قازاقستاندا ەلەكتروندىق ۇكىمەت پورتالىندا تۇرعىلىقتى جەرى بويىنشا ونلاين تىركەلۋ ءراسىمى وزگەردى، دەپ حابارلايدى Qamshy.kz اقپارات اگەنتتىگى «ازاماتتارعا ارنالعان ۇكىمەتتىڭ» باسپا ءسوز قىزمەتىنە سىلتەمە جاساي وتىرىپ.

ەندى ونلاين-تىركەۋ ءۇشىن ازاماتتارعا 20 مينۋت جەتكىلىكتى. سونداي-اق قازاقستان رەسپۋبليكاسىنىڭ سالىق كودەكسىنە ەنگىزىلگەن وزگەرىستەرگە سايكەس، بيىل  قاڭتار ايىنان باستاپ تىركەۋ ءۇشىن مەملەكەتتىك باج الىنبايدى.

ەسكە سالا كەتەيىك، بۇرىن ەلەكتروندىق ۇكىمەت پورتالى ارقىلى تىركەلگەندە 10 % اەك كولەمىندە مەملەكەتتىك باج تولەۋ كەرەك بولاتىن. سوسىن «ازاماتتارعا ارنالعان ۇكىمەت» مەملەكەتتىك كورپوراسيانىڭ فرونت-وفيسىنە كەلىپ، جەكە كۋالىك چيپىنە تىركەۋ تۋرالى دەرەكتەر جازباسىن ەنگىزۋ ءۇشىن كوشى-قون قىزمەتكەرىنە جۇگىنۋ قاجەت ەدى.

ال بيىلعى ناۋرىز ايىنان باستاپ پورتال ارقىلى  تۇرعىلىقتى جەرى بويىنشا تىركەلۋ ءراسىمى ايتارلىقتاي جەڭىلدەتىلدى.  ەندى جىلجىمايتىن مۇلىك يەسى جانە تىركەلەتىن ازامات egov.kz پورتالىندا تىركەلگەننەن كەيىن، تىركەلۋشى ءوتىنىش بەرىپ، مەنشىك يەسى ءوزىنىڭ ەلەكتروندىق-سيفرلىق قولتاڭباسىمەن راستاۋى ءتيىس.

ءوتىنىش بەرىلگەننەن كەيىن  دەرەكتەر شامامەن 10 مينۋتتا وڭدەلەدى، سودان كەيىن تىركەلگەن مەكەنجاي بويىنشا  انىقتاما  الۋعا  تاپسىرىس بەرۋگە بولادى.  بۇل قىزمەتكە ەسق-سى بار كەز كەلگەن ازامات قازاقستاننىڭ بارلىق ايماقتارىندا قول جەتكىزە الادى.