اقپارات جانە كوممۋنيكاسيالار ءمينيسترى داۋرەن ابايەۆ ءوزىنىڭ Facebook-تاعى پاراقشاسىندا Ratel.kz جانە Forbes.kz جۋرناليستەرىنىڭ ۇستالۋىنا قاتىستى پىكىر ءبىلدىردى، دەپ حابارلايدى Qamshy.kz اقپارات اگەنتتىگى. 

«وزدەرىڭىز بىلەسىزدەر، تەرگەۋ كاسىپكەر زەينوللا كاكىمجانوۆتىڭ جالعان اقپارات تاراتۋ تۋرالى ارىزى بويىنشا باستالعان ەدى. ارىزدانۋشىنىڭ شاعىمى سوت تاراپىنان بىرنەشە رەت قاناعاتتاندىرىلعانى دا وسىعان سەبەپ بولدى.

بۇگىندە «Forbes» سايتى ادەتتەگىدەي جۇمىسىن جالعاستىرىپ وتىر. مەنىڭ بىلۋىمشە، تەرگەۋ شارالارى بۇل باق-تىڭ ءبىر عانا قىزمەتكەرىنە قاتىستى جۇرگىزىلدى. ۇستالعانداردىڭ ەشبىرىنە پروسەسسۋالدىق شارالار قولدانىلماسا دا، بۇل جۋرناليستىك ورتانى قاتتى دۇرلىكتىردى. بۇقارالىق مەديا وكىلدەرىنىڭ الاڭداۋىن تۇسىنەمىز.

ءبىزدىڭ مينيسترلىك بىرنەشە تاۋلىك بويى قۇقىق قورعاۋ ورگاندارىمەن ۇزدىكسىز بايلانىسىپ تۇردى. ق ر اكم – ازاماتتىق مەمورگان، تەرگەۋ شارالارىنا ارالاسۋعا قۇقىعىمىز جوق.

الايدا وسى ىستەگى تاراپتارعا اراعايىن بولۋ مۇمكىندىگىن قاراستىرىپ جاتىرمىز. سونىمەن قاتار اقپارات جانە كوممۋنيكاسيالار مينيسترلىگى تەرگەۋدىڭ بارىنشا اشىق ءارى ءادىل بولۋىنا كۇش سالادى»، - دەپ جازدى مينيستر.

ەسكە سالايىق، الماتىدا Ratel.kz سايتىنىڭ باس رەداكتورى مارات ءاسىپوۆ، ورىنباسارى ساپا مەكەبايەۆ، جۋرناليست اننا كالاشنيكوۆا جانە Forbes Kazakhstan جۋرنالى باس رەداكتورىنىڭ ورىنباسارى الەكساندر ۆوروتيلوۆتى پوليسيا تۇتقىنداعان بولاتىن.

Ratel.kz پەن Forbes.kz جۋرناليستىك زەرتتەۋلەرىندە بۇرىنعى قارجى ءمينيسترلى، كاسىپكەر زەينوللا كاكىمجانوۆتىڭ «سىبايلاس جەمقورلىققا قاتىسى بار» دەگەن تۇجىرىم جاساعان. سوت سونىمەن قاتار Forbes.kz سايتى مەن ونىڭ الەۋمەتتىك جەلىلەردەگى اككاۋنتتارىنان 10 ماقالانى جويۋعا جانە تاعى توعىز ماقالادا كەلتىرىلگەن مالىمەتتەردى تەرىستەۋگە مىندەتتەگەن. Ratel.kz سايتى سوت «شىندىققا سايكەسپەيدى» دەپ تاپقان 13 ماقالانى جويىپ، تەرىستەۋگە مىندەتتى بولعان.

سوت شەشىمىمەن كەلىسپەگەن باسىلىم جۋرناليستەرى وعان شاعىمداناتىنىن مالىمدەگەن. 30 ناۋرىزدا الماتى سوتى Ratel.kz سايتىن بۇعاتتاۋ تۋرالى شەشىم شىعارعان.