الەۋمەتتىك جەلىنى بەلسەندى قولداناتىن ساياساتكەرلەر ساۋساقپەن سانارلىق. كەيبىر ساراپشىلاردىڭ ايتۋىنشا، مەملەكەتتىك قىزمەتكەرلەردىڭ ينتەرنەتتە پىكىرىن اشىق بىلدىرۋىنە بيۋروكراتيالىق جۇيەنىڭ جازىلماعان زاڭدارى كەدەرگى كەلتىرەدى ەكەن. Qamshy.kz اقپارات اگەنتتىگى ءتۇرلى ماسەلەلەر تۋرالى Facebook-تا وي ءبولىسىپ وتىراتىن شەنەۋنىكتەردىڭ ءتىزىمىن ۇسىنادى.
داۋرەن ابايەۆ، ق ر اقپارات جانە كوممۋنيكاسيالار ءمينيسترى
الەۋمەتتىك جەلىدە ءوزىنىڭ بەلسەندى قىزمەتى مەن بەرىك ۇستانىمى ارقىلى وزەكتى ماسەلەلەرگە ءۇن قوسىپ، ءوز ويىن ەكى تىلدە جازىپ وتىراتىنداردىڭ ءبىرى – داۋرەن ابايەۆ. Facebook جەلىسىندە ق ر اقپارات جانە كوممۋنيكاسيالار ءمينيسترىنىڭ 12 مىڭنان استام وقىرمانى بار. مينيستر ءوز پاراقشاسىندا اقپارات سالاسىنداعى شەشىمدەرىن جاريالايدى. جىل باسىندا ب ا ق تۋرالى زاڭعا ەنگىزىلگەن وزگەرىستەردى جەلى قولدانۋشىلارى ءبىرشاما تالقىلاعان ەدى. ءتۇرلى سىني پىكىرلەرگە جاۋاپ قايتارۋ ءۇشىن داۋرەن ابايەۆ Facebook-تە ۆيدەوۇندەۋ جاساپ، زاڭ جوباسىنا قاتىستى تۇسىنىكتەمە بەردى.
ايتا كەتەيىك، مينيستر ابايەۆ Facebook جەلىسىنە 2016 جىلدىڭ مامىرىندا تىركەلگەن. سول ۋاقىتتان بەرى الەۋمەتتىك جەلىدە اجەپتاۋىر تانىمالدىققا يە بولدى.
ارىستانبەك مۇحامەدي ۇلى، ق ر مادەنيەت جانە سپورت ءمينيسترى
مادەنيەت جانە سپورت ءمينيسترى ارىستانبەك مۇحامەدي ۇلى ءوزىنىڭ Facebook-تاعى پاراقشاسىن 2016 جىلدىڭ سوڭىنا تامان اشقان. بۇگىندە جەلى قولدانۋشىلارى ءبىرشاما جاڭالىقتى ءمينيستردىڭ جەكە پاراقشاسىنان كورىپ، بىلەدى. سونىمەن قاتار قوعام تالقىسىنا ءتۇسىپ، جەلىنى شۋلاتقان ءبىرقاتار ماسەلەلەرگە قاتىستى دا مينيستر ءوز پاراقشاسى ارقىلى پىكىرىن ءبىلدىرىپ، پوزيسياسىن ايقىنداپ وتىرادى. ارىستانبەك مۇحامەدي ۇلىنىڭ Facebook-تا 1000-نان استام وقىرمانى بار.
اسەت ەسەكەشيەۆ، استانا قالاسىنىڭ اكىمى
استانانىڭ اكىمى اسەت ەسەكەشيەۆ –Facebook جەلىسىن وتە بەلسەندى قولداناتىنداردىڭ ءبىرى. الەۋمەتتىك جەلىگە تىركەلگەن باسقا شەنەۋنىكتەرمەن سالىستىرعاندا، ەڭ كوپ وقىرمان دا ەلوردا باسشىسىندا. بۇگىندە ونى 38 مىڭعا جۋىق جەلى قولدانۋشىسى باقىلاپ وتىرادى. استانا اكىمى Facebook-تاعى پاراقشاسىن 2008 جىلى اشقان. ول ءوز پاراقشاسىندا ۇنەمى قالانىڭ تىنىس-تىرشىلىگىنەن وقىرماندارىن حاباردار ەتىپ، ەلورداداعى قۇرىلىس نىساندارىنىڭ جۇمىسىنا قاتىستى جاڭالىقتاردى بولىسەدى. سونىمەن قاتار جۇمىس بابىمەن بارعان ءىسساپارلارىن دا جازىپ وتىرادى. رەسمي مالىمەتتەردەن بولەك، اسەت ەسەكەشيەۆ قالادا ورىن العان وقىس وقيعالار، جول اپاتتارى نەمەسە باسقا دا كەلەڭسىز جاعدايلار تۋرالى ايتىپ، وقىرماندارىنان تۋىنداعان قولايسىزدىقتار ءۇشىن كەشىرىم سۇرايدى. قالا اكىمىنىڭ تاعى ءبىر ەرەكشەلىگى، ول Facebook-تا ساياساتقا ەش قاتىسى جوق كۆن، فۋتبول ويىندارى جايىندا دا ءسوز قوزعاعاندى جاقسى كورەدى. سوندىقتان شىعار، استانا باسشىسىنا جەلى قولدانۋشىلارى ىستىق ىقىلاستارىن ءبىلدىرىپ جاتادى. باق-تاردا كەلتىرىلگەن دەرەكتەرگە سۇيەنسەك، اسەت ەسەكەشيەۆ الەۋمەتتىك جەلىدە استانانىڭ تازالىعىنا بايلانىستى ساۋالدارعا تەز جاۋاپ قايتارادى ەكەن.
جەڭىس قاسىمبەك، ق ر ينۆەستيسيا جانە دامۋ ءمينيسترى
جەڭىس قاسىمبەك ءوز پاراقشاسىندا كوبىندە مينيسترلىكتىڭ اتقارعان جۇمىستارى مەن ونىڭ ناتيجەلەرى جايىندا جازادى. ەلدەگى قۋانىشتى حابارلاردى سۇيىنشىلەپ وتىرعاندى دا ۇناتادى. ءمينيستردىڭ پاراقشاسىنان وليمپياداداعى جەڭىستەر، «نۇرلى جەر» مەملەكەتتىك باعدارلاماسىنىڭ وڭ ناتيجەلەرى، ەلباسى جولداۋى تۋرالى پوستتاردى كوپتەپ كەزدەستىرۋگە بولادى. جەڭىس قاسىمبەك نەگىزىنەن ەكونوميكاعا قاتىستى ءسوز قوزعاپ وتىرادى. ق ر ينۆەستيسيا جانە دامۋ ءمينيسترىنىڭ جەلىدە 4300-دەي وقىرمانى بار.
بەكبولات تىلەۋحان، ق ر پارلامەنتى ءماجىلىسىنىڭ دەپۋتاتى
باسى داۋدان ارىلمايتىن، قوعامدىق ءومىردىڭ بەل ورتاسىندا جۇرگەن بەكبولات تىلەۋحانوۆ تا – Facebook-تىڭ وتە بەلسەندى قولدانۋشىسى. ءماجىلىس دەپۋتاتى الەۋمەتتىك جەلىدەگى پاراقشاسىندا كوبىنەسە جاستارعا، حالىققا ۇلگى بولارلىق عيبراتتى اڭگىمەلەر مەن جازبالار قالدىرىپ، تانىمدىق فوتو، ۆيدەولارمەن ءبولىسىپ وتىرادى. سونىمەن بىرگە قوعامدا ءورشىپ تۇرعان وزەكتى ماسەلەلەرگە قاتىستى ءوز ويىن جەلى ارقىلى جەتكىزەدى. بەكبولات تىلەۋحاننىڭ Facebook-تا 5 مىڭنان استام وقىرمانى بار.
اليك شپەكبايەۆ، مەملەكەتتىك قىزمەتتەر جانە جەمقورلىققا قارسى اگەنتتىك ءتوراعاسى
مەملەكەتتىك قىزمەتتەر جانە جەمقورلىققا قارسى اگەنتتىك ءتوراعاسى وتكەن جىلدىڭ سوڭىنا قاراي Facebook-كە تىركەلىپ، جەكە پاراقشاسى بار شەندىلەردىڭ قاتارىنا قوسىلدى. اليك شپەكبايەۆ ءبىر كۇننىڭ ىشىندە 1800-دەي وقىرمان جيناپ العان. ءقازىر ونى وقيتىنداردىڭ سانى 5500-گە جۋىقتاعان.
«بۇگىندە كرەاتيۆتى ويلاي الاتىن ادامداردىڭ پىكىرى ءبىز ءۇشىن اسا ماڭىزدى. ال Facebook جەلىسى كەز كەلگەن ادامنىڭ داۋىسىن ەستي الۋعا تاپتىرماس مۇمكىندىك بەرەدى، سوندىقتان وسى جەردە ءوزىمنىڭ جەكە پاراقشامدى اشىپ وتىرمىن»، - دەپ جازدى اليك شپەكبايەۆ. اگەنتتىك ءتوراعاسىنىڭ بۇل پوستىنا ءبىرشاما پىكىرلەر جازىلدى. ءوز پاراقشاسىندا جەمقورلىققا قارسى ءىس-قيمىل اگەنتتىگىنىڭ اتقارىپ جاتقان جۇمىستارىمەن ءبولىسىپ وتىراتىن شەنەۋنىكتىڭ ءار پوستى جەلىدە قاتتى تالقىلانادى.
باعدات مۋسين، ق ر باس پروكۋراتۋراسىنىڭ ارنايى ەسەپ پەن قۇقىقتىق ستاتيستيكا دەپارتامەنتىنىڭ باسشىسى
باعدات مۋسين Facebook-تاعى پاراقشاسىندا مەملەكەتتىك قىزمەتكەرلەردىڭ جۇمىسىنا قاتىستى ءوز پىكىرىن ورتاعا سالىپ، جەلى قولدانۋشىلارىمەن بىرگە تالقىلاعاندى ۇناتادى. سونىمەن قاتار ءوزى وقىعان كىتاپتار جايىندا وي قوزعاپ، العان اسەرىمەن دە ءبولىسىپ وتىرادى. 2017 جىلى اتالمىش جەلىدە ءوز پاراقشاسىن اشقان باعدات مۋسين جالىندى ءھام موتيۆاسيالىق سوزدەرگە قۇمار. ونىڭ 16 مىڭعا تارتا وقىرمانى بار.
قاسىم-جومارت توقايەۆ، ق ر پارلامەنتى سەناتىنىڭ ءتوراعاسى
سەنات ءتوراعاسى قاسىم-جومارت توقايەۆ Facebook جەلىسىنە قاراعاندا Twitter جەلىسى قولدانۋعا وتە ىڭعايلى دەپ ەسەپتەيدى. شەنەۋنىكتىڭ Twitter-دەگى پوستتارىن 160 مىڭنان استام وقىرمان كورە الادى ەكەن. ساياساتكەر اتالمىش جەلىدە الەۋمەتتىك-ساياسي وقيعالارمەن ءبولىسىپ وتىرادى، وقتا-تەكتە ءوز پىكىرىن جازىپ قالدىرادى. قاسىم-جومارت توقايەۆتىڭ لاتىن الىپبيىنە قاتىستى جازعان پوستى جەلى قولدانۋشىلارى اراسىندا كەڭىنەن تالقىلانىپ، ەڭ كوپ پىكىر جازىلعان جازباعا اينالدى. ءدال سول مەزەتتە لاتىن ءالىپبيىنىڭ اپوستروفپەن جاسالعان نۇسقاسىنا قاتىستى جەلىدە شۋ شىعىپ جاتقان بولاتىن.
سونىمەن، الەۋمەتتىك جەلىنى بەلسەندى قولداناتىن بيلىك وكىلدەرىنىڭ ءتىزىمى وسىنداي. ايتپاقشى، ءبىر كەزدەرى Facebook-تا تۇراقتى قولدانۋشىسى بولىپ، كەيىن پاراقشاسىن قاراۋسىز قالدىرعان شەندىلەر دە جوق ەمەس. كارىم ءماسىموۆ ۇقق ءتوراعاسى قىزمەتىنە سايلانعاننان باستاپ جەلىدە قانداي دا ءبىر پوست جازۋىن توقتاتقان بولسا، ونىڭ ورىنباسارى داۋلەت ەرعوجين قىزمەتكە تاعايىندالا سالىسىمەن ءوز اككاۋنتىن مۇلدە ءوشىرىپ تاستاعان.
پىكىر قالدىرۋ