بۇگىن شىمكەنت قالاسىندا ق ر پرەزيدەنتى جانىنداعى جاستار ساياساتى جونىندەگى كەڭەسىنىڭ ءححى وتىرىسى ستۋدەنت جاستارمەن جانە بەلسەندىلەرمەن كەزدەسۋ ءوتتى. كەزدەسۋ بارىسىندا جاستار قازاقستان رەسپۋبليكاسىنىڭ پرەزيدەنتى ن.ءا. نازاربايەۆقا بەس الەۋمەتتىك باستاماعا قولداۋ ءبىلدىرىپ،  العىسپەن ۇندەۋ جولدادى.

بارشا جاستاردىڭ اتىنان ەلباسىنىڭ اتىنا ۇندەۋدى «قازاقستان ستۋدەنتتەرى اليانسى» رەسپۋبليكالىق ستۋدەنتتەر قوزعالىسىنىڭ ليدەرى ءىلياس تۇستىكبايەۆ جاريالادى.

«ەلىمىزدىڭ بارلىق ستۋدەنتتەرىنىڭ اتىنان، سىزگە ءاردايىم تۇراقتى جانە پەرسپەكتيۆالى دامۋعا، ءبىلىم بەرۋ سالاسىندا جانە ستۋدەنت جاستاردىڭ شىعارماشىلىق وسۋىنە، العا قويعان جوسپارلاردى ىسكە اسىرۋدا كورسەتكەن وراسان قولداۋىڭىز ءۇشىن شەكسىز العىسىمدى بىلدىرەمىن.

بۇگىندە ەلىمىزدە جاستاردىڭ رۋحاني جانە پوتەنسيالدارىنىڭ دامۋىنا بارلىق مۇمكىندىك جاسالعان. ءسىز جاريالاعان الەۋمەتتىك جاڭعىرۋعا باعىتتالعان 5 الەۋمەتتىك باستاما جاستاردىڭ دامۋى مەن قالىپتاسۋ جولىندا قۋاتتى قولداۋ بولىپ تابىلادى. اتالعان باعدارلامالار جاستارعا دەگەن مەملەكەت قامقورلىعىنىڭ ايقىن كورىنىسى دەپ بىلەمىز»، - دەپ ايتىلعان ۇندەۋدە.

«نارىقتىق ەكونوميكادا ادامي كاپيتالى ءبىرىنشى ورىنعا شىعادى. جوسپارلانعان گرانتتار، ەلىمىزدەگى ءاربىر ەكىنشى جاستىڭ جوعارى ساپالى جانە قولجەتىمدى ءبىلىم الۋ ءۇشىن ۇلكەن كومەك كورسەتەدى، جاس مامانداردىڭ قازاقستاندا عانا ەمەس، سونداي-اق شەت ەلدەردە باسەكەگە قابىلەتتىلىگىن ارتتىرۋعا زور مۇمكىندىك بەرەدى. جوسپارلانعان جاڭا 75 مىڭ ورىندىق ستۋدەنتتىك جاتاقحانالار مەملەكەت تاراپىنان جاستاردىڭ ساپالى ءبىلىم الۋعا دەگەن باسا نازارىنىڭ ايقىن كورىنىسى.

ءبىز جاس مەملەكەتپىز. ءبارى ءالى الدىمىزدا، بارلىق جولدار اشىق، جاڭا مۇمكىندىكتەر ىسكە اسۋىن كۇتۋدە، وسىنىڭ بارلىعى بىزگە ەرەكشە سەرپىلىس بەرەدى. ەلىمىزدىڭ كوڭىلى جايلى، تۇرمىسى مايلى بولۋ جولىندا تىڭ مىندەتتەردى تىندىرىمدى جۇمىسقا ۇلاستىرۋعا بار كۇشىمىزدى سالامىز!»، - دەپ جازىلعان جاستار ۇندەۋىندە.

ەل جاستارى مەملەكەتىمىزدىڭ ودان ءارى دامىپ، گۇلدەنۋ جولىندا ءالى دە تالاي ءىستىڭ جۇزەگە اسىرىلۋى ءتيىس ەكەنىن تۇسىنە وتىرىپ، الەۋمەتتىك مەملەكەت پەن ۇلتتىق وركەندەۋدىڭ شىنايى، ءارى سىندارلى قازاقستاندىق مودەلىن بىرگە جاساۋعا دايىن ەكەندىكتەرىن اتادى.