Qamshy.kz اقپارات اگەنتتىگىنە الماتى وبلىسىنان گۇلسانات ەسىمدى وتانداسىمىز حابارلاسىپ، باسىنداعى قايعىسىن ايتىپ، كومەك سۇرادى.

ۆيدەوۇندەۋ جولداعان ءۇش بالالى كەلىنشەكتىڭ ايتۋىنشا، كۇيەۋى ەكى جىلدان بەرى قىتايدان ەلگە ورالا الماي جاتىر ەكەن.

«ەسىمىم – گۇلسانات، كەربۇلاق اۋدانى، باسشي اۋىلىندا تۇرامىن. ءوزىم ءۇش بالانىڭ اناسىمىن، كۇيەۋىم قىتايدا. جۇڭگو پاسپورتىنىڭ ءبىتۋى سەبەبىنەن 2016 جىلى 20 ناۋرىزدا كەتكەننەن ەلگە ءالى ورالا الماي وتىر. سول ەلدە پاسپورتىن تارتىپ الىپ، ءال كۇنگە دەيىن بەرمەي جاتىر. ال ءبىز بولساق مىنا جاقتا ارەڭ كۇنەلتۋدەمىز»، - دەپ قىنجىلادى ءۇش بالانىڭ اناسى.

جاس كەلىنشەكتىڭ ايتۋىنشا، قىستاي تالاي ازاپتاردى باسىنان كەشىرگەن ەكەن.

«مەيىرىمدى كىسىلەر كومەكتەسىپ تە جاتتى، سىرتقا شىعىپ ەركەك بولامىن، ۇيگە كىرىپ ايەل بولامىن. ايتەۋىر ولمەستىڭ كۇنىن كورىپ جاتىرمىز»، - دەپ كوز جاسىنا ەرىك بەرە وتىرىپ، قينالعانىن جەتكىزدى.

ءوز سوزىندە قازاقستان ۇكىمەتى مەن جاۋاپتى لاۋازىمدى تۇلعالاردان كومەك سۇراپ، جارىنىڭ قازاقستانعا ورالۋىنا جاعداي جاساۋىن سۇرادى.

«كۇيەۋىم كەتكەلى ەكى جىل بولدى، سول ۋاقىتتان بەرى كورمەگەنىم جوق. ءۇش ۇرپاعىم ءۇشىن ءومىر ءسۇرىپ كەلەمىن. امالدىڭ جوعىنان ارەڭ دەگەندە شىداپ ءجۇرمىن. ۇلكەن ۇلىم قىتايدا تۋىلعان، قالعان ەكى بالامدى وسى ەلدە دۇنيەگە اكەلدىم. ەكەۋى قازاقستاننىڭ ازاماتى، مەن دە وسى ەلدىڭ ازاماتىمىن. ال كۇيەۋىم سول قىتايدا تۋىلعان. بۇل جاققا كەلگەندە سول جۇڭگو پاسپورتىمەن ۆيزا اشتىرىپ كەلىپ تۇراتىن. ۆيزاسىنىڭ ۋاقىتى بىتكەندىكتەن ەلگە قايتادان ورالا الماي وتىر. ءقازىر، ءتىپتى، سويلەسۋىمىز دە قيىنعا ءتۇستى. Wechat جەلىسىندە سويلەسىپ تۇراتىنبىز، ءقازىر ول جەردە دە سويلەسە المايتىن بولدىق، حابارسىز قالدىق. قازاقستانداعى كەيبىر مەيىرىمدى اعالاردىڭ ارقاسىندا قىستان امان-ەسەن شىقتىم. ەندى ارى قاراي قالاي ءومىر سۇرەمىن، كۇيەۋىم جوق، بىلمەيمىن»، - دەيدى ءۇش بالانىڭ اناسى.

ءسوزىنىڭ سوڭىندا: «قازاقستان وتانىم، قازاق ەلىم دەپ كەلگەن ەم،

                                    ۇرپاق ءۇشىن ءوتىپ جاتىر ازاپتى مەنىڭ كۇندەرىم.

                                    باسقا تۇسسە باسپاقشىل دەگەن ەكەن

                                    ءتىرى جەسىر، ءتىرى جەتىمنىڭ كۇيىن كەشتىم»، - دەپ كۇيىندى.

ايتا كەتسەك، سوڭعى ۋاقىتتا قىتايداعى قانداس باۋىرلارىمىزعا قاتتى قىسىم جاسالىپ جاتقانى بەلگىلى. سونىڭ سالدارىنان ازاپ شەگىپ وتىرعان ءبىر ەمەس، بىرنەشە جانۇيا بار.