بۇگىن استانادا ايەل قۇقىقتارىن قورعاۋ جانە گەندەرلىك تەڭدىك ماسەلەسىنە قاتىستى كونفەرەنسيا ءوتتى، دەپ حابارلايدى Qamshy.kz اقپارات اگەنتتىگى.

شىعارماشىلىق ايەلدەر باستاماسى ليگاسى سوروس-قازاقستان قورىنىڭ قولداۋىمەن، ق ر پرەزيدەنتى جانىنداعى ايەل ىستەرى جانە وتباسىلىق دەموگرافيالىق ساياسات جونىندەگى ۇلتتىق كوميسسيانىڭ قاتىسۋىمەن «قازاقستانداعى ايەلدەر قۇقىعى: مۇمكىندىكتەر مەن كەدەرگىلەر» اتتى كونفەرەنسيا ۇيىمداستىردى. جيىندا قوعامداعى ايەلدەردىڭ ءرولى ءسوز بولدى. سونىمەن قاتار قوعامدا كوپ تالقىعا تۇسەتىن گەندەرلىك ساياسات، تۇرمىستىق زورلىق-زومبىلىق، ايەلدەردىڭ ساياساتقا ارالاسۋى سىندى ماڭىزدى ماسەلەلەر ايتىلدى.

– بۇگىنگى كونفەرەنسيانىڭ ماقساتى – ايەل قۇقىعىن قورعاۋدى ىلگەرىلەتۋگە كەدەرگى كەلتىرەتىن ماسەلەلەردى تالقىلاۋ جانە مۇمكىندىكتەردى كەڭەيتۋ. «ايەلدى ايالا» اتتى ءبىر جىلعا سوزىلاتىن كامپانياعا بارشامىز قولداۋ كورسەتۋ ماقساتىندا دا وسى جيىندى ۇيىمداستىرىپ وتىرمىز، - دەدى سوروس-قازاقستان قورىنىڭ وكىلى ايدا ايدارقۇلوۆا.

ونىڭ ايتۋىنشا، «ايەلدى ايالا» – قازاق تىلىندە جاسالعان ەڭ العاشقى جالپىرەسپۋبليكالىق كامپانيا ەكەن.

– وكىنىشتىسى، ءقازىر ايەلدەردىڭ قۇقىعىن تاپتاپ، ءتۇرلى زورلىق-زومبىلىققا ۇشىراتاتىن جاعدايلار كوپ بولىپ جاتىر. ءبىراق قوعام رەتىندە وسىنداي جاعدايلارعا قالاي توقتاۋ قويامىز دەگەن ماسەلەلەر ونشا قاراستىرىلمايدى. ايەل قۇقىعىن شەكتەۋ جانە ونداعى كەدەرگىلەر ماسەلەسىن شەشۋ – تەك بيلىكتىڭ عانا مىندەتى ەمەس، ەڭ ءبىرىنشى قوعامنىڭ مىندەتى، - دەدى ايدا ايدارقۇلوۆا.

كونفەرەنسيا جۇمىسىنا ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتوراعاسىنىڭ ورىنباسارى ءلاززات سۇلەيمەن، ق ر ادىلەت ۆيسە-مينيسترى ەلۆيرا ءازىموۆا، ۇەۇ وكىلدەرى، ەلىمىزگە تانىمال تەلەجۋرناليست ءلايلا سۇلتان قىزى، سوروس-قازاقستان قورىنىڭ باسقارما ءتوراعاسى انتون ارتەموۆ، قۇقىق قورعاۋشىلار، ب ا ق وكىلدەرى مەن قوعام قايراتكەرلەرى قاتىستى.

– ەلىمىزدە ايەلدەردىڭ قۇقىعىن جۇزەگە اسىرۋعا كەدەرگى بولاتىن قاۋىپ-قاتەرلەر تۋرالى قوعامنىڭ باسىم بولىگىن تارتا وتىرىپ، مەملەكەتتىك ورگان وكىلدەرىنىڭ قاتىسۋىمەن بەيرەسمي، اشىق پىكىرتالاس الاڭدارىندا، فورۋمداردا بارىنشا كەڭىنەن تالقىلاۋ كەرەك، - دەيدى شىعارماشىلىق ايەلدەر باستاماسى ليگاسىنىڭ پرەزيدەنتى ءاسيا حايرۋلينا.

كونفەرەنسيا اياسىندا «كيىمدى كىنالاما»، «ۇيات» اتتى كورمەلەر وتكىزىلدى.

ايتا كەتسەك، ايەل قۇقىعىن قورعاۋ جونىندەگى اقپاراتتىق ناۋقان جىل سوڭىنا دەيىن سوزىلادى.