اقمولا وبلىسىندا تۋعان بولەسىنىڭ قولىنان مەرت بولعان جىگىتتىڭ ولىمىنە قاتىستى سوت جالعاسىپ جاتىر. ال مارقۇم ابىلاي شىڭعىسوۆتىڭ تۋىستارى بۇل ىسكە بەس ادامنىڭ قاتىسى بولسا دا، ايىپتالۋشى ورىندىعىندا بىرەۋى عانا وتىر دەيدى. ولار ءقازىر باسقالارىنىڭ بوستاندىقتا جۇرگەنىنە نارازى، دەپ حابارلايدى Qamshy.kz اقپارات اگەنتتىگى كتك سايتىنىڭ دەرەگىن  نەگىزگە الىپ. 

قايعىلى جاعداي وتكەن جىلدىڭ جەلتوقسان ايىندا كراسيۆوە اۋىلىنداعى ۇيدە بولعان. ءقازىر ول ۇيدە ەشكىم تۇرمايدى. وڭىردە اسابالىق ونەرىمەن تانىلعان ابىلاي شىڭعىسوۆتى ءدال 30-عا تولعان  تۋعان كۇنىندە ءوز ۇيىندە ءولتىرىپ كەتكەن. تاڭعا جۋىق شىرت ۇيقىدا جاتقان وتباسىنىڭ شىرقىن بۇزعان ونىڭ تۋعان بولەسى ەكەن. سول تۇندە  جيەنىڭمىن دەگەن سوڭ، ناعاشى اپاسى زاۋرەش ەش جاماندىق ويلاماي ەسىكتى اشىپتى. ونىڭ ايتۋىنشا، قولدارىندا تەمىر سۇيمەن، اعاش ۇستاعان 4 جىگىت كىرىپ كەلىپ، ۇيقىدا جاتقان ۇلىن ۇرا باستاعان.

«ءبىزدى جىبەرمەي، ەكەۋمىزدى قايتا-قايتا ەسىك الدىنا لاقتىرىپ تاستايدى. ءولتىردى، ءولتىردى دەپ ايعايلاپ جاتىرمىن. بالالار ءبارى شىڭعىرىپ جىلاپ جاتىر. بىرەۋى عانا وتىر موينىنا العان. تورتەۋى بىردەي ۇيگە كىردى. ۇرىپ، سۇيرەلەپ الىپ شىقتى»، — دەيدى مارقۇمنىڭ اناسى زاۋرەش شىڭعىسوۆا.

سول كۇنى ابىلاي دوستارىمەن تۋعان كۇنىن اتاپ وتكەن. اناسىنىڭ ايتۋىنشا، ۇيگە ماساڭ كۇيدە ورالىپتى. سول كۇنى بولەلەردىڭ اراسىندا ءبىر-بىرىن اراققا جۇمساپ، سول ءۇشىن  كيكىلجىڭ بولعانىن كەيىن ەستىگەن. ءبىراق تۇككە تۇرعىسىز دۇنيەگە بولا 2 بولەسىنىڭ جىگىتتەرمەن كەلىپ ادام ءولتىرۋى ميعا سىيمايدى،-دەيدى اناسى. ءقازىر وتباسى بوستاندىقتا جۇرگەندەردەن قورقىپ ءارى قاندى قىلمىستىڭ كۋاگەرى بولعاندىقتان ءۇيدى تاستاپ كەتكەن. 

«ەكى بالا مىنە، كىشكەنتاي كورىپ تۇرسىزدار. سولار ءۇشىن قورقىپ،قاشىپ كەتۋدى ويلادىق. ءقازىر قوستانايدا تۋىستاردىڭ ءۇيىن جاعالاپ ءجۇرمىز. ويتكەنى ءۇيىمىز جوق باسىمىزدا»، — دەيدى مارقۇمنىڭ ايەلى اقبوتا مىرزاحمەتوۆا.

مارقۇمنىڭ تۋىستارىنىڭ اشۋىن كەلتىرىپ وتىرعانى دا وسى جاعداي عوي. نەگىزى، ابىلايدى سىرتتا قالىپ قويعان بەسىنشى ادام، ياعني جاڭاعى بولەسى ولتىرگەن كورىنەدى. ال قالعان تورتەۋدىڭ ۇشەۋى جەڭىلدەۋ باپ بويىنشا تەرگەلىپ جاتىر ەكەن.

«قازىرگى ۋاقىتتا ول 3 كۇدىكتىگە قاتىستى «تۇرعىن-جايعا ادامنىڭ ەركىنەن تىس باسىپ كىرۋ» بابى بويىنشا قىلمىستىق ءىس قوزعالدى. ولار 2 جىلعا دەيىن باس بوستاندىعىنان ايىرىلۋى مۇمكىن. ءقازىر  قولحاتپەن بوستاندىقتا ءجۇر»، — دەپ ءتۇسىندىردى اقمولا وبلىستىق ءىىد باسپا ءسوز قىزمەتىنىڭ جەتەكشىسى گۇلنار پينچۋك.

ال كراسيۆوەدەگى قاندى وقيعانى توپتاسىپ كىسى ءولتىرۋ دەپ سانايتىن جابىرلەنۋشى تاراپ بۇگىن پروكۋراتۋرادان ءىستىڭ قايتا تەرگەلۋىن تالاپ ەتتى. ولار ادىلدىككە جەتپەي قويمايمىز دەيدى. ايتا كەتەيىن، بوستاندىقتا جۇرگەن تورتەۋدىڭ دە بىرەۋى مارقۇمنىڭ بولەسى ەكەن.