قازاقستان پرەزيدەنتى نۇرسۇلتان نازاربايەۆ بالالاردىڭ تاربيەسى جونىندە پىكىر ءبىلدىردى، دەپ جازادى Qamshy.kz اقپارات اگەنتتىگى.

«جاڭا گۋمانيتارلىق ءبىلىم. قازاق تىلىندەگى جاڭا وقۋلىق» جوباسى اياسىندا شىققان العاشقى وقۋلىقتاردىڭ تۇساۋكەسەرىندە ەلباسى تىلدەردى مەڭگەرۋدىڭ مۇمكىندىكتەرىمەن ءبولىستى.

«قانشا ءتىل مەڭگەرسەڭ، سونشالىقتى مادەنيەتتىسىڭ» دەگەن بار. ال ول وڭاي ەمەس. كەي كەزدەرى ونسىز دا قولدارى بوساماي جۇرگەن بالالاردى اياپ كەتەسىڭ. ءبىزدىڭ ۋاقىتتاعى بالالاردى وقىتپاعان. اتا-انالاردىڭ باستى مىندەتى – اش قالماۋ ەدى. بالانى ويلايتىن شاما بولعان جوق. ال ءقازىر ءبارى باسقاشا. بالالاردى ماجبۇردەۋ كەرەك»، - دەدى نۇرسۇلتان نازاربايەۆ.

ءوز سوزىندە مەملەكەت باسشىسى نەمىس فيلوسوفى شوپەنگاۋرەدى ۇلگى رەتىندە كورسەتتى.

«ەۋروپانىڭ ۇلى عالىمى بيوگرافياسىندا وزىنە تيەسىلى دۇنيەنى جاتتاماعانى ءۇشىن اكەسى ءۇش كۇن بويى اش قالدىرعان. ۇلى كومپوزيتورلار دا سولاي تاربيەلەندى. ولار دا بالا كۇنىندە قينالعان شىعار، ەسەسىنە جەمىسىن كوردى»، - دەدى نازاربايەۆ.

بۇعان قوسا نۇرسۇلتان نازاربايەۆ شەت تىلدەردى مەڭگەرۋدىڭ ارتىقشىلىقتارىمەن ءبولىستى.

«بىرنەشە ءتىلدى بىلگەن ادام ءۇشىن كەز كەلگەن ەسىك اشىق. جاڭا قىزمەتكەرلەر ىزدەپ جۇرگەن شەتەلدىك كومپانيالار كوپ ەلىمىزدە. ءتىل بىلمەگەن ادامدى قالاي الادى؟»، - دەدى.

بالالاردىڭ ءۇش ءتىلدى مەڭگەرۋى ءۇشىن ەلدە ءتۇرلى جاعدايلاردىڭ جاسالعانىن دا ەسكەرىپ ءوتتى.

«جاقسىنىڭ ءبارى تەك بالالار ءۇشىن. شۆەيسارياعا بارساڭىز، تاكسيشىنىڭ ءوزى ءتورت تىلدە سويلەي الادى. سەبەبى وندا اعىلشىن، نەمىس، فرانسۋز جانە يتاليان تىلدەرىن ءبىلۋ مىندەتتەلگەن. ءارى سول تىلدەردىڭ ءبارى مەملەكەتتىك بولىپ سانالادى. تۇسىنسىزدەر مە؟»، - دەدى مەملەكەت باسشىسى.