قىرعىزستان استاناسى بىشكەكتە 20 ساۋىردە ميتينگ وتەدى دەپ جوسپارلانىپ وتىر. بەلسەندىلەر بيلىكتەگىلەردىڭ نازارىن قىرعىزستاندىق قىزدارعا اۋدارۋدى كوزدەپ وتىر. بۇل جايىندا قىرعىزستان جاڭالىقتارى حابارلايدى.

ميتينگكە شىعۋشىلار قىرعىز قىزدارىنا بەلگىلى ءبىر جاسقا جەتكەنشە ەلدەن شىعۋعا تىيىم سالۋدى كوزدەپ وتىر. بۇل جايىندا بەلسەندى تىلەك تاالايبەكوۆ جازعان. ونىڭ ايتۋىنشا، قىرعىز قىزدارىن شەتەلدە الدانىپ قالۋ مەن ءزابىر كورۋدەن قورعاۋ كەرەك.

— ءبىز جاسى 25-26 تولماعان قىزدارعا شەتەلگە شىعۋعا شەكتەۋ قويۋدى ۇسىنىپ وتىرمىز. اتالعان جاسقا جەتپەگەن قىزدار كۇيەۋىمەن نەمەسە تۋىس ەر اداممەن بىرگە عانا ەلدەن شىعا الادى. بۇل ازىرگە ءبىزدىڭ ۇسىنىسىمىز. مۇمكىن باسقالار كورسەتىلگەن جاستى كوتەرۋدى ۇسىنىپ قالار. سونىمەن قاتار ادامدار قوڭىراۋ شالىپ، اتالعان اكسياعا قاتىسۋعا نيەتتى ەكەندەرىن ءبىلدىرىپ جاتىر. تۇركيادا زارداپ شەككەن ايەلدەر دە حابارلاستى، - دەيدى تاالايبەكوۆ.

ميتينگتەن كەيىن بەلسەندىلەر ەلدىڭ پارلامەنتى مەن ۇكىمەتىنە تالاپ ەتىپ بارۋدى كوزدەپ وتىر.