارنايى قىزمەتى مەن قاۋىپسىزدىك قىزمەتى جاۋاپتى بولۋى كەرەك دەپ مالىمدەگەن. رەسەي سەكىلدى مەملەكەتتىڭ ەلشىسىنىڭ قورعانىسى كۇشتى بولماعانىن ەسسىزدىك دەپ تە ساناعان ەدى.

ەسكە سالا كەتەيىك، 2016 جىلى 19 جەلتوقساندا انكاراداعى فوتو كورمەنىڭ اشىلۋىندا رەسەيدىڭ تۇركياداعى ەلشىسى بولعان اندرەي كارلوۆتى اتىپ ءولتىردى. ەلدىڭ سىرتقى ىستەر مينيسترلىگى وقيعانى تەراكت دەپ باعالادى. ال شابۋىلدى ميەۆليۋت التىنشاش ەسىمدى پوليسيا قىزمەتكەرى جاسادى.

فەتحۋللاح گۇلەن 2016 جىلى 16 شىلدەگە قاراعان ءتۇنى تۇركيادا ورىن العان توڭكەرىستىڭ باستى ۇيىمداستىرۋشىسى رەتىندە تانىلدى. قازىرگى ۋاقىتتا ول اقش-تا. تۇرىك بيلىگى وپپوزيسيونەردىڭ ەلگە قايتارلىۋىن تالاپ ەتكەن، الايدا گۇلەن توڭكەرىسكە ەش قاتىسى جوق ەكەنىن ايتىپ اقتالدى.